عروس الجحيم الجزء 3 والاخير(قصة حقيقية)

عروس الجحيم الجزء الثالث والاخير


( ملاحظة الي سئل اذا القصة خيال او حقيقة ؟ انا سئلت الي بعتلي ياها هو ابن عمي قال انو القصة حقيقية لرفيق رفيقه بالشام لهلأ عم يعاني ماضل شيخ ما راح لعنده وهو ع حاله طبعا حابس حالو بالغرفة ومابيطلع ابوه اجته سكتة قلبية من المناظر الي بشوف فيها ابنه وهو كتب قصته لتوصل لكل مكان والكل ياخد عبرة ) والله على ما اقول شهيد 👍
.....................
صرت اسمع صوت ضحكه بالغرفه !!!! تطلعت حوليي مافي شي معقول من برا !!! رجعت سمعت صوت ضحكات عم يقرب من ادني اكتر ؛ نطفا ضو الغرفه و تحولت القطه لقمر الزمان ... قالتلي : ليش خايف الخوف بدك تمحيه من راسك بقا ؛ اكيد قرات طلباتي كلها ؛ حقق شروطي الطلبتها لكون الك جيب كل شي طلبتو وانطر اشاره مني . قلتلها : بس انا منين بد... ؛ بهي اللحظه دخلت ماما لعندي عالغرفه .....
بهي اللحظه دخلت ماما لعندي عالغرفه .... قالتلي :مع مين عم تحكي و ليش قاعد عالعتمه !!! .... تطلعت حوليي قمر الزمان اختفت ... قلتلها : كنت عم ... اي كنت عم ادرس بصوت عالي ماعم حاكي حدا و هلا طفيت الضو قلت لريح شوي و اتسطح ... بهي اللحظه حسيت ماما نظراتها الي غريبه و كانها ماصدقتني او يمكن انا تهيألي انها ما صدقتني لان عرفان حالي عم اعمل شي لو عرفت فيه رح تجن عالخالص ... مضى الليل و من طلوع الصبح نزلت عالسوق جبت الغراض المطلوبه و ضل البخور الهندي ... رحت على البزورية وهي بقا منطقه عنا ببيعوا فيها بخور وكل انواع المسك و كل شي بيخطر بببالكم من هالقصص واكيد هنيك بلاقي طلبي ... دورت بكل المحلات والجواب كان واحد اللي هو : ( هاد بخور غالي كتيرررر وما في منه الا توصاية وحتى توصايه بدك تستنى فتره ليوصل ) سالت يعني قديش غالي ؛ قالولي : هاد الغرام منه ب١٠٠٠٠وانت بدك اقل شي ٥ غرامات يعني ٥٠٠٠٠ عندك استعداد تدفع هل المبلغ ؟؟؟ ... معقول !!! هاد مبلغ كبير وانا مافيي امنو !!!! بس فكرت بيني وبين حالي وقلت خلص لازم لاقي طريقه جيب المصاري و لازم لأعرف شو نهاية قصتي ... وافقت و قلتلهم بدي ٥ غرامات قالولي طيب هات دفعة لنوصيلك عليه اجيت بدي ادفع رعبون ... اجا شب و قلي باخر الشارع في محل صاحبه ختيار انا متاكد رح تلاقي طلبك عنده .... قررت روح شوف هالمحل اول ومشيت لوصلت على المحل ....لقيت رجال كبير بالعمر عمره بيجي ٨٠ سنة التجاعيد ماليه وجهو وضهره محني ... قربت لعنده وقلتلو : السلام عليكم عمو ؛ دلوني عليك انه بلاقي بخور هندي عندك .... فجاه كان هادي و نأز قلي : شو بدك فيه ؟؟ بدك تستحضر بنت من بنات الجان !!!! ؛ انا هون انصدمت !! وتبلكمت ... قلتله : عرفت كيف !!! قلي : هالبخور اللي طالبه ما بيستخدم الا لتحضير بنت من بنات الجان يا ابني انا مارق على راسي من هل الشي كتير بس نصيحتي الك لا تحاول لان اي غلطة بتعملها رح ياذوك ... قلتله : معلش عمو لو سمحت اذا عندك قلي وانا بكرا بجيب المصاري وبجي باخدهم ... تطلع فيي وصفن قلي : انا نصحتك ومافيي اجبرك انت حابب تجرب و ماحدا رح يقدر يقنعك تبعد عن هالشي متل كتار قبلك أنت حر ؛ بكرا تعا لعندي الساعة ١٠ الصبح وبيكونوا جاهزين ...
رجعت من السوق .... و حاولت فوت عالبيت على مهل حتى ماحدا يحس عليي و يشوف اني ماسك غراض غريبه لا بستخدمها بمجال دراستي ولا الي اي شغل فيها ...
صرت فكر كيف بدي امن المبلغ من اهلي ولقيت الطريقه ... كوني انا طالب هندسه مدنيه و تخرج هالسنه ... تحججت بمشروع التخرج و قلت لاهلي محتاج 50 الف لان هيك رح يكلفني و فعلا بابا عطاني المصاري من دون حتى اي سؤال ...
و تاني يوم فقت بكير لبست و رحت لجيب البخور ....
لقيت الختيار فاتح وناطرني مع انه كان داير ضهره بس لما وصلت فورا قلي : اجيت بوقتك برافو انت كتير مستعجل ؛ بس صدقني رح يجي يوم وتندم ؛ قلتله : كيف عرفت اني وصلت وكيف عرفت انا بشو عم فكر وليش بدي أندم !!! ... تنهد تنهيده و قلي : يا حيف على شبابك عندك وقت ؟!!! قلتله : عندي ...قلي تعا معي وطلع من خزانه عندو مجموعه كتب بس هالكتب كانت كلها عن الجان ... قلي : هي كرسي جره وتعا قعود لاحكيلك ... قعدت وبلش يحكي قلي : بكره احكي بالقصه هي بس رح احكي مشانك مع اني بعرف مارح تقتنع و رح تضل مصر على رايك ... من لما كان عمري 18 سنه حبتني بنت من بنات الجان وصارت تلاحقني وتبعتلي إشارات ومرة كانت تظهرلي ومرة كانت تنزلني لعالمها كانت آية بالجمال وانا ضعفت لان حبيتها ووافقت أتزوجها وكونه والدي كان صاحب هالمصلحه تبعي بالمحل هاد ... امنت البخور الهندي ...و قعدت بغرفتي و ساويت الطقوس وكل شي انطلب مني و انا عم حط البخور ... لقيتها جاية من بعيد عم تتمايل وجمالها بهرني وكان الخدم حوليها يلي حامل الشاحط تبع فستانها ويلي عم يهويلها وبس بدهم منها إشارة ليحملوها من على الارض ووصلت على عتبة غرفتي ودخلت وصرت الها وصارت الي كان ما حدى يشوفها غيري وكنا نقضي اغلب أوقاتنا سوا وبعد فترة خبرتني انه هي حامل مني انا انبسطت وطار عقلي وبعد ٩ شهور لما صار موعد الولادة اختفت وتركتني لحالي وبعد فترة اجت لعندي ومعها أبنها بس كانت عم تبكي وقالتلي اجيت ودعك وهي اخر مرة رح تشوفنا ومن وقتها ما عاد شفتها بس لانها بتحبني حرمت عليي كل نسوان العالم وانحرمت كون زوج وأب . فنصيحة مني لا تعمل شي تندم عليه طول العمر ..... بس انا كان في شي جواتي بدو ياني كمل بهل الشي قلتله معلش عمو خليني جرب وانا بتحمل نتيجة اختياري ... قلي عمو انت حر انا حبيت انصحك لحتى ما تعيش الندم يلي صرلي عم عيشه ٦٢ سنة عطاني البخور وحملت حالي و رجعت على البيت وكنت ناطر تجي تقلي ايمتى لازم بلش لان كل شي لازم يكون الو وقته وطقوسه مر حوالي شهر وهي ما ظهرت ولما صار القمر بدر شفتها وقالتلي صار الموعد بكرة بنص الليل بتقعد بغرفة معتمة بس بتشعل شمعتين وبتحط الفحم بالمنقل وبتبلش تحط البخور شوي شوي وانت عم تقرا الطلاسم يلي عطيتك ياها وراحت وتاني يوم نطرت نص الليل بفارغ الصبر وما صدقت ايمتى ناموا اهلي وحضرت الفحم وكل الطقوس وفتت لغرفتي وبلشت حط بخور واقرا الطلاسم وبينت علي من بعيد متل القمر ... لا احلى جمالها فتان بيبهر العيون وحواليها الخدم متل ما وصفلي الرجال الختيار وقمر الزمان كل مالها عم تقرب مني
وقبل ما تحط رجلها بغرفتي خلص البخور وفجاة اختفت ولقيت تنين متل الوحوش قالولي انت ارتكبت اكبر غلطة بحق بنت ملكنا وصار لازم نعاقبك ومسكوا المنقل ورموا الفحم يلي فيه علي وانا من الوجع غميت وفقت وانا بالمشفى عم عاني من حروق خطيرة بكل جسمي وبقيت بالمشفى ١٥ يوم لحتى تحسنت وأهلي كانوا عم يسألوني كيف هيك صار معك ما قدرت قلهم ولا اشرحلهم طلعت من المشفى بعد ما تحسنت الحروق بس كان في كتير تشوهات بجسمي ومحتاج لكم عملية تجميل ليروحوا .... و لسا ماتحسنت فتت لاتحمم عبيت البانيو مي سخنة وقعدت فيه وغمضت عيوني لاسترخي شوي حسيت بوهج نار قرب من وشي فتحت عيوني لقيت ختيارة شكلها بيرعب عيونها حمر متل الدم وشعرها ابيض منكوش والتجاعيد مالية وجها و اضافرها طوال ومبوزين مسكتني من راسي وصارت تغطسني بالبانيو كنت على شوي رح اختنق وقالتلي رح تبكي دم و تندم طول عمرك ... انا جنيت وقلت ليش هيك لايمتى بدي عاني من غلطة ما كنت قاصدها انا تعبت ....خطر ببالي الرجال الختيار وقلت بما انه عنده خبرة بهل المواضيع لازم روح لعنده واساله ليش هيك صار معي وفعلاً رحت لعنده ولما شافني قلي ليش هيك صاير فيك احكيلي حكيتله كل القصة بعد ما صفن فيني شوي قلي لان البخور خلص قبل ما تفوت لغرفتك وهي إهانة كبيرة بحق بنت الملك لهيك حرقوك .... انا نصحتك بس انت حبيت تجرب .... الله يعينك و يكون معك .... قلتله و هلا شوي اعمل شو بدي ساوي ؛ سكت و بعدها قلي : ماعندي اي فكره ... التزم بصلاتك واقرا قران ... و استغفر ربك بالكي بيغفرلك ... الله يكون بعونك ...
طلعت من عندو واول ما وصلت عالبيت ؛ تسطحت من تعبي و غفيت ... شفت قمر الزمان عم تتفتل بغرفتي حاولت اشرحلها بس كان ماعم يطلع صوتي ... تطلعت فيي و قالتلي : من اليوم انت ملعون يقرب منك جنس انسيه و فجاه وجه قمر الزمان تحول لوجه اسود بشع عيونه زرق و شعرها الطويل تحول لافاعي عم تطلع من راسها ... فتحت عيوني لقيت قمر الزمان بوجهها المخيف عم يقرب مني صرت عيط و صرخ بشكل هستيري قلها : بعدي عني و حاول اقتلها باي شي حوليي .... لحد ماحدا ثبتلي ايديي من ورا .... كان بابا و عم يعيط ويقلي : شبك ليش هيك عم تتصرف مع امك ... تطلعت لقيت ماما قاعده بالارض عم تبكي ... صار بابا يقرالي قران و انا جمدان ماعم يطلع معي الحكي ... معقول من كتر تفكيري فيها بلش يتهيألي !!! بس القصه ما وقفت هون الحادثه هي تكررت معي مو بس مع امي كون قاعد مع جيراننا شوف وجه قمر الزمان المخيف بدل وجه جارتنا و يبلش الصريخ و العياط بجنون مني وحاول اني اقتلها و مره اجا سامر و رامي و رايه رفقاتي بالجامعه ليشقوا عليي كوني ماعاد قدرت انزل عالكليه فجاه شوف وجه قمر الزمان برايه ... الناس صارت تقول عليي مجنون و اهلي حاولوا فيي بشيوخ واطباء نفسيين و ماخلوا طريقه .... مافي اي فايده ... ماما من زعلها عليي اجتلها جلطه و توفت ... و بابا صار انسان زهيد عايش بس مشاني ... هه مشان ابنو المجنون .... و انا قاعد بهي الغرفه لحالي طول نهاري مابقدر شوف حدا و لا بدي حدا يشوفني ....
ندمان بس ماعاد يفيد الندم كانت هي قصتي كتبتلك ياها لا زودت حرف ولا نقصت كتبتها لاني حابب احكي اللي جواتي لحدا مع اني بعرف انو كتير ناس رح تقول عليي مجنون .... دعولي الله يغفرلي ويسامحني عالشي اللي عملتو بالكي برتاح و بموت و بقدر شوف امي ....
النهايه ...