عروسه ومجرووووحه !!

السلام عليكم ورحمة الله

اخواتي انا عضوه جديده لكن من اكثر المتابعات لهذا المنتدى الرائع واعجبني نصحكم من قلب وتعاملكم مع بعض كأخوات وخوفكم على بعض

راح احط موضوعي لكم لثقتي فيكم بعد الله واتمنى الاقي عندكم الحل لمشكلتي

انا متزوجه من فترة بسيطه ماتتجاوز ال5 شهور .. بيني وبين زوجي فرق كبير بالعمر وبالتفكير وهنا المشكله

زوجي تزوج بسن كبير تقريبا 40 سنه وطول عمره اللي فات عايش مع اهله فهو ملتصق فيهم التصاق عجيب احيان يمر يوم كامل مايشوفني ابد بحكم عمله ومايهمه اهم شي عنده اهله

انا ساكنه مع اهله بنفس البيت هو طول اليوم يابالدوام ياعندهم حتى مايعطيني فرصه اجلس اسولف معه تحركاتنا روحاتنا حتى تفاصيل يومي عند اهله مستحيل اسوي شي بحياتي مهما كان خاص اهله مايدرون عنه

حتى لو فكر يوم يقعد معي وربي اهله مايخلونه باتصالاتهم وينك ماجيت وينك تعال !! والمشكله مايبيني اجي معه والا انزل لهم اذا قلت له يقول لا مره وحده بالشهر كفايه انك تنزلين تسلمين عليهم وكل اسبوع مره تكلمينهم وبس غير كذا لا !!!

وللاسف ماهي بس هذه مشكلتي معاه في كثير امور موترتني منها مطالبته بالخصوصية الزايده بحياتي معه مايرضى اسئله مين تكلم والا مين اتصل بك والا وين رايح ينجن لو اسئله يقول لي مالك دخل هذا شي خاص فيني انا ماراح اسألك مين تكلمين وانتي لا تفكرين بيوم تسأليني لاني ماراح ارد !!

كل شي بحياتي معه يعتبر خط احمر وخاص فيه ويرفض حتى مجرد النقاش فيه طبعا غير التصرفات المريبه اللي تبكيني بدل الدموع دم جواله اللي من يدخل الشقه حوله موجود رسايله وسجل مكالماته اللي يمسحه اول بأول طلعاته المريبه اللي مايرجع البيت الا الساعه 2 بالليل حتى ايام الدوامات وهو ماعنده اصدقا عشان اقول يمكن راح لهم !!!

انا بديت انهار لاني من جد مو عارفه وش اسوي اذا تكلمت والا علقت صارت مشكله كبيره وانا تعبت من المشاكل وربي من تزوجت وانا وهو شبه يوميا مشاكل وزعل والله مايمر يومين بدون ماتصير هوشه وطبعا كلمته الدائمه انا مااقدر استمر معك مازلت معطيك فرصه لكن الزواج تجربه وانا اخذت تجربتي وماني مقتنع فيها !!!


ياناس قولوا لي وش اسوي وربي تعبت صرت اشوف المر واسكت عشان ماتكبر وتصير مشاكل لكن احس اني اضغط على نفسي لاني اشوف حقوقي تسلب مني قدام عيني وانا ساكته مو قادره انطق احس يوم بتجيني جلطه والا مصيبه من كثر مااكتم واذا نطقت حرف واحد صارت مشكله كبيره وسمعت كلام جارح

بالله من وين الاقيها من اهله اللي مايفكون عنه ولا يفك عنهم والا من الخصوصيه الزايده والخطوط الحمرا اللي يفرضها علي بيني وبينه والا من تصرفاته المريبه والشك اللي متعبني والا من سكوتي والا من ايش والا ايش

الله يسعدكم ويفرج همومكم اللي عندها حل تشور به علي لعل الله يجعل به المخرج لي واللي ماعندها يكفيني منها دعوة بظهر الغيب بتفريج همي وان الله يسخر لي زوجي