عاااااااااااجل .... اريد المساعده

للرفع

تبغين نصيحتي يالغاليه
حطي جدولك بنفسك لانك ادرى بعدد غرف بيتك
وخلي مع كل غرفة حمام تكرمين وافضل وقت اول ماتقومي الصباح وبعده ريحي شوي وصلي
اما المطبخ بما اننا برمضان فتنظيفه يومي بعد ماتخلصي طبخ غسلي مواعينك اول بأول
واذا خلصتي امسكي دولاب واحد باليوم ونظفيه او ثلاجه او فرن براحتك المهم لاتضغطي على نفسك
يصير المجموع
غرفة+حمام +مطبخ +باليوم الواحد ماتكملي اسبوعين الا البيت يلق بأذن الله
وعسى الله يعينك ويوفقك يارب

صادقه اختي حطي جدولك بنفسك
واهم شي تقومين بدري .. لان البركه في الصباح .. يقول الرسول صلى الله عليه وسلم ؛ بورك لأمتي في بكورها
تصلحين اشغال كثيره الصبح و شغلك يطلع مبارك ، التنظيف مايتوسخ بسرعه و ساعه وحده تكفيك لتفريز طبختين او ثلاث
وزي كذا

واهم شي الغرف الغير مستخدمه مثل مجالس الضيوف والمقلط ، نظفيها و قفلي الباب . علشان مايدخلون الاطفال و يوسخونها
اي شي ماتحتاجينه على طوووول لزباله او للجمعيه الخيريه .. لان الاشياء اللي زي كذا هي سبب حوسه البيت

علمي اطفالك ينظفون اشياءهم بانفسهم مثل ترتيب السرير و طي الملابس و رمي الزباله الله يكرمك
وخليهم يدخلون معك المطبخ مثلا يحشون الساندويش و يرتبون السفره وزي كذا وشجعيهم بكلامك و اعجابك بشغلهم //حتى لو كان شغلهم مو ذاك الزود ..ماعليه شجعي وامدحي

بالنسبه للطبخ برمضان
ضروووري بعد صلاة العصر مباشره تكوني بالمطبخ
وحاولي ماتستخدمين مواعين كثير .. يعني اقتصدي بالمواعين .. اقتصدي اقتصدي اقتصدي .. ترى اذا عفستي المطبخ انتي اللي بـ تتوهقين فيه و تتوهقين بـ تتنظيفه

بالوقت اللي تنتظرين الطبخه الاولى تستوي .. اجلسي جهزي الطبخه الثانيه او غسلي الصحون او رتبي اي شي بالمطبخ

تعلمي تكونين خفيفة يد وسريعه بالشغل ، واكتبي قامة بالاشياء اللي تنظف
يعني مثلا مطبخ : دواليب ، فرن ، طاولات ، مروحه ، نافده ، ارضيات ، خلف الثلاجه وتحتها ، خلف الفرن وتحته ، الثلاجه من جميع الجهات .الجدار
الصاله ، المكتبه ، الكنبات و خلف الكنبات وتحتها ، الموكيت ، الجدار ، التحف ، الطاولات ، المروحه ، النجفات ..
وزي كذا
علشان ماتنسين تنظفين شي ابدا ان شاء الله

حطي جدولك بنفسك إنتي أدري

والجداول الثانية خذي الافكار منها

:) وربي يعينك

لا إله الا الله الحليم الكريم .. لا اله الا الله العلي العظيم ..
لا إله الا الله رب السماوات السبع و رب العرش العظيم ..

لا إله إلا الله وحده لا شريك له ..
له الملك .. و له الحمد و هو على كل شيء قدير ..
الحمد لله الذي لا إله إلا هو .. و هو للحمد أهل .. و هو على كل شيء قدير ..
و سبحان الله .. و لا إله إلا الله .. و الله أكبر .. و لا حول و لا قوة إلا بالله ..