العفو يا روني، انا مكنتش اعرف كتير في الميك اب برضه و لا طريقة وضعه، و البنات هنا و في منتديات تانية همة اللي علموني من طرقهم و موضوعاتهم.

بس انصحك بلاش تجيبي حاجات انتي مش بتستخدميها لانها حتترمي بعدين. دايما هاتي اللي انتي محتاجاه و بتستعمليه. على فكرة انا عندي بلاشر لونا برضه و باحبه جدا، و عندي البودرة المضغوطة برضه لكن حاليا باستخدم لونا. بالنسبة لمنتجات سارا، انا بصراحة مجربتش منها حاجة غير الشادو و عجبني، و هي بدأت تننزل الاسواق زي لونا بالظبط. و زي ما باقولك الوان الشادو جذبتني جدا

تحياتي

طب قوليلي إنتي إستعملتي البودرة بتاعة لونا هي حلوة و لا لأ ؟؟ ممكن تستخدميها من غير كريم أساس و لا لازم كريم أساس ؟؟ أنا أسفة لو بأسأل كتير
كمان ياريت أتعرف عليكي اكتر:27:

اهلا يا روني

يا حبيبتي اسألي براحتك، ادينا بنساعد بعض، يعني و لا يهمك

شوفي انا استخدمت بودرة لونا المضغوطة و هي حلوة بس انا باحب بودرة بوبا اكتر و عشان كده ركنت لونا على جنب من يوم ما استخدمت بوبا. بس هي لازم تستخدم مع كريم اساس. اي بودرة لازم تستخدم مع كريم اساس الا اذا كانت السمر كيك، و دي بصراحة انا مش باحبها لاني جربتها و كان شكلها فظييييييع على بشرتي و اديتها لصحبتي لانها بتحبها جدا، و سبحان الله بتنفع معاها جدا.

و انا يا ستي من طنطا، و باشتغل في القاهرة و مخطوبة بس الله اعلم امتى حاتجوز :44:

و انتي؟؟ من كلامك مش عارفة انتي اتجوزتي و الا على وشك جواز؟؟

أنا متجوزة من حوالي 7 شهور و نصف و حاليا حامل فى الشهر الرابع
أنا كمان مش بحب السمر كيك . طلعت وحشة أوي علي وشي رغم إني جبتها بعد ما شوفتها علي وحدة صحبتي حلوة أوي.
بس أنا جبت بودرة من بورجوا حلوة أوي طبعا مش الأصلي علشان الأصلي غالية أوي حوالي 130 جنية و باستعملها من غير كريم اساس لأني مش بحبة و بيطلع علية وحش حتي يوم فرحي مكانش عاجبني شكلي .
عقبالك إنشاء الله قريب .

اهلا روني

ربنا يتمم لك حملك على خير و يقومك بالسلامة يا رب و تجيبي لنا بيبي صغير امور:21:

انتي عملتي زيي في موضوع السمر كيك، انا برضه جبتها لاني شفتها بتستخدمها بسهولة و شكلها كان حلو، بس انا غلطت لان مش اي حاجة تمشي مع حد تمشي معايا

انا مجربتش بورجوا بس فعلا بيقولوا حلوة، لما اخلص الحاجات اللي عندي يمكن ابقى اجربها. بس من غير كريم اساس اعتقد البودرة تبقى شكلها مش حلو يا روني، بس على الاقل حطيها على كريم مرطب عشان تثبت على وشك. و بعدين فيه كريم اساس بورجوا حلو جدا حاولي تجربيه. شكله حلو و بيخلي الوش شكله طبيعي و مش عليه تكتلات

بصي مكياج الفرح اكيد معجبكيش لان اللي عمله ليكي اكيد زوده و انتي شكلك بتحبي الحاجات الهادية. انا عن نفسي قررت اني ان شاء الله حاعمل لنفسي ماكياج فرحي. اصحابي بيقولوا عليا مجنونة لكن انا مقتنعة اني لما اعمله لنفسي حيكون على مزاجي. و انا اللي عملت لنفسي الماكياج في خطوبتي و كان حلو و هادي و لايق عليا و على لبسي و طلع حلو جدا في الصور بشهادة الكل. انا اصلي باكبر دماغي و مش بيهمني كلام حد طالما انا مقتنعة

طولت عليكي يا روني و حكيت قصة حياتي :23: