عجزت اتأقلم ادور عذروب الدرجة اسب نفسي اقول بنت فقر ماتعودت على الراحه

السلام عليكم ورحمة الله وبركاته
اخواتي انا ساكنه دور متكون من 4 غرف وصالة ومخزن وحوش صغيرون وحمامين
جت خدامه اهلي عندي اسبوع كانو مسافرين وحطوها عندي قبل تقريبا6شهور
وشفت الراحه اقوم بيتي مرتب حمامات نظيفه وانا بس حاطه رجل ع رجل ومرتاحه علي الطبخ فقط حتى المواعين هي تغسلها
رغم اني موسوست نظافه يعني حتى قبل الخدامه انظف بيتي يوميا من كنس و مسح وغسيل حمامات بس مقصره بالطبخ يعني ما أطبخ يوميا لكن ممشيه اموري وبقوووه الحمدالله بس يوم جت حقت اهلي ارتحت بزود وقمت اعزم في بيتي ومااشيل هم اللي حصل
قمت ازن على رجلي وازن وازن ابي خدامه ابي خدامه تكفى ابي بالاول رفض بس جلست ازن وانه اربع اطفال وتعب علي ومرره تعبت على ما اقنعته وهو يقنع فيني ياحرمه انا راعي استراحه وما اجلس بالبيت كثير وماعندك داخل وطالع ولاعمري عزمت في بيتي وطبخ على كيفك مو اساسي
لكن انا ماش براسي ابي خربتني شغالة اهلي حسيت اني ظالمه نفسي
قال رجلي والله ما تتأقلمين صارلك10 سنوات عايشه بدونهم تراهن قلق،وأنا ماسكه معي ابي واعطيه فلوس مجمعتها وقلت امسك حق تقديمها مني انا وانت عليك الراتب واقتنع زوجي وقدم بعد ماساعدته بالتقديم
اول شهرين انا طايره من الفرحه وعايشه ملكه تغسل وتوكي وتنظف وانا صرت اطبخ والتفت للطبخ شوي وقمت وبناتي الحمدالله متعاونات صغار بالابتدائي تعرفون حماسي اول مره تكون عندي خدامه
جا رمضان وفي رمضان عادة سنويه كل اخوان زوجي وزوجي بعد يفطرون ويتسحرون مع امهم وابوهم السحور قايمه فيه خالتي
والفطور كل وحده من حريم العيال ترسل مع زوجها طبق مره لقيمات ومره سمبوسه ومره صينية بيشاميل ومره شاورمه وهكذا وتمتلي السفره من كل مالذ وطاب والطبخ سهل يعني نوع واحد مره اطلع سمبوسه واقليها ومره اسوي مطبق يعني مو متعب والشغله ماتاخذ مني ساعه الا وكل شي جاهز وهو كله طبق واحد
وانا اروح عند اهلي افطر
هنا حسيت بالملل زوجي مو عندي وذا الشغاله بوجهي24 ساعه
وزوجي اذا قلتله عطنا قصر علينا لانه يدفع راتب خدامه
هنا انا خلاص فتحت عيوني
قلت يامن شراله من حلاله عله
رغم انها تنظف ومافيها شي
لكن مارتحتلها ابد ولا ودي اشوفها وصرت بس افكر اتنازل عنها
عايشه بقلق قبل شايله بيتي واطفالي ومااشتكيت لكن بني ادم طماع
انا الموضوع يدور في بالي له 3 ايام ودي اسويلها تنازل
ومادري شلون افاتح زوجي والخدامه بالموضوع
محتاره واكبر غلط سويته اني جبتها خسرت فلوسي والحمدالله انها مني مو من زوجي ولا كان ذبحني
بنات وش تنصحوني
والله العظيم يا اخواتي رغم وانها كويسه ومافيها عيب لكن عجزت اتقبلها لو بشتري شي عينها عليه لو بالبس شي ماارتاح عجزت
وخواتي يقولون اصبري عليها لا تستعجلين تساعدك في اطفالك وتقوم فيهم لكن انا ماش مابي وعادي انا اقوم في اطفالي مادام اني في صحتي اااه ليتني مفكره بكذا قبل بس خذني الحماس 😢😢 اخواتي والله ماارتاح الا لكم وما احب الا انتم لانكم بجد تساعدوني وتعطوني الحل السليم