عرفت ان زوجها متزوج عليها بالسر(زواج مسفار) اعلمها والا لا شوروا علي محتااااااارة

السلام عليكم
بدخل في الموضوع سيده
ياطويلات العمر عرفت ان صديق زوجي متزوج على زوجته زواج مسفار يعني اذا سافر يروح لها
وهو زواج بالسر من دون مأذون يعني بوجود والدها وشاهدين يعني اقصد ما وثقوا الزواج عند المحكمة
وهو بحكم عمله يسافر لجدة مرة او مرتين بالشهر
فهو يروح لها
لدرجة انا ما علمها اسمه ولا وين ساكن
بس تعرف انه ابو فلان هو عمره 45 سنه وهي عمرها 17 سنه
هي ماهي سعودية من ديره معروفه بالسحر 
ممشي لها راتب 1500 ريال
ومهرها 25000


وهو واضح انه ماخذها سعة صدر ومانعها من الحمل لانه واضح انه زواج بنية الطلاق لانه قد سواها قبل هالمرة
لما كان في دوله عربيه
يتزوج اشهر ويطلق
وزوجته. ياعمري ماتدري
انا عرفت بطريق غير مباشر كان زوجي يسولف عنه وهو يقول واحد من الربع وماعلمني اسمه
ومرة زل وقال فلان بس انا تجاهلت اني سمعته وهو معتقد الى الان اني ما اعرفه اي واحد هو من ربعه
لكن اللي يقهر انه يحاول يجر ربعه لهذا الطريق
ويجلس يمدح قدامهم ونها ليالي حمراء. بدون ازعاج بزران
ومن هالكلام
زيادة انه مدلعها ويخليها تجي وتروح على كيفها
حتى السفر تجي تسافر له بدون محرم في الطيارة
وزوجته الاولى ياعمري لو قالت بروح منا والامنا من دونه كان وراها الشغل
والله اني صرت اخاف ان زوجي يقعد معه
لانه يجلس يشرشح في السعوديات
ويحبب لهم زواج المسفار او المسيار من اجنبيات


عاد انا فكرت اني اعلم زوجته
انا صراحه ما اعرفها ولاعمري التقيت بها
لكن اخته مديرة مدرسة اقدر اوصل لها لاني سبق التقيت بها
واعرف بيت صديق زوجي
انا فكرت اني اخذ رقم زوجته من اخته وارسل لها رساله من جوال مو معروف انبهها
عشان اخرب جوه حسبي الله عليه وعشان يدرون عنه اقاربه وزوجته وعياله
وامي تقول يابنيتي ماعليك منهم الله كفيله بيفضحه يوم
لان اللي يسويه مايرضي الله ولارسوله
زواج بنية الطلاق
وزياده انه ما اشهر الزواج مخليه سر مايعرفه الا اثنين او ثلاثه من اصدقاه



وش رايكم

اعلمها والا ما اعلمها

والله اني محتاره
وراحمة زوجته الاولى
لانه مدلع هاللي مايروح لها الا يومين في الشهر ومكرمها بالفلوس
وزوجته الاولى يقول منيب معطيها فلوس يكفي اني مسكنها وموكلها ببلاش
اه اه الله حسيبه كل هذا عشان لذة يومين


ردوا علي لاني باخذ برأي الاغلبية




-----------

رد للي يقولون انتي بتخربين بيتهم
يابنات انا مقصدي اني اعلم عليه زوجته
عشان يوقف هالمهزله اللي شبها بين الرجال
يعني راح اعلم زوجته عشان يوقف عند حده
وماتكون مخدوعه فيه
لانه وباء في المجتمع
ولايخرب اللي حوله وحواليه ويزهدهم في زوجاتهم وهذا الزواج حرمه اغلب المشايخ الكبار
يعني راح يكون نهي عن منكر



--------------
الان رأيي الاغلبية اني اسكت
واتركه لربي هو اللي راح يحاسبه
واناما راح ازعل من احد
لكن ما ارضى ان احد يشكك في نيتي
انا جيت ابغى المشورة
مو تهاجمون
وتتهموني في نيتي انهاماهي صافيه
او اني خرابة بيوت
لو انها مو صافيه او خرابة بيوت ما استشرتكم
ورحت لبيتها وعلمتها بكل شي انتقاما لزوجها
لكن قلت بشاوركم
وانا ما اسامح اللي تشكك فيني