السلام عليكم ورحمة الله وبركاته ... اخواتي الحبيبات ضاقت علي الدنيا بما رحبت ... وربي وحده معي ثم انتن يااخواتي الكريمات .... نخيتكن الفزعه ومانخيت رخوم .....
ابي مشورة صادقه ... ورأي سديد ... ودعوة صادقه .... ورأي رزين ...
والله خانقتني العبره ... واحيانا دموعي على خدي اشاهق مثل البزران ....
انا بقولكم السالفه تكفون اعتبروني اختكم الصغيره .... واللي تقدر تعتبرني بنتها تعتبرني بنتها وتعطيني رأي الأم السديد لإبنتها ....
أنا يااخوات ... فتاة محافظة ولله الحمد وماازكي نفسي متدينة قليلا ودايما اتمنى شاب يرتبط فيني يكون على قدر من الاخلاق والدين ...ابيه يعيني على الطاعه .... وانا والله (كنت قنوعه)... ماابي موظف مرموق او يكون راتبه عالي اهم شئ دين واخلاق وسكن مستقل وتتوفر اسباب الحياة الكريمة .... لكن الان يوم انخطبت وانحطيت امام الامر الواقع بدأ الخوف والتردد يعتريني وبدأت القناعه تتلاشى تدريجيا ....
وانا يااخواتي ابي بيت مستقل مو لاني ماابي اهل زوجي لا والله راح اعتبرهم مثل اهلي واغلى بعد ...
وام زوجي بحبها واحترمها مثل امي تماما ... لكني كعروس جديده ابي اعيش بحرية واستقلاليه ...
وكثير اللي عايشين مع حمولتهن بنفس البيت فيه مشاكل ... بالذات اذا كان المطبخ مشترك فالحريم الله يهديهن يتهاوشون على المطبخ والطبخ وغسيل المواعين :angry:وشغل البيت ومااحد منا ينكر المشاكل الصايره بالبيوت بين حريم العيال واخوات الزوج بخصوص شغل البيت .....( الا من رحم ربي ...) .. انا مااعمم هالشئ لكن اشوف كثير كذا ... بالمقابل ارى جوانب مضيئة وفيه حريم ساكنين مع حمولتهن وعايشين مرتاحات لكني شخصيا لا ارغب بالسكن مع الحموله ... ومااحد ينكر المشاعر السلبيه اللي تتولد عند الزوجه اللي بتعيش مع اهل زوجها ... من مضايقه احيانا وماتاخذ راحتها لا بلبس ولا بدلع مع زوجها ولا تتغدى معه براحه ولا تتعشى معه براحه ...لكن انا مااعرف الناس اللي بعيش معهم وماابي اظلمهم او احكم عليهم من الحين ....
لكن احتمال يقدروني واحتمال واخاف يكرفوني ويطلعون ريحتي ..... وانا ابي اتزوج عشان اعيش باستقلالية مع زوجي وشريك عمري ... مع استمرار الاحترام لاهل زوجي اللي بحطهم على راسي ...
زبدة الموضوع بعد هالمقدمة الطلالية ... اني حاليا ماشاء الله تبارك الرحمن مخطوبه من شاب اتمناه واتمنى صفاته ولاازكيه على الله ... لكنه بيسكني ان شاء الله
(بجناح مستقل مع مطبخ) ببيت اهله .. وبصراحه انا كنت اتمنى شقه
بالاضافه ان راتبه جدا قليل جدا جدا ... الفين ريال بالشهر !!!!!!! الفين ريال وش تسوي الحين ؟؟؟ كل الدنيا غلا بغلا .... وانا بصراحه بنت مدلعه ببيت اهلي كل شئ الحمدلله متوفر لي فدخل اهلي الشهري مرتفع جدا ولله الحمد والمنه ....يعني ولله الحمد لو اطلب اي شئ جاني ولله الحمد ... ذهب الماس كل شئ متوفر لي ... وانا مااقول كذا اتفاخر عليكم او اكسر نفوس المحرومات او اشوف نفسي واعلمكم وش عندي !!! لا والله انا مااعرفكم ولاتعرفوني عشان اتفاخر عندكم ..وربي يشهد على نيتي اني ابي المشورة الصادقه من بنات حواء الكريمات ...و ابي افضفض لكم واقول كل حيثيات الموضوع وكل جوانب الحكايه عشان تعطوني راي سديد ومشورة سليمة ....
فانا فستان العيد اشتريه بمبلغ لايقل عن 500 ريال ... فساتين الافراح اشتريها بمبلغ وقدره ... عطورات ماركات بمبالغ وعود ودهن عود الاصلي أشتريها بمبالغ ... غير الشناط والكماليات .... بليز اخواتي تصرفي هذا مو تبذير ولا اسراف لان الحمدلله ربي معطينا ومؤدين حقوق الفقراء ولله الحمد ولا نزكي انفسنا ....
قال تعالى (واما بنعمة ربك فحدث )...سورة الضحى الاية 11
اللي راح تقول لي ان تصرفي تبذير واسراف اتمنى ولاعليها امر فضلا وتكرما لا امرا
ترجع لتفسير ابن كثير او تفسير السعدي وتقرأ تفسير الايه الكريمة قبل ماتكتب اي رد ..
يعني انا دلوعه اهلي ومتعوده كل شئ ابيه يجيني من صغري من يومي طفله بالاضافه اني ابي الاستقلاليه وابي اكون مرتاحه مع زوجي :arb:في سكن مستقل .... لكن الحين خطيبي راتبه الفين وجناح مستقل !!! راح تتغير الحياة علي ... بتتغير بشكل جذري ... انا مااقول ابي اتزوج شاب غني وراتبه فوق لا بالعكس لكن على الاقل راتبه خمس الاف او بهالحدود .....انا استخرت واحس براحه كبيره لهالشاب ورغبه بالارتباط فيه لكن هذا زواج وحياة عمر لازم اني ادرس الموضوع من كافة الجوانب عشان ننجح بحياتنا ان شاء الله وعشان ماانكد عليه وعشان مايضيق علي بعيشتي ... وبصراحه الراتب والسكن مو سبب مقنع لرفض الشاب ... لكني خايفه من بعدين وش راح تكون حياتي ؟؟؟ احيانا اقول توكلي على الله وربي بيرزقه بعد الزواج .... واحيانا اخاف لاني اعرف بنات تزوجوا شباب رواتبهم قليله ومتعذبات واسباب الحياة الكريمة مو متوفره لهم ....
واحيانا يلعب علي الشيطان واقعد اهوجس اقول فلانه كبري متزوجه مهندس وعايشه برفاهيه وفلانه كبري متزوجه ضابط ومدلعها ... واهوجس كذا مو من باب الحسد لا والله من باب الغبطه اني ابي لهم ولي الخير والله يرزقني ويرزق مني واتمنى يكون زوجي عنده اسباب الحياة الكريمة .... واتوقع اغلب البنات اذا انخطبت تفكر بالهواجيس السلبيه لان الشيطان يلعب علينا الله يعيذنا ويعيذكم منه ....
لكني سرعان مااتعوذ من الشيطان ومتيقنه انه نصيب والنصيب حيصيب وانه مكتوب لي مصيري وانا في بطن امي ......مدري وش السوات ؟؟؟؟
اخواتي لهذا الحد عطيتكم كل جوانب الموضوع ... اللي عندها مشورة سليمة ورأي سديد وكلام يبرد القلب تتفضل تقوله ولها دعواتي بالفرج والسداد بحياتها وهي وكلامها على عيني وعلى راسي ....ولها الاجر من الله ان شاء الله ...
واللي عندها رد لايروق لي تتفضل تقوله بعد فالمنتدى للجميع ...
لكن اعلموا اني متعذبه وبين نارين ابي الشاب والستر واخاف من الماديه والمستقبل لكن ربي كريم ورحيم ويرزقنا من فضله ... وضايقه علي الدنيا وتعبانه ومتضايقه والهالات السوداء حول عيني من قل النوم ...
يعين الله يعين الله :44:... بانتظار ردودكم تكفون يابنات حواء .... ع 22 ...(اسفه على الاطاله)
طفلتي أحلى العرايس @tflty_ahl_alaarays
عضوة جديدة
يلزم عليك تسجيل الدخول أولًا لكتابة تعليق.
amal_a
•
استخيري وبما انه انسان طيب وماله خرابيط ومحافظ على الصلاه ان شاء الله يكون كويس
أمال ... ودانيه شكرا حبيباتي لكن فائق الاحترام والتقدير ....مس توت انتظر عودتك ....
ياقلبي ياسوسو أنا عارفه فيه ناس كثير عايشين مع حمولاتهم بدون مشاكل ,,,وفيه ناس عايشين بمشاكل ...
لكن رغبتي الشخصيه ماابي اعيش معهم لاني حساسه ماابي احد يضايقني وماابي اضايق احد .....وابي اعيش باستقلاليه ولي مطبخي الخاااااص ..
وكل انسان يختلف عن غيره بقدرة تحمله وتختلف الرغبات الشخصيه بين كل شخص واخر ...
عموما ردك جدا رائع ولك فائق الشكر والتقدير ... وانا متفائله خير برب العالمين ... مشكورة حبيبتي ...
ياقلبي ياسوسو أنا عارفه فيه ناس كثير عايشين مع حمولاتهم بدون مشاكل ,,,وفيه ناس عايشين بمشاكل ...
لكن رغبتي الشخصيه ماابي اعيش معهم لاني حساسه ماابي احد يضايقني وماابي اضايق احد .....وابي اعيش باستقلاليه ولي مطبخي الخاااااص ..
وكل انسان يختلف عن غيره بقدرة تحمله وتختلف الرغبات الشخصيه بين كل شخص واخر ...
عموما ردك جدا رائع ولك فائق الشكر والتقدير ... وانا متفائله خير برب العالمين ... مشكورة حبيبتي ...
amal_a :
استخيري وبما انه انسان طيب وماله خرابيط ومحافظ على الصلاه ان شاء الله يكون كويساستخيري وبما انه انسان طيب وماله خرابيط ومحافظ على الصلاه ان شاء الله يكون كويس
الصفحة الأخيرة