عرفت نوع الجنين مع زوجي

من يومين كنت مسافره انا وزوجي للشرقيه فطلعت البحر انا واياه وقعدنا نسولف عن نوع الجنين ومن هالسوالف فقررنا نروح نشوف بعد ان حلفته بالله ما يقول لأحد من طرفه عن النوع لاني اعرف العيون علي انا وش بجيب
ورحت المركز وكشفنا وقالت لي الدكتوره عن النوع انا اناظره حسيت بفرحته قلت فرحان عشان عرفت قال لا مو هذا السبب بس لما شفته يتحرك الجنين حن قلبي عليه وحسيت انتي وش كثر تتعبي وانتي تتحملي الحركه وثقل البيبي سبحان الله
المهم عندي مو نوع الجنين الحين لاني بقوله لكم اذا ولدت بإذن الله لانه انا بعد حلفني ما اقول لأحد وانتو يا حبايبي شملكم الحلف
المهم عندي اني حسيته متغير 180 درجه من جا معي وانا كنت معارضه دخوله الغرفه لكن وعسى ان تكرهوا شي وهو خير لكم
من اول حملي مع انه انا وهو ما كنا نبي هالحمل بس كان حريص علي من الشيل والحط الحين صار حتى الزعل ما يبيني ازعل وانا صرت عصبيه مره وزوجي اصلا حساس و عصبي ما تتخيلون يتحملني بشكل غريب ويحاول يهديني ويلبي طلباتي
عشا كذا انصح كل وحده منكم تخلي زوجها يجي يشوف البيبي معك وكيف انتي تتحملي وتتعبي عشان تجيب له طفل
الله يقوم كل وحده بالسلامه ويرزقها باللي تتمنى