$$ عبايتها طايرة مع درايش الددسن..حريم عجلات على السوق$$

بسم الله الرحمن الرحيم



السلام عليكم ورحمة الله وبركاته



استغفر الله وأتوب إليه


استغفر الله وأتوب إليه


استغفر الله وأتوب إليه



نشوف طريقة أم محمد مع عيالها وبناتها




(1)


أم محمد عندها مناسبة و نادت على عيالها ( يالله بسرعة تأخرنا )


وطلعوا وركبوا الددسن وعبايتها طايرة مع الدرايش :icon19: وراحوا للسوق


ولدها محمد فرحان توه بادي يسوق ومثل كل شاب بالبداية يشب على أهله


اشروا لي سيارة حتى لو مقرقعة !!


وابشروا أوديكم للي تبونه (إيه هيّن)


أذن صلاة المغرب وهم توهم بالطريق والشوارع زحمة والسوق بعيد وخلصت الصلاة وأم محمد مابعد وصلت للسوق


أم محمد مشغولة طول الطريق وش تبي تشري لبنتها رنا وبنتها سارة , ومحتارة وش تختار فستان لعرس أخوها, :42:,


ومن كثر تفكيرها مافكرت إنها تقول لولدها يوقف بأي مسجد عشان ما تفوته الصلاة لان الطريق زحمة وما يمدي يوصلون للسوق إلا هو مأذن لصلاة العشاء


فاصل


(الحمدلله المساجد بكل مكان وإذا كان المسجد بعيد أو إنتهت الصلاة المحطات فيها مساجد صغيرة وكل شوي صلاة للجماعة)



((الصلاة تفوت والسوق ماهو طاير))


,,,,,,,,,,,,,,,,,,




(2)


بعد ما وصلوا حطهم محمد وراح وهي جلست هي وعيالها تنتظر المحلات تفتح


ولدها خالد عمره أربع طعش أو خمس طعش يلعب مع باقي إخوانه وأم محمد وييييين مشغوولة تفكر بمقاضي السوق والطلبات اللي وصتها عليها نورة العبدالرحمن وهيلة المحمد وما نبهت ولدها أنه يروح يصلي مع الجماعة!!


مرَت من عندهم حرمة وقالت لولد أم محمد: الله يرضى عليك لا تفوتك صلاة الجماعة


ماشاء الله على ولد أم محمد على طول ترك أهله وراح يصلي!



أم محمد ولدها فيه الخير لكن يحتاج منها إنها تذكره بالصلاة


((الصلاة تفوت والهواجيس ماتخلص))


,,,,,,,,,,,



وكثير من الأولاد والبنات فيهم خير لكن يحتاجون متابعة ومواصلة من أهلهم


مرة دخلت وحدة المصلى ومعها عيالها صغار واحد يمكن أربع والثاني يمكن ست أوسبع سنين وصفت تصلي وعيالها مثلها يصلون مع أنهم صغار بالخمس والست سنوات في هذي السن لم يؤمروا بالصلاة لكن مع الاستمرار الولد يتعود على الصلاة وتكون خفيفة عليه


وبعض العيال الله يصلحهم تنبهينهم على الصلاة لكن يعاندون :hmh: فإذا كان الولد عنيد ماعلينا إلا الدعاء له بالهداية والاستمرار على نصحه وتوجيهه



,,,,,,,




(3)


بعض المرات البنات أو الأولأد يكونون مشغولين بالنت أو جالسين عند التلفزيون أو مشغولين بواجباتهم لكن أم محمد مشغولة بنفسها وبأمور بيتها وبأشياء ثانية وناسية تنبه عيالها على الصلاة



((و الصلاة تفوت ومشاغل الدنيا ماتنتهي))


,,,,,,,,,,




(4)


راحت أم محمد لزواج أخوها وهي وبناتها آخر شياكة وبعد مارجعوا للبيت أم محمد أزالت المناكير لكن ماحرصت بناتها يزيلون المناكير وبناتها صلوا الفجر والظهر وهن متكيسلات وأحيانا يكون ماعندهم مزيل فكان من المفروض على أم محمد إنها توفر المزيل قبل المناكير أو بلاش منه لأن الناس مو نافعينهم لو صلّن بدون ماتزيل المناكير



((والصلاة تفوت والمناكير مو ضروري))


،،،،،،،،،،




(5)


تطلع أم محمد مع عيالها للبر وأحيانا المنتزهات والمطاعم لكن مع الوناسة والإنبساط تنسى أم محمد تذكر عيالها بالصلاة وتنسى تاخذ لبنتها الصغيرة عباية عشان تلبسها للصلاة



((الصلاة تفوت والوناسة ماتخلص))


,,,,,,,,,,,,,,,,





(6)


جابت أم محمد سواق لأن ولدها خلاص صار مشغول بدراسته وبأصدقاؤة وماهو فاضي يوديهم ويجيبهم


أم محمد صارت تمشور السواق من بيت لبيت ومن سوق لمشغل وكثير من الأحيان تحضر الصلاة ومع ذلك ماتعطي فرصة للسواق انه يؤدي الصلاة الجماعة وكأنه ماهو مسلم :confused-!!!


وعلينا كمسلمين أن نعين المسلم على أداء واجب الصلاة جماعة واذا كان السواق غير حريص يجب أن نعينه على ذلك حتى لانأثم


وثانيا كثير من الأجانب يرون أن أبناء بلاد الحرمين حريصين على العبادات لكن إذا جوا يستغربون من بعض تصرفاتنا



((و الصلاة تفوت والمشواير ما تخلص))


,,,,,,,,,,,,





(7)


أم محمدبيتها شغله كثير وشغالتها من يوم ماتصبح الى أن تمسي وهي من شغل لشغل


واذا كان فيه ضيوف الشغل يكون أضعاف ومن يوم ماتصبح تبدأ تنظف البيت وتمسحه وقبل العصر تدخل المطبخ ومن كثر الشغل تتساهل بعض الشغالات بالصلاة وممكن تأخرها عن وقتها بحجة انه الشغل كثير ومايمديها تلحق عليه وقبل مايجون الضيوف لازم البيت يكون بأحسن صورة


وأم محمد عليها تنبه شغالتها إنها تقوم بصلاتها أول بأول أو قبل ماتفوت الصلاة عشان ماتشترك معها بالإثم بسبب تاخير شغالتها الصلاة عن وقتها



((والصلاة تفوت وشغل البيت قاعد على كبودنا :07:))


,,,,,,,,,,,



قال عليه الصلاة والسلام:


(مروا أولادكم لسبع واضربوهم عليها لعشر)


وقال عليه السلام:


((كلكم راع وكلكم مسئول عن رعيته، فالإمام راع ومسئول عن رعيته، والرجل راع في أهل بيته ومسئول عن رعيته، والمرأة راعية في بيت زوجهاومسئولة عن رعيتها، والخادم راع في مال سيده ومسئول عن رعيته، وكلكم راع ومسئول عن رعيته.))


رواه البخاري





أين نحن من أحاديث الرسول عليه الصلاة والسلام




اللهم لا تجعل الدنيا أكبر همنا ولا مبلغ علمنا


اللهم أعفوا عنا إسرافنا وتب علينا إنك أنت التواب الرحيم




المهره الاصيلة