عايشه في قلق مستمر بسبب زوجي

يارب صبرني واعني على حالتي السيئه
انا مكتأبه وقلقانه طول الوقت .
بنات زوجي مرابط وموقعهم خطر جدا
كل يوم صبح ومساء يرسلي يوصيني على العيال
انام واصحى ويدي على قلبي .
المفروض انه يجي اليوم لاكن قدر الله وماقدر بسبب الدوام .
القلق اللي عايشه فيه صحاني من الغفله اللي كنت فيها .
انا انسانه مقصره في حق زوجي كثير لاكن ابرر لنفسي بان تقصيري بسبب ضغط العيال وهو متفهم وساكت
حصلت بينا مشاكل تاااافهه فرقتنا ايام وليالي حتى الكلام نقطعه عن بعض .
ما ادري ليش صرت الوم نفسي مع ان زوجي احيانا هو السبب .
اول مابداء الحرب كنت قلقانه عليه شهور لحد ماطمني عن وضعه .
لاكن حاليا هو في موقع خطر .
اذا كلمته احس في صوته نبرة حزن على اخوياه اللي استشهدوا . وفي نفس اللحظه يوصيني على الاولاد .
احيانا اقول كلامه لي من واقع الخطر اللي هو عايش فيه .
واحيانا اقول يمكن يحس بقرب أجله ...
اقسم بالله شوي واجن من التفكير السلبي .
اعد الدقائق عد متى يمر الوقت ويرجع لنا وهو حتى لو رجع اسبوع اسبوعين بالكثير ويرجع لدوامه .
صرت مهووسه بمتابعة الاخبار لعل وعسى الاقي شيء ايجابي وتهداء نفسيتي .
قبل امس اخوي يقولي ان اخويا زوجي اللي استشهدوا كان زوجي واخوي عازمينهم في استراحه وجايبين ذبايح ومجهزين كل شيء وكان العشاء في الليل وهم استشهدوا في النهار .
حزنت على زوجي خاصه وانهم اصحابه المقربين كنت دائما اشوف صورهم في جواله وعرفتهم من صورة العرض في الواتس اللي هو حاطها .
مافي شيء يطمني عليه ابدا .


تعبت من هذا الحال .
الله يحفظه لعياله ويصبرني على هذا الحال ..


دعواتكم عسى ربي يفرجها .