عجزت أتأقلم مع أخوات زوجي وخلاص مليبت !!!!

السلام عليكم ورحمة الله وبركاته

صبحكم الله ومساكم بالخير يا بنات حواء
ومن تجاربكم وخبرتكم في الحياة نستفيد

بصراحة ياجماعة الخير عجزت أتأقلم مع أخوات زوجي
عجزت أتقبل الكثير من طباعهم

بيني وبينهم اختلاف فطري شديد ـ ومايعني ذلك إني على صواب ـ
بس انصحوني

أخوات زوجي أعمارهم متفاوتة بعضهم كبار كبر أمي
وعددهم سبعة ولهم بنات متزوجات
وأنا لي متزوجة قرابة ثمان سنوات
علاقتي معهم مبنية على الاحترام والتقدير المتبادل وأنا بدوري أحب أحافظ على الرسمية


لكن اللي مضايقني إني لما أجتمع معاهم أشوف فيهم اللف والدوران على غيري
يعني يسبون الناس سب موطبيعي
نقادات بشكل مو طبيعي
طريقتهم في التفكير شكاكة
دائما يغلبون الظن السيء في الآخرين
والأدهى والأمر انهم لما تكون الوحدة معاهم يعاملونها باحترام ويمدحونها
وبس تروح قطعوها تقطيع
أحيانا وأنا جالسة في نفس المجلس أشوف غمز ولمز على وحدة قاعدة معهم
وفوق كذا شكليات ومظهرجيات بقوة
يعني يحكمون على الوحدة من لبسها ولبس عيالها
مع انهم جدا عاديات يا ناس
لكن فيه غرور
والي بعد يضايقني الشماتة بالناس
والله طبعهم يتعب
وأمهم مثلهم وأكثر لكن الأم أقدر أتحملها
وأقدر أتكلم معها لأنها حرمة كبيرة
وتتأثر بالتوجيه والحوار لكنها تتغير لما تجتمع ببناتها

المهم
شعارهم مع السلفات ـ فرق تسد ـ
ما يحبون يشوفون ثنتين من السلفات متصاحبات
ودايما يحذروني من سلفاتي البالغ عددهم خمس وأنا السادسة

أحيانا صار الشك يراودني في انهم يقولون عني أكثر وأكثر
وما صرت أجد أي راحة في الاجتماع بهم
مع أني ما أحب أبعد زوجي عن أخواته لكن الشكوى على الله

زوجي إذا راح لهم يرجع متغير
ويرمي كلام مو مفهوم
أحيانا أقوله ليش إذا رحت تجي نفسيتك زفت
يبدأ يبرر وما يجاوبني ... لكن مع السنين لاحظت هذا الشي ولاحظت فعلا أمور تجرح
لكن الحمد لله على كل حال


المهم ناوين على دورية وزوجي قاعد يضغط علي أكون معاهم
وأنا ما بغيت أبد أدخل معاهم في الدورية ذي
والله احترت
أرفض أو أوافق
الله يعين بس

فيه كلام كثير لكن هذي فضفضة
وأنتظر ردودكم جزاكم الله خير