عاوزة شعرك يطول ادخلى هنا

حلم كل فتاة الشعر الطويل .. واللى بيكون له سحر خاص على جمال المرأة وأنوثتها .. وعلشان كده النهاردة هيكون تحقيق لحلمك .. إزاى تخلى شعرك جميل وطويل وصحى ..
أول حاجة لازم تهتمى بنظام غذائى متوازن لأن أكلك بيأثر على شعرك .. ومعانا أهم الأكلات دى :
الخضروات الورقية ودى بتحفز نمو الشعر زى السبانخ والخس والقرنبيط .
وكمان معاكى الجزر والبطاطا الحلوة والبرتقال والموز والبصل والثوم والفاصوليا دول كمان بينشطوا الدورة الدموية وبيساعدوا على نمو شعرك .
والمكسرات معاكى اللوز والجوز وعين الجمل والتمر والتين .. دول فيهم حديد والحديد مهم جدا لتقوية شعرك وزيادة لمعانه .
الأوميجا 3 ودى بقى مهمة جدا جدا ودى بتكون فى الأسماك بنسبة كبيرة .. طيب مبتحبيش السمك ؟؟؟
تاخدى حبوب الأوميجا 3 ودى بتكون موجودة فى اى صيدلية يا قمر .
الموية بقى : عودى نفسك تشربى فى اليوم لا يقل عن 8 كوبايات موية .. الموية تعتبر مرطب طبيعى لشعرك .
الاهتمام بالشعر من كريمات وزيوت طبيعية .. دلكى شعرك كل يوم بزيت الزيتون او زيت زبدة الشيا .. كل يوم قبل ما تنامى ..
هنتعلم مع بعض ازاى ترطبي شعرك بالماسك اللى يناسب نوع شعرك ..
تهتمى بأطراف شعرك يا قمر .. لو الأطراف تالفة أو متقصفة تقصيها كل فترة .. علشان تتخلصى من الشعر المقصف والتالف .
استعملى المشط الخشب يا قمر .. وده لأنه بينشط الدورة الدموية .. ده غير إنه بيساعد على تقليل نسبة التقصف وبيوصل الزيوت الطبيعية اللى بتفرزها فروة رأسك لكل أجزاء شعرك .
بلاش تستعملى الاستشوار فى تجفيف شعرك .. سيبى شعرك ينشف على طبيعته وياخد وقته .. علشان شعرك مش ينشف ويتقصف يا قمر .
الحرارة بتسحب الرطوبة من شعرك وبتنشفه .. خلى شعرك على طبيعته
ركزى دايما على المواد الطبيعية المفيدة لشعرك .
شعرك تاج على راسك .. علشان كده شعرك تاج جمالك .. حافظى عليه واهتمى بيه يا قمر .. وأى استفسار تحت امركم ..