السلام عليكم
يا بنات الاغلبية نعاني من الشعر تحت الجلد
ترى طلع حالة مرضية وموثقة عند اطباء الجلد
انا عن نفسي في ذراعي باليدين عندي مثل هالشيئ :44:
و حتى في سيقاني
وتعتب ماتم شيئ ماسويته و رحت جلسات التقشير باحماض الفواكه و خفت شوي
والحين بسوي ليزر ليدين وسيقاني
نقلت لكم هذا الموضوع المتكامل عن ههذ الحالة الي يمكن كثير يجهلونها
و تقدرون تدورن اكثر عن هذا المرض تحت مسمى Keratosis Pilaris
===================
طبعا الموضوع باين من العنوان .. مين فينا معندهاش شعر تحت الجلد
مع اختلاف الدرجة؟
مين فينا مش متضايقة من شكل رجلها ونفسها تبقى ناعمه وشكلها حلو؟
أنا عن نفسي واحدة من البنات الكتيير اللي الحوار ده طلع ترابنتيتها من زمان قوي
والسبب إيه؟؟؟
الله أعلم بجد, فيه ناس بيقولوا طريقة ازالة الشعر الغلط,
فيه ناس بيقولوا وراثة, وفيه ناس بيقولوا من غير سبب, أنا عن نفسي معرفش,
يمكن بنسبة لي التلاتة, بس اللي اقدر اقولهولك إن معايا " إن شاء الله “
هتفهمي أصل الموضوع وإزاي تعالجيه.
بصو بقى يا بناتيت, الشعر اللي تحت الجلد ده هو مرض جلدي اسمه
بالانجليزي (Keratosis Pilaris) أو اختصاره ال KPs
طب إيه هو المدعوء ال KP ده؟
أنا اقولك يا ستي, ده المعروف بمظهر جلد الوزة أو الفرخة عشان بتظهر
حبوب خشنة على سطح جلدك, و بيبقى عبارة عن تكوين الجسم لبروتين المسمى بالكرياتين
بشكل زايد على الجلد حوالين بوصيلة الشعر, و غالبا بيظهر في الرجل والايد
والمؤخرة (سوري يعني) وممكن يظهر في أي حتة تانية في الجسم تقريبا ماعدا
كف الايد والأقدام, وهو مش مرض معدي ولا مؤذي, بس بيبقى ليه تأثير نفسي
سلبي على المريض عشان الشكل اللي بيسببو.
طيب يا ترى ممكن اخف من المرض ده؟
هقولكم حاجة, بس ماتتخضوش بقى, اسمعوني للآخر.
المرض ده مش بيتشفي منه بس ليه علاج و بيتعالج.
يعني ايه بقى, وهو إيه الفرق بين الشفاء والمعالجة؟
الشفاء يعني حالة مرضية تعالجيها وتخفي منها خالص وماترجعلكيش
تاني بمجرد انتهائك من العلاج لكن المعالجة هو إنك تعالجيها
وتتحسني بالعلاج بنسبة كبيرة جدا, لكن ممكن تضطري تستمري
عليه حتى لو بجرعة اقل عشان ماترجعلكيش الحالة تاني.
طيب هو إيه شكله و أعرف إزاي إذا كان عندي أو لأ؟
هو له كذا شكل ومنظر, فيه منه اللي بتبقى حبوب ملتهبة وحمراء,
و في منها حبوب مش ملتهبة وبيبقى محبوس تحتيها الشعرة, عموما أنا هوريكي صور ليه,
على فكرة هي من على النت بس شبه اللي كانت عندي وكل واحدة أدرى باللي عندها
أول صورة: متهيألي دي بنشوفها كتير قوي على ركبنا ومجننانا وقرفانا في عيشتنا
تاني صورة: دي بقى شكل الحبوب لو ملتهبة ومحمرة وطبعا حابسة الشعرة تحتيها وخنقها
تالت صورة: دي حالة خفيفة من الKP ومتهيألي الصورة دي مألوفة لكتير منا
رابع صورة: دا شكل الKP لما بيبقى موجود على الدراع من فوق
بس أنا عندي شعر تحت الجلد لكن شكله مش كده, هو كده أنا ما عنديش ال KP؟
لا يا ستي براءة, معندكيش, و اللي عندك ده ممكن يروح عادي بالتقشير والحمام المغربي وشوية ترطيب.
إيه ده بقى, أنا عندي الKP .
معنى كده الحمام المغربي والتقشير و الترطيب ميعملوش حاجة؟
لا طبعا يساعد و بنسبة كبيرة كمان, ولازم ترطيب عشان الحالة
دي بتسوء جدا في حالات الجلد الجاف أو شديد الجفاف.
ومش هقولك الحمام المغربي مرتين في الشهر مهم إزاي,
لو متقدريش تعملي حمام مغربي كل أسبوعين لكل جسمك ,
عالاقل لرجلك أو الحتت المصابة بس, المهم تشيلي الجلد الميت باستمرار.
بس كلمة في ودنك بقى, ده مش كافي عشان تعالجي الحالة دي.
و إيه ممكن اعمله تاني غير التقشير والترطيب عشان اقلل الحالة دي؟
أولا: طريقة ازالة الشعر, يعني عليكي وعلى يا سويت يا شمع,
فكك بقى من السيلكابيل والموس بالله عليكي.
ثانيا: فيتاميناتك بقى في ايدك ومايتك تحت باطك, هتبقي لوز إن شاء الله, يعني تاخدي فيتامين
Eو A وتشربي مش اقل من 8 كوباية مية في اليوم
ثالثا: بلاش تستخدمي الصابون العادي في الحموم, يعني لو دوف أو شاور جل بجد يبقى أحسن بكتير,
طبعا ده ماعدا الأيام اللي هتعملي فيها تكييس.
رابعا: : تاخدي تان... أنا عارفة قبل ماتشتموا
ده مش متوفر لمعظمنا وبيبقى حتى في أيام الصيف بس,
لكن أنا بقولك بيساعد بنسبة كبيرة في حل المشكلة “مؤقتا” فـإن عرفتي يبقى خير وبركة.
أنا عايزة أعرف إيه أنواع الكريمات اللي ممكن تعالجه؟
جينا بقى للكلام المهم و ايه الكريمات الموضوعية اللي ممكن تتحط
عشان إن شاء الله نحل المشكلة دي.
الاول أنا هقولك على المواد الكيميائية اللي بتساعد في تقشير الطبقة الخارجية للجلد
وبتدوب طبقة الكرياتين دي و بعدين هقولك بتبقى متوفرة في انهو كريمات
المواد الكيميائية
حمض اللاكتيك: أو الحمض اللبني, وده اللي بنلاقي في اللبن طبعا,
ممكن نعمل ماسكات داخل فيها لبن بودرة وممكن نستخدم الكريمات اللي هقولكم عليها بعدين.
الترتينوين: المادة دي بقى يعرفوها اللي عندهم حب شباب واتعالجو بكريمات داخل
فيها المادة دي أو الحبوب زي رواكتان أو ايزوترتينوين, دي بتخلي
الطبقة الخارجية للجلد بتنموا بسرعة وبتقلل نسبة الكرياتين وبالتالي
الطبقة الخارجية بتبقى ارفع وسهل تتقشر و نسبة المسام المسدودة بتقل.
يوريا: المادة دي طبعا بتبقى مصنعة, عشان ماحدش يقلق من الاسم وإنه ليه
علاقة بالبول, دي بتدوب طبقة الكيرياتين وبيبقى مرطب قوي جدا.
حمض الساليسيليك: الكريمات اللي فيها المادة دي بيبقى ليها تأثير مرطب قوي جدا
على الجلد وبتساعد على تقليل شكل الحبوب دي.
الكريمات
الكرباميد: ايون, بتاع الرجلين والقشف ده,
مستغربة ليه؟ الكرباميد فيه نسبة يوريا 10 جم لكل انبوبة 100 جم,
ولو فتحتي النشرة بتاعتها وقريتيها, هتلاقيه بيقولك بيشيل الكرياتين الزائد
عن الجلد الجاف وزيادة الكرياتين عموما. وانا شخصيا بحبه جدا جدا,
على الاقل فعال وصباح الرخص بتاعه, يعني في الميزانية.
اكرتين 0.05%: ده فيه مادة الترتينوين,
وبيستعمل في علاج حب الشباب, بس اثبت فاعلية في علاج الحالة بتاعتنا
ودكاترة كتير بيوصفوة, إنتي بس هتستحملي التقشير اللي هيعملهولك ويا ريت
ماتسيبيش الترطيب وانتي بتستخدميه, سعره رخيص برضه وفي الميزانية.
ده فيه مادة الترتينوين, وبيستعمل في علاج حب الشباب, بس اثبت فاعلية في علاج
الحالة بتاعتنا ودكاترة كتير بيوصفوة, إنتي بس هتستحملي التقشير اللي
هيعملهولك ويا ريت ماتسيبيش الترطيب وانتي بتستخدميه, سعره رخيص برضه وفي الميزانية,
بس خلي بالك بقى لو إنتي حامل أو بترضعي أو عندك اكزيما بلاش تستخدميه خالص,
و استخدمي كريم تاني بداله.
أفين اكيرات: ده بقى فيه توليفة من المواد اللي قلنا عليها ماعدا الترتينوين ومزودين
شوية محبة من عندهم كمان, هو مستورد وفرنساوي, بس عيبه إنه غالي,
يعني العلبة ال200 مل تعملها 120 جنيه, وأنا ملقتهوش غير في صيدلية
مصر بس هو قوي جدا وترطيبة عالي.
طيب خلاص أنا عرفت هستخدم انهو كريم, أعمل إيه بقى دلوقتي؟؟
ولا حاجة, إنتي هتروحي تشتري الكريم زي الشاطرة وتعملي
زي ماهقولك دلوقتي كل يوم قبل ماتنامي
أولا: يا ريت بجد تحاولي تاخدي دش دافي
عالسريع كده قبل معاد نومك وقبل مانحط الكريم,
مش هتقدري تاخدي دش دافي؟ يبقى أقفي في البانيو أو
الدش واغسلي رجلك أو الحتت
المصابة بمية دافية وصابون دوف أو شاور جل عالسريع.
عارفين ليه بقولكم شاور دافي؟
عشان مسامك تبقى مفتوحة وجسمك يتشرب الكريم بسهولة
ونتيجه تبقى أحسن إن شاء الله.
ثانيا: نشفتي نفسك وخرجتي من الحمام؟ جمييل جدا, يلا ندهن الكريم حلو قوي,
وتدعكي كويس لحد ماجلدك يتشربو.
ثالثا: لفي رجلك بكيس سلوفان اللي بيتلف فيه الجبنة والحاجات دي, لو مفيش, ي
بقى كيس بلاستيك عادي, والبسي بنطلون ستريتش عليه أو لجينجس, اللي عندك,
ونامي بقى و ابقي فكيه الصبحية, وعلى فكرة الحركة دي بتخلي الجسم يستفيد
من الكريم لأقصى درجة.
لو فضلت أعمل ده كل يوم, هخف امتى؟
على حسب الحالة اللي عندك, بس اديها من
شهر ل 4 شهور إن شاء الله و تبقي زي الفل ومزة يا مزة
=============
ان شا ءالله استفدتو من الموضوع
ترى تعبت لحد ما اضبطه واحمل الصور مرة ثانية :09:
و أدعو لي الله يوفقني في دراستي :44:
و اذا اي احد عنده تجربه مع هالمرض يقول لنا