قرأت مواضيع كثيره تكلموا فيها العضوات عن تغير في حياتهم
الاغلبيه الحمدلله كان تغير حياتهم للافضل . والفضل لله اولا ثم لعالم حواء
هذا حسب كلام العضوات وليس اضافه مني .
فيه عضوات تعلموا الطبخ مثلا واستطاعوا بفضل الله انهم يتقنون الطبخ بشكل كبير ..
وصار عندهم منيو خاص فيهم وفي اسرهم كله من عالم حواء ..
فيه عضوات قدروا يتجاوزوا مشاكلهم الاسريه ...
يمكن لانهم حصلوا على استشاره من عضوات واعيات وعاقلات ..
ويمكن لانهم وجدوا مساحه يفضفضوا فيها ..
ويمكن لانهم شافوا مشاكل غيرهم وعرفوا ان كل بيت يعاني من المشاكل ولايوجد بيت مثالي خالي من المشاكل ..
فيه عضوات استطاعوا بفضل الله انهم يحصلون على استشارات بخصوص البنيان وتاثيث المنزل ,,
والديكورات وماالى ذلك ..
فيه عضوات تعلموا كيف يهتموا بانفسهم ويعتنوا بها .. من مكياج وعطور
فيه عضوات حصلوا على معلومات كثيره ووفيره في كل المجالات
فيه عضوات حصلوا على صحبه صالحه ... عبر الملفات والتجمعات
فيه عضوات يركزون على قسم معين ويتابعونه هو فقط ..
وفيه عضوات يقطفون من كل بستان زهره .. او حسب احتياجهم ..
فيه ناس استطاعوا انهم يصقلوا مواهبهم او يتعلموا حرفه تنفعهم عبر اقسام الدورات التدريبيه
او يحصلوا على دورات تدريبيه ومجانيه .
وهنا بالذات فيه عضوات راسلوني بخصوص بعض الدورات انها احدثت فرقا في حياتهم ..
الى الان الكلام جيد .. وحلو .. ومفرح انك تستفيدين وتطورين من نفسك
حلو انك تعرفين لنفسك وتحددين ميولك او تستفيدين حسب حاجتك .
وفي نفس الوقت انت مطالبه انك تقدمين مثل ماتأخذين فلو ان كل عضوه اكتفت من الشرب من نبع عالم حواء فقط ,, فاكيد سيجف النبع !!
كانت هذه نظره سريعه على الفائده العامه لعالم حواء .ومدى استفادت العضوات منه ..
.
.
.
لكــــــــن
لكن صراحه للاسف بعض العضوات ..وصل الى مرحله ( الادمان )
يعني مثلا تلقينها قاعده ليل مع نهار على النت وفي اي وقت ..!!
او ..
او تضع الطبخ على النار وتتابع المنتدى واكيد راح تنسى النار..
هالوضع خطير جدا ( يعني ممكن يسبب حريقه ) واغلب الحرايق بسبب نسيان الاكل على النار ..!
او البعض تترك اطفالها لفترات طويله وتتابع النت المشكله التصفح يخلي الوقت يمر بسرعه ويخليك تنسى الامور الاخرى ..
واكيد ترك الاطفال خصوصا من هم دون الخامسه لوحدهم ولو كانوا في غرفة قريبه او حتى ترك الطفل ولو كان عندك بدون مراقبه مع العاب خطيره اكيد تركهم فيه مخاطر كبير منها ابتلاع اشياء تسبب الاختناق .
او العبث بالمنظفات او تسلق الاثاث او اللعب بالاشياء الحاده والخطيره !
نعم لكم الحق في متابعة النت والاستفاده او حتى التسليه مادام الامر مباح شرعا .
لكن قبل هذا تذكروا ( كلكم راع وكلكم مسؤول عن رعيته )
لما تتصفحين النت وتنسين الطبخ على النار وتصير حريقه .. اليس هذا اهمال ! لانك ماراعيتي شروط السلامه او حتى الحرص .
لما تتصفحين النت ويعبث اطفالك باشياء خطيره وممكن يصيبهم مكروه .. اليس هذا اهمال !
لما تتصفحين النت وتهملين بيتك . وتهملين زوجك وتهملين اطفالك وتهملين حتى نفسك ,, اليس هذا تقصير منك ..!
نصائح عامه لتصفح عالم حواء براحه تامه لك ولاسرتك ولاطفالك ,,
1- لابد من وضع توقيت معين كل يوم تدخلين فيه ويكون اشبه بالجدول لك بشكل عام ويمكن تغييره من فتره لاخرى بس اهم شيء لاتدخلين النت وانت مشغوله او لم تنجزي اعمالك . اول شيء تنهين الاعمال من والى وبعدها تدخلين وبوقت محدد .
استخدام المنبه ..يفيد
2- اياكم تدخلون النت وعلى النار طبخ !! الا لو كنتي تستخدمين لابتوب داخل المطبخ . لو كان الاكل بيطول على النار ونار هاديه يكون الى جوارك منبه تضبطينه كل ربع ساعه مثلا وتلتزمين به .
3- حاولي تدخلين النت بعد نوم اطفالك او ووفري لهم بيئه مناسبه خاليه من الالعاب الخطره والاثاث الخطر ويكونون تحت نظرك .
ولاتسمحين لهم يغيبون عن ناظريك ولو لثواني ,, كل الحوادث تحتاج لثواني حتى تحدث ..
واكثر الحوادث تكررا للاسف هي ختناق الاطفال عن طريق ابتلاع قطع مثل االالعاب او الحلوى الصلبه او حتى الهلل
يعني دائما حتى لو كان طفلك بجوارك تاكدي ان الاشياء اللي قريبه منه آمنه ..
4- عند التصفح حاولوا يكون التلفون او الجوال الى جوارك عشان ماتقطعين نفسك عن اي العالم الخارجي بسبب النت
وفي النهايه ..
اكيد ان مصلحة المنتدى انه العضوات يتصفحون 24 ساعه .. لكن اللي يهمنا مصلحتكم انتم كاخوات ,,
لانريد ان يكون المنتدى سبب في
حوادث في المنزل .
او حتى مشاكل اسريه بسبب الانشغال بالمنتدى ..
الاعتدال مطلوب في كل شيء ..