عرس الاولين

عرس اﻻولين ((ددسن الطقاقات)) ((الثاني والاخير)) هوا يهفهف والطقاقات بالنص قاعدات وحولهن الجمر
عشان يحمن الطيران والحريم متحلقات حولهن ويبدا الطق وماتشوفين الا هالجدايل تفكك وهالشعور
تنسف وهالزري يلق لق يتلامع وهالذهبان ترهش كرسي جابر وكرسي فهد والمرتهشه والغوايش منذا لذا
درب الدركتل وعيون محمد عبده والبراقع وغيره من أسماء الذهب المهم رقص وطقطقه وطق أصبع
وحركات منول عاد الي تكهرب هذي من قدهاوماتسمعين الا صوت هالطيران وهالبخور الزين يعجعج والقهاوي والشواهي تصب وماجت الساعه حدعش الا السماطات تفرش وهالشباب كل واحدن شاقل
هالصحن فوق راسه وداخلن به على الحريم وهالحريم متغطيات بجله الصلاه والي عبايتها وكل ثلاث حريم
متغطيات بجلال واحد وهذا منهو وهذا من ولده وذاالمزيون منهو وهذا منهو ويحليله كبر ويزينه خط
شنبه ويملحه طلعت لحيته ويالله تقييم والرجال مبسوطين كلن وده يشيل العشا ويدخله يتسابقون مسابق
ياكافي وبعد ماتعشوا وتبخروا وعينوا من الله خير كملوا طقطقه ورقصوماجت الساعه ثنعش ونص
أو وحده بالكثير الا والعرس مخلص والناس تفرقوا مابقى الا الاقارب الى قاموا وظفظفوا البيت وغيروا
لبسهم ولبسوا قمصانهم وتسدحوا على هالزوالي وناموا وهذا طبعهم ماهنا شي يكلف
كلشى بسيط والصبح قاموا ولا أم العروس مزينه القهوه والفطور وابوالعروس جايب الخبز والنواشف
وحطوا فطيرهم وعطوا الرجال حقهم والشواهي بهالبرقان الغضار الي تشرح الصدر ودله هالحليب
بالزنجبيل الى ريحته تشق الخشم من زينه وسوالف عن العرس ومن جا ومن ماجا ومن الي طلعت نجمه
الحفل ومن ازين وحده ترقص ومن هالسواليف ويقعدون الاقارب للغدا يوسعون صدر ام العروس عقب
بنيتها ويتعاونون على طبخ الغدا وش زينهم ووش ملحهم شبوا على لحيمتهم وكبوا جريشتهم وجابوا شاهي
هالضحويه مع الخسيسه والكراث وقعدوا يتقههون ويسولفون لين حول الظهر مستانسين وش حليلهم
قليباتهم على بعض البنيات مع البنيات يلعبون والحريم مع الحريم يشتغلون ويسولفون وفي الليل
يسمرون ويتواسعون الصدر لا أجهزه تلهيهم ولا شي مالهم الا جمعاتهم وسويليفاتهم وبريق الشويهي
حولهم وبس وهذي احسن ترفيه بالنسبه لهم جمعتهم مع بعض يالله جمع الجنه وفوز الاخره ووبس وخلصت سالفتنا وهذي نبذه عن سوالف وعروس الاولين الله يجمعنا بهم في جنات النعيم
،،،،،، هاه عسئ عجبتكم السالفه،،،،،، منقوووول،،

سالفتنا وكانت هذي نبذه من سوالف وعروس اﻻولين الله يجمعنا بهم بجنات النعيم وإن شاء
الله تكون السالفه أعجبتكم