جوري10

جوري10 @gory10

عضوة فعالة

عرفت السر ويا ليتني ما عرفت..

الأسرة والمجتمع

السلام عليكم ورحمة الله وبركاته
اخواتي ،يمكن كلامي يطلع مو مرتب او ملخبط بس اعذروني لاني اكتب لكم والاحساس بالقهر يتملك كل ذره في جسمي ..
الام بالعاده هي اللي تنصح بناتها بحقوق الزوج وتحاول تكون قدوه لهن لكن انا امي العكس امي من يوم احنا صغار وهي تعامل ابوي اسوأ معامله ما تحترمه نهائي وتشتمه في وجهه ومن وراء ظهره عند الكل وتحاول تبرر كل تصرفاته بشكل سئ ولا عمرها قالت له كلمه حلوه ويشهد الله علي اني ما عمري شفتها تبتسم بوجهه، ودائما تسبه قدامنا وتزعل اذا احد مننا دافع عنه هي بأختصار معيشته في جحيم بالرغم من ان ابوي طيب وملتزم والكل يحبه ويحترمه وهو يحبها ويعاملها احسن معامله وما اذكر ولا مره رفع صوته عليها ،وبالرغم من اني متزوجه وساكنه في مدينه ثانيه بعيده عن اهلي الا اني كل ما اتصل عليها تستغل الفرصه علشان تشتم ابوي وتروح المكالمه على تذمرها منه وشتمه بابشع الالفاظ ..
وكثير ما سألنا بعضنا انا واخواتي ليش امي تكره ابوي وتحقد عليه كل الحقد هذا بالرغم من معاملته الطيبه لها ...................وعرفت ................وليتني ما عرفت ..
اعترفت لي امي قبل يومين انها كانت تحب واحد ثاني قبل ما يخطبها ابوي وكانت تحبه مرره وميته فيه بس جدي الله يسامحه جبرها على ابوي وبالرغم من مرور كل السنين هذي وهي الحين في الستين من عمرها الا انها ما قدرت تصفح عن ابوي واللي قاهرني انها معترفه ان ابوي طيب معها والكل يحبه الا هي حاقده عليه ، والمضحك المبكي انها تقول لي يمكن لو تزوجت اللي كنت ابغاه كان ما عاملني زين؟؟؟
طيب ليييييييييييش ؟؟ ليش تعامل ابوي كذا وش ذنبه المسكين يعيش اربعين سنه مع وحده ما شاف منها الا ابشع معامله ومن حبه لها ما تزوج عليها ؟؟
الله يهديها حتى حنا بناتها وعيالها طلعنا معقدين وفينا كل العقد النفسيه من المشاكل اللي كانت امي تحب تثيرها حتى بدون سبب لمجرد انها تنكد على ابوي ..
انا ماني عارفه كيف اتصرف ؟؟ تنصحوني اعلم خواتي بالسالفه ولا اسكت؟؟ خصوصا انهم زيي محتارين من سبب كرهها لابوي ..
وبنفس الوقت خايفه على امي ...خايفه عليها من عقاب الله بسبب معاملتها لابوي وخصوصا انها مريضه بالقلب والسكر ..ابغاها تتوب قبل ما يجي يومها وكلنا بنموت وما احد بيهرب من يومه ..
التفكير ذبحني الله يسامحك يا امي دمرت نفسها ودمرت ابوي ودمرتنا معها بسبب حب صار له اكثر من اربعين سنه ..
تكفون ردوا علي وشلون اغير امي وشلون انصحها لاني ما اقدر اتركها على خطأها..
58
5K

يلزم عليك تسجيل الدخول أولًا لكتابة تعليق.

تسجيل دخول

الشاطره حواء
الشاطره حواء
الله يهديها وذكريها ان رضى زوجها يدخلها الجنه بإذن الله
صحفيه في الشرقية
بصراحه انا اعبرها خيانه لرجل عطاها كل مايملك ووثق فيها

يالله حسن الخاتمه
الحارة القديمة
الله يهديها بس انتبهي لاتزعليها حاولي انك تصلحي من موقفها بدون ما تزعلينها 0
مداوية الجرحى
ذكروها دايم بحق زوجها وبالجنه وبالنار ووعيد الله لمن تعصي زوجها وصدقيني كل القلوب القاسيه تلين مع كثر الذكر فاجتهدووووووووووووو وماله داعي تعلمين اخواتك من باب المصلحه
جوري10
جوري10
ذكروها دايم بحق زوجها وبالجنه وبالنار ووعيد الله لمن تعصي زوجها وصدقيني كل القلوب القاسيه تلين مع كثر الذكر فاجتهدووووووووووووو وماله داعي تعلمين اخواتك من باب المصلحه
ذكروها دايم بحق زوجها وبالجنه وبالنار ووعيد الله لمن تعصي زوجها وصدقيني كل القلوب القاسيه تلين مع...
مشكورين اخواتي على الردود لكن المشكله انكم ما تتخيلون مقدار حقدها عليه تصدقون لما كنا صغار انا واخواتي كانت تعاملني انا معامله سيئه بينهم كلهم لاني اشبه ابوي ودائما تعلق على شكلي وتقول انتي مين اللي بياخذك وهذا شكلك لاني سمراء مثل ابوي وهي بيضاء وخواتي طلعوا مثلها ولما كبرنا وتزوجنا تغيرت معاملتها لي لاني انا الوحيده من اخواتي اللي طبعي هادي وما احب ارد عليها لما تسب ابوي واسكت واخليها تكمل بالرغم من ان الالم يقطعني بس ما احب ازعلها لاني اشوفها تزعل على اخواتي لانهم ما يسكتون مثلي ولما تشتم ابوي قدامهم يزعلن ويردن عليها ويدافعن عن ابوي بس انا تعبت ونفسيتي تعبت وانا اشوفها تظلم اعز انسان عندي وتشتمه ولا اقدر اسوي شي ويا ليت ابوي كان قاسي معها يمكن كنت عذرتها بس المشكله ان ابوي طيب فوق ما تتخيلون ويحب يساعد الكل وامي حتى اعمال الخير اللي يسويها ما تحبها واضرب لكم مثال فيه قريبه لنا تصير عمة ابوي وهي عجوز كبيره في السن وعايشه لوحدها وابوي كل فتره يزورها ويعطيها اكل وفلوس وكل اللي تحتاجه لان لها اولاد بس ما يهتمون فيها وامي مو عاجبها تصرفه ودائما تقول لي ابوك خرف مضيع فلوسه على العجوز هذي وهي ايش بتسوي بالفلوس والاكل وهي على حافة القبر؟؟
بنات انا احس ان امي ايمانها ضعيف حتى اني لما اشغل التلفزيون على برنامج ديني او الراديو تتضايق وتقول لي طفيه وحاولنا كثير ننصحها لكنها دائما تزعل وتقول انتم ما تحبوني وتحبون ابوكم اكثر مني ويرتفع عندها السكر وكم مره يتعب عندها القلب وتدخل المستشفى بسببه ،هل علي اثم اذا تركتها وما نصحتها علشان ما تتعب ولا لا والله احترت..