بالنسبة إلي ومن وجهة نظري الخاصة إليكم رأيي في الأعراس بشكل عام ..
يعتبر العرس مسلسل انتظار فريد من نوعه ..
أهل العروس والعريس ينتظران المعازيم ..
يأتي المعازيم ويبدأ الطن والرن والدبك والرقص (لنا حديث مفصل عن هذا)
المعازيم ينتظرون قدوم العرس ..
أتت العروس ويبدأ هنا مسلسل الغيبة التركي(يعني شي 180 حلقة مو أكتر)
العروس والمعازيم بانتظار العريس ..
جاء العريس وبدأ مسلسل غيبة + نميمة ولكنه مكسيكي ( يتجاوز 450 حلقة)
الآن العريس والعروس بانتظار المعازيم لحتى ينقلعو ..
الغريب في الموضوع أن المسلسلات يكون لها مدير انتاج مسؤول عن المصاريف ولكن الفرق أن المسلسلات العادية يجنون منها أرباحا أما هذا المسلسل بالذات فهو مصاريف للكب بالزبالة فقط ..
وإليكم الأجواء التي تسود الأعراس .. طبعا على اعتبار الشباب لا يدخلون إلى صالات الأفراح النسائية فإليكم وصفا عما يحدث:
تكاليف قبل العرس تقارب 200 ألف ثمن مكياج ولبس لأم العروس وأختها وخالتها وعمتها ومدري مين ...ونفس الشي لأم العريس وعمته وخالته ..
محاولات فاشلة لاختصار عدد المعازيم للحد الادنى.. وبالنهاية ما حدى رضيان .. هي بتحرد لأنو ماعزمتي بنت حمى خالة عمتها .. وهديك آخدة على خاطرها لأنك ما بعتيلها كروت لحماتها وبنات حماها (ضروري لأنو نحنا رايحين ع السينما نحضر فلم)
بعد القتل وشد الشعر لحتى توزعو الكروت وتجنيد كل صبي بالعيلة وكل شب ليفتل ع البيوت ويوزع الكروت .. يأتي العرس الميمون ..
تبدأ وفود المعازيم بالقدوم وبيسمع الواحد تعليقات شروي غروي ..
إذا عملتوها بصالة عالقد بيقولو ما لقيتو أبعد من هالصالة وإذا عملتوها بصالة مرتبة بيقول لعمى شو بيحبو البعزقة .. وإذا ساويتوها بفندق بيقولو يوه ما بتعرفو إنو في كاميرات تصوير ..
المهم اندفسو المعزيم وقعدو بأماكنهم وكل وحدة قالبه برطومها متر(يعني شفايفها بس لأنو عليهون حمرة سميتهم براطيم ) لأنو الكرسي تبعها مو جنب كرسي العروسين (طبعا لازم تبحلق بالعرسان منيح مشان تعرف تغتاب وتوصف بعدين)
بيبلشو هالصبايا بلرقص على أنغام الموسيقى وهنا عزيزي المشاهد ترى العجب العجاب .. شي لابس وشي نسيان تيابو بالبيت .. يعني أنا مرة فكرت وحدة نسيانه كنزتها بالبيت بس طلعت كتير بلدي ياااااي هيك الموضة .. وبيلش يشوف الواحد شي طالع شي نازل .. وأحلى شي إذا حطو أجنبي و لقيت شي وحدة عم ترجف كأنو فايت برجلها بريز كهرباء http://forum.hawaaworld.com/ alt=" class="inlineimg" /> (طبعا مابنرقص ع الأجنبي غير هيك) ناهيك عن إنو شعبنا السوري بيرقص ع الأغاني حتى لومابيعرف الكلمات وبتلاقي الوحدة عم تحرك شفايفها بكلمات لميادة حناوي وهي عم ترقص على شاكيرا المهم إنو هي عم ترقص
وبعدين بتجي العروس....
وبتلاقي كل وحدة صارت رقبتها مترين وهي عم تشطها وتمطها مشان تشوف العروس على أساس مو جاية لعندها ورح تمر من جنبها ..
طبعا بتبلش الغيبة والنميمة والغمز واللمز .. شي بيقول والله كنت مفكرتها أحلى من هيك التانية بتقول يييي شو هالبدلة المشرشحة والله أنا بنتي لبستها بدلة فرنسية بتجنن مو متل هي .. على أساس حدا طلب رأيها قال يعني
وخدو على حكي على قولة كأنو مكياجها مو زيادة ما وبتلاقي التانية عم تدبلها بعيونها لرفيقتها بإشارة منها إنو إيه مزبوط ..
وإذا كانت العروس نحيفة بيقولو متل مجاعات أفريقيا وإذا سمينة .. والله متل الدولفين .. وكأنه قصيرة كتير وكأنو طويلة متل الحورة وكأنو شفايها كبار وكأنو أنفها مدري شلون وخود على غمز بين القاعدين ولم حسنات من الغيبة والنميمة ..
هيــــــــــــــــــــــــــــــــــــــــــــــــ ـــــــــــك لحتى يجي العريس وهون بقى ..
إذا العروس أحلى من العريس : بيقولو لعمى شو ما إجاها غيرو لحتى قبلت فيه ... أو بيقولو يمكن آخدته على مصاريه ... لا والشاطرة اللي بدها تكمل و تقول يا آخد القرد ..قال يعني عم تشارك بالحديث ..
وإذا العريس أحلى من العروس : بيقولو الله يعمي على قلبو .. يمكن مطبقتو لحتى آخدها وخود على وتوتة بين هالطاولات وطبعا كلو عم يتبسم وهو عم يحكي مع اللي جنبو بصوت واطي مشان مين ما شافهون عم يحكو يقولو أكيد عم يكتبو المعلقات السبع من كتر المديح والغزل اللي يحكوه بين بعضهم ..
منجي لتلبيس الدهب .. وياويلي :
إذا لبسها كتير بيقولو ولي ع البعزقة والله لو ملاقي مصريه بالزبالة مو هيك .. طبعا بالإضافة لأنو شو ما لبسها رح يقولو مشرشح ..
وإذا لبسها قليل بيقولو : هلق هاد اللي لبسها ياه .. طبعا وكل وحدة عم تتغمى بتمها ومو عاجبها كأنو عم يلبسها لإلها
وطبعا على هالمقياس قيس .. الكاتو والبوفيه (هاد لحالو مسلسل )
وبيضلو العرسان ينطرو المعزيم ليروحو ع بيوتهم .. مشان يبلشو كلهم حكي تاني يوم على قولة مشرشح ومبهدل ومنتوف .. وهو أحلى لا هي أحلى .. شفتي كيف باسها لعمى شو قليلين حيا ما عد يقدرو يستنو ليوصلو ع البيت .. أو لعمى شو طشط هالعريس العروس دالقة حالها عليه وهو ملبك بتيابو متل اللبخة .. طبعا هذا غيض من فيض ..
والسؤال بيطرح نفسه :
إنو مشان الله هالعريس والعروس المساكين ليش بيتكلفو مصاريف العرس اللي بتكسر الضهر مشان العالم يجو يقيموهم ويمشو !!!!
بالله عليكم لو راحو فيه شهر عسل مرتب وصرفو هالمصاري على بسطهم مو أحسن ؟؟
مابعرف هاد رأيي أنتو شو رأيكم ؟؟
إنو مشان الله هالعريس والعروس المساكين ليش بيتكلفو مصاريف العرس اللي بتكسر الضهر مشان العالم يجو يقيموهم ويمشو !!!!
بالله عليكم لو راحو فيه شهر عسل مرتب وصرفو هالمصاري على بسطهم مو أحسن ؟؟
مابعرف هاد رأيي أنتو شو رأيكم ؟؟
صـــدق فكره المفروض يكون عايلي والمعازيم بس اهلوا للعروسه والعررريس بسس مايتكلفوا كتتتتتير ومشكوره موضوع رائع