.. السلام عليكم ورحمة الله وبركاته ..
كلنا عارفين ان الزواج مو سالفه طبخ وتنظيف وكرف
الزواج أسمى من كل هالأمور ، الزواج رباط محبه وألفه ورحمة بين شخصين
لكن هالأمور ما فيه بد منها :42:
بعد شهر العسل العروس تتلبك وتصير موب عارفه كيف تبدأ ومن وين تبدأ ووش الأدوات ،
هذي شويه خربشات يمكن تفيد العرايس خصوصا إن كثير من عروساتنا الحلوات بيستقبلون شهر رمضان ،
أول شي الطبخ:
أهم شي في الطبخ إني أخزن عندي كشنة في الفريزر في علب أو أكياس زي ما تحبين بس تكون الكشنة عباره عن زيت و بصل و طماط بدون ملح وبهارات عشان تناسب جميع الطبخات ،
الحكمه من توفير الكشنة بالفريز
*إني أكسب وقت
*أكيد تعرفون ان تكشين البصل يسوي ريحه موب زينه يعني لما تفرزنين الكشنه ما راح تحتاجين تتروشين بعد كل طبخه
وصدقوني ما يفرق بالطعم أبدا اذا كان مفرزن والا لا
ونصيحه لا يدرون رجالكم عن هالحركه لأنهم أحيانا يتفلسفون مسوين فاهمين يبون كل شي يصلّح من غير فرزنه
المهم
الكشنه طبعا معروفه بس بالاعاده افاده
(معليش بحاول ادقق بالمقادير لاني أعرف ان المبتدئين يحبون التدقيق )
ملعقه زيت
حبة بصل
حبة طماط
البصل مع الزيت يكشن لين يذوب شوي
وبعدها تحطين الطماط وتكشنينه وخلصنا
عاد هذي كميه شويه اذا بتفرزنين دبليها
شربه الكويكر (رمضان):
الكشنه اللي سويتيها اطحنيها بالطاحونه (ليش: عشان ما يصير البصل قطع وانتي تشربين من الشوربه- أنا أفرزن كشنه مطحونه وكشنه موب مطحونه يعني عشان تصير جاهزه سواء للرز أو للشربه )
7 ملاعق أكل كويكر
ربع ملعقة أكل ملح خشن لو ما عندك الا ناعم حطي قبل ما تنجض وذوقي
حبة ماجي
شوي فلفل أسود تقريبا ربع ملعقه صغيره (هو حسب الرغبه اول مره قللي بعدين زيدي شوي شوي لين تحسين انه هذا اللي تحبينه ولا تسوين فاهمه وتكثرين!)
حبتين ليمون أسود
شوي صلصه للون خليه اخر شي بعد ما تغلي الشوربه
وقطع دجاج صغيره (أريح لك خوذي من صحون صدور الدجاج الفيليه وخوذي صدر واحد وقطعيه اربع قطع وحطيهم)
وبس ،، سهله صح
المقادير هذي كلها كبيها مع بعض وانتبهي كل شوي حركي الشربه لأن الكويكر يلزق بالقدر ويحترق
يبيلها نص ساعه او أقل وتخلص
رز ودجاج :
كأس رز
كشنه (حبة بصل وحبه طماط )
نصف ملعقة أكل ملح خشن
نصف ملعقة صغيره بهارات
اقل من ربع ملعقة كمون
حبة ماجي
حبتين هيل
عودين قرفه
ربع دجاجه
مويه مغلية تغطي الدجاج
حطي كل المقادير بالقدر ما عدا الرز
خليه يطبخ بنار متوسطه من 30 الى 45 دقيقه
واذا خلص شيلي الدجاجه وحطيها بصينيه تحت شغلي عليها من تحت بس واخر شي من فوق
اذا حابه تحطين ليمون وصلصه وملح على الدجاجه براحتك
أنا ما اناظر الساعه بس أشوف حوايف الدجاج اذا بدا يغمق لونها أشغل فوق وأقعد عنده لأنه ما يطول بسرعه يخلص اللي فوق
اغسلي الرز وخليه ينقع بمويه من البزبوز نص ساعه
بعد ما تطلعين الدجاج من القدر
صبي من المويه حقت الدجاج في طاسه عشان لما تكبين الرز ما تصير المويه كثيره تصيرين تزيدين من هالمويه اللي بالطاسه لين تغطي الرز
وخليه عاد يطبخ
أذا تبينه كبسه نفس الطريقه بس لا تطلعين الدجاج طبعا خخ
المكرونه:
نفس سالفه الرز بالضبط بس زيدي حبة ليمون أسود
معجون طماط اذا جيتي تكبين المرونه عشان اللون شوي يعني عصرة أو عصرتين صغنونات
حشوة السمبوسه أو معجنات أو أي شي :
كشنه (كثري شوي يعني حبتين بصل ، حبتين طماط )
نصف صحن لحم مفروم
نصف ملعقه أكل ملح خشن
2 ملعقة صغيره بهارات
نصف ملعقه صغيره فلفل أسود
ربع ملعقة صغيره كمون
طبعا الكشنه أول شي بعدها كبي اللحم وخليه يطبخ على نار هااادية خمس دقايق بعدين ضيفي باقي المقادير
وخلية يطبخ يمكن 20 دقيقه
اذا حابه تحطين شوي جرز حطي واذا حابة بعد شوي بقدونس أو كزبره حطي بس لا تطبخينها كثير دقيقتين تكفي (ضيفيها أخر شي )
هالحشوه تنفع للمنتو للمكرونه بالباشاميل للسمبوسه للمصقعه أييي شي
الحلا برمضان خوذي لك شرايح سمبوسه اذا عندكم وجبن كيري وسوي أصابع الجبن
أريح شي وأطعم شي
قسمي الشريحه ثلاث أقسام أو قسمين
صلحي دقيق مع شوي مويه للحوايف عشان ما يدخل الزيت للجبن
بعدين حطي الجبن قطعه صغيره على الشريحه وحطي على الجوانب خلطه الطحينة و لفي
صلحي لك شيره:
اللي هي كأسين سكر
كأس موية
وخليه يطبخ على النار
اذا برد صبيه بعلبه و على الثلاجه
بالنسبه لتنضيف البيت يا حلوات
كيف تنضفون ؟
أول شي تنضيف المطبخ :
الطاولات والمجلي والفرن افركوهم بليفه وصابون فيري وامسحوهم بفوطه
بعدها نروح للحمامات
خذو معاكم مكنسه لفرك الأرض
طاسه صغيره فيها سفنجه وليفه وصابون اريل لفرك المغسله والبانيو والافرنجي
وفوطه وبخاخ قزاز لمسح المرايا
بعدها نكنس البيت كله السراميك والفرش بالمكنسه الكهربائيه
وبعدين نمسح الأرضيات السراميك بالمساحه واذا ما عندك بالفوطه حطي فيها مويه ومعقم ارضيات
اذا عندك طاولات او مرايا مسحيها وخلصناااا
وطبعا بعد ما أنضف البيت أكون طول الأسبوع أحاول اخلي البيت نضيف مثلا أكنس مكان قعدتنا اذا توصخ
أرتب الفراش بعد ما أقوم من النوم
أرجع أي شي مكانه
اذا توسخت المغسله انضفها سريع سريع وهكذا
غسل الملابس :
الأبيض لحاله
والأسود لحاله
والملون لحاله ما عدا اللي الوانها غامقه مره اللي تخافين تطلع لون خليها لحالها أو اغسليها بيدك
ملابس النوم التل والحراير غسليها بيدك أضمن وبعضها يبيلها غسيل بخار
أنا استخذم اريل سواء للملون والا الابيض الأبيض أكثر منه والملون احط شوي عشان ما تشهب
الأسود طبعا شامبو عبايات أو شامبو حق الشعر عادي أوصابون سايل اللي عندك أهم شي مو اريل عشان ما يشهب
الكوي ما يبيله شي :
بس حطي في بالك التل حطي فوقه قماش وانتي تكوينه عشان ما يحترق والحراير اقلبيها
وبــس ..