عتدي اقتراح لطبخات رمضان

عليه افضل الصلاة والسلام

ماعندي فكرة عن الاسعار بما اني مو انا اللي اقضي واجيب الاغراض
فما ادري اذا اللي راح اشاركه يكلف او لا
لكن هذي الفتره تطلع لي مقاطع وصفات بالتيك توك واليوتيوب افكر اجربها على خير
مثل وصفات يستخدمون فيها خبز التورتيلا
يغمسونه في مويه او حليب ويقصونه نصين ويحطون بالنص أي حشوه مطبوخه لحم مفروم او دجاج واحس ينفع حشوات الخضار المهم يقفلونها جهة اليمين لليسار واليسار لليمين تصير مثل مثلث ويقفلون بخليط طحين ومويه ويرصون القطع بصينية فرن ويرشون فوقها شوي جبن ويدخلونها الفرن تتحمر ويقدمونها .

او وصفه ثانيه يحطون على خبز التورتيلا لحم او دجاج مفروم مخلوط ببهارات مثل الكفته ويفردون طبقه خفيفه منه على الخبز ثم يطبخونه على الطاوه من الجهتين او بالفرن
او نفس الطريقه هذي لكن يلفونها رول ثم يقطعونها مثل السينابون ويطبخونها بالفرن ويقدمونها مع صوص ابيض بالزبادي والطحينه

انا كنت اسوي نفس الطريقه لحم الكفته افرده على العجينه الجاهزه المربعات لكن اقطعها نصين تصير مستطيل ثم احط اللحم فوقها وادخلها الفرن تنضج حلوه وسهله

ووصفة بطاطس كومبير لكن انا اسويها بالمايكرويف اسرع اغسل البطاطس زين واسوي فيه فتحه صغيره بالسكين بالنص والاطراف يادوب عمق 1 سم واحطها بالمايكرويف على الجهتين 4 دقايق لكل جهة واذا البطاطس كبير احط 4 دقايق ونص وتطلع ناضجه افتحها من وجه واحد بس خط بالطول وبطرف ملعقه او سكين اهرس البطاطس واحط فوقه ملعقه زبده ورشة ملح وجبن مبشور شيدر او موزاريلا واخلطه معاه ثم ارتبه بالملعقه واحط على الوجه بالنص أي شي متوفر ويعجبني مثل زيتون فلفل بارد او اذا تحبين ذره وبالاخر جبن ورجعيه المايكرويف يذوب دقيقه ونص وفي ناس يحطون ذره او بيبروني او لحوم
وهذي الطريقه اذا تبحثين عن اسمها راح تلاقينهم يطبخونها بالفرن ساعه الى ساعتين ونص تطول عشان كذا المايكروييف اسهل واختصار

وكذلك وصفات التوست صايره تطلع لي انواع واشكال
غير جيب التاجر اللي كلنا نعرفه شفت طريقه يفرمون التوست او حتى الصامولي معاه ويصبون عليه شوي حليب ممكن حليب عادي وممكن مبخر وممكن مويه المهم يعجنونه ويحشونه مثل الكبه ويقلونه

او نفس العجينه هذي غمسيها ببيض مخفف بحليب ثم غطيها بالزعتر واقليها تصير كورات زعتر

اكتفي بهذا القدر وان شاء الله نستفيد من باقي التعليقات والله يكتب اجر الجميع ويجزاهم خير