السلام عليكم ورحمة الله وبركاته
بداية ..
عدنا والعود أحمد ....
هنا
خربشات ليست إلا نظرة للمجتمع من زواية .. ونقلتها إليكم ..
وعادي انشق الزبيل وطاح التمر !!
_________________________
متزوجه له ثلاث سنوات وما ربي رزقها بحمل ..
وكل ما تروح لعزيمة .., نفس السؤال في كل مرة ونفس الحريم.. انتي ما حملتي ؟؟!!
طيب ليش !!
وش المشكلة .. طيب سويتي كذا حطيتي كذا ,, وش قال زوجك ,,
لين يسود وجه البنية وينكتم حالها وتكره المجلس وأهله ..
عادي انشق الزبيل وطاح التمر !!!
________________________
في احد أحياء تلك المدينة القديم..
في المسجد بعد الفجر الى الاشراق .. ابو صالح وابو سليم ..
يسولف ابو صالح يقول : شفت يابو سليم .. شفت ابو عبدالله هالخبيث العديم, تراه يقاله يصلي معنا وهو كذاب سقيم وعليه اخلاق مثل وجهه << كل هذا غيبة ..
يلتفت ابو صالح على ولده اللي جايبه معه عشان يربيه.. ثم يقول : صالح .. تسننت ؟ يرد صالح : لا ..
ابو صالح .. قم تسنن وانا ابوك !!
يكبر صالح .. ما يترك السنّة أبد .,. لكن كل ما يجلس مع صديقه يسوي سواة ابوه للأبد!!
عادي انشق الزبيل وطاح التمر !!
________________________
يدخل ابو حمد .. يقول لام حمد .. ترا ولد الجيران سامي صار عليه حادث وانكسرت رجله وتراه ابشرك طيب ..
تتصل ام حمد على اختها .. تقول ان سامي ولد الجيران انكسرت رجله وانجرح ودخل المستشفى من حادث.. تتصل اختها على بنتها تقول .. ان سامي دعسته سياره وانكسر فخذه وهو بالعناية !! تتصل بنتها على اختها تقول ان سامي ولد جيران خالتي ام حمد .. مااااااااااااات !!! يقولون غرق بالمصفّر !!!
عادي انشق الزبيل وطاح التمر !!
________________________
تروح لمستشفى حكومي .. تدخل الاسعاف شايل احد اولادك .. مستعجل تقابلك الممرضة وتقول : ما ذا تريد ؟ الدكتور غير موجود الان ..
عاد انت وحظك يصير لسانك شاصي وتقولها اكشفي عليه .. همن تجيك الممرضة وتعبط وجهها وتاخذ ولدك بقوة وتحلته فوق السرير بقوة واذا صاح زجرت عليه بلغتها !! وما لك حيله الا الزبيل المنشق !!
بينما تدفع كشفية 200 ريال لمستشفى أهلي .. تستقبلك الممرضة .. تفضل سيدي كيف أخدمك !! تعلوها ابتسامة وكأنك تعطيها الذي تريد منها !!
عادي انشق الزبيل وطاح التمر !!
________________________
بثالث ثانوي ,, ولازم يجيب نسبة .. يقول لابوه .. يبه .. سمعت ان المدرس الفلاني تدفع له 500 ويعطيك الاسألة ..
يرد ابوه .. اجل دوك وانا ابوك ألف .. وخله يدبر لك مادتين !!
عادي انشق الزبيل وطاح التمر !!
________________________
رهام .. حالتهم المادية عادية ., .,
صديقاتها أغلب اهاليهم أغنياء ..
تروح رهام لجارتها .. تسلم عليها .. جارتي الله يخليكي عندك الف سلف .. ؟
ايه عندي تفضلي متى ما تيسرت رجعيها ..
رهام مشكووورة يالغلا ..
بعد بكرة .. تزور رهام جارتها .. وتوريها ساعتها ,.. تصدقين يا الجارة هالساعة بثمان آلاف ريال ... وقبل أمس كان باقي لي ألف عشان أكمل المبلغ .. جيت استلفت منك ...
عادي انشق الزبيل وطاح التمر !!
________________________________
يتقدم شاب خلوق لغروب .. غروب بنت عمرها 22 سنه .. امها ترفض الشاب .. ثم يتقدم الثاني والثالث والرابع .. وكلهم أقل من عين أم غروب ..
بعد خمس سنوات .. يتقدم شاب عادي عمره 34 .. تفرح الام .. و توافق ..
وحتى غروب تفرح .. تطلع غروب من سجن الحزن والآلام .. وأقل شي تسويه ... تهجر امها !!
عادي انشق الزبيل وطاح التمر !!
______________________________
يموت أحد معارفك .. تروح للمقبرة وتصلي عليه وتعزّي أهله .. وقبل ما تطلع من المقبرة تسمع ابو عبدالعزيز اللي عمره 58 يسأل رفيقه : ابو جابر باع أرضه والا لا !!!
عادي انشق الزبيل وطاح التمر !!
______________________________
عند الاشارة بنقالي يبيع مكينة حلاقة .. تسأله بكم ؟ . . يقول 180 وعشانك بــ 140 !! تقول له .. آخذها بــ 15 ريال .. يقول : شيل !!
وتمر ام علي بنفس الاشارة .. وتتفاوض هي وإياه .. وتاخذها بــ 90 .. تدخل على بناتها فرحانه .. شفتو يا بنات .. خصم لي 50% !!
وعادي انشق الزبيل وطاح التمر !!
____________________________
شاب .. بمخباته اللي فوق مشط صغير .. لحيته توها طالعة وفرحان .. يحب الصف الاول بالمسجد .. وكل أهله يحبونه .. يشوفه ابو جيرانهم الشايب .. ويقول له وهو ماسك السيجارة .. يا ولدي احلق لحيتك لا تصير ارهابي !!
عادي انشق الزبيل وطاح التمر !!
____________________________
انتهت مدة إقامتك بالفندق .. يجي عامل الامتعة يشيل عفشك .. طبعا العامل يآخذ راتب .. ..
الشاهد .. يوصل السيارة .. ويحمل الاغراض .. ويجي عند بابك .. ينتظر العشرة ريال .. تبين عدم اعطائك له .. يهوشك اخوك ويقول عطه يا شيخ لا تفضحنا عند الناس!!
تعطيه خمسة ريال .. يكفهر وجهه ويقول : انا ايش سوي خمسة ريال جيب عشرة !!
عادي انشق الزبيل وطاح التمر !!
___________________________
سليمان إمام المسجد ... يسلم من صلاة العصر ...
يلتفت على الجماعة يفتح الكتاب .. يقرأ : حدثنا يحيى بن معين عن أبي إسحاق عن محمد بن سعد عن أبيه عن النبي صلى الله عليه وسلم قال : { لا يحل لمسلم أن يهجر أخاه فوق ثلاث }
ثم تكتشف انه ما كلّم المؤذن من سنه ونص !! متهاوشين !!
عادي انشق الزبيل وطاح التمر !!
___________________
في ختام جزئنا هذا .. نذكر الأحبة بأن مثل تلك المواقف نشاهدها في مجتمعنا ..
لذا يجب ان نقدم الواجب تجاهها ... فكل موقف سيء نجد له حلا يفك عقدته ..
أهدي تحية الى الجميع .. وأنتظر آرائكم ..
منقول
!!..شاعــره كم..!! @shaaarh_km
محررة ذهبية
يلزم عليك تسجيل الدخول أولًا لكتابة تعليق.
ههههههههههههههههههههههههه صدق يحبون يبهرون السواليف دايم
تسلمين عالموضوع راااائع ويحكي عن الواقع
تسلمين عالموضوع راااائع ويحكي عن الواقع
seeemo :
و عليكم السلام ورحمة الله وبركاته ماشاء عليك اجدت و ابدعت في وصف الواقع باسلوب رائع وبسيط :hahaha:و عليكم السلام ورحمة الله وبركاته ماشاء عليك اجدت و ابدعت في وصف الواقع باسلوب رائع وبسيط...
مرورك الأروع..
انتظريني في الجزء الثاني..:)
ههههههههههههههههههههههههه صدق يحبون يبهرون السواليف دايم تسلمين عالموضوع راااائع ويحكي عن الواقعههههههههههههههههههههههههه صدق يحبون يبهرون السواليف دايم تسلمين عالموضوع راااائع ويحكي عن...
انتي الأروع..
اني احبك في الله..:)
اني احبك في الله..:)
الصفحة الأخيرة
ماشاء عليك اجدت و ابدعت في وصف الواقع
باسلوب رائع وبسيط
:hahaha: