ولا يهمج ما طلبتي شي ان شاء الله اقدر اساعدج وأسهلج الموضوع..

خياييط يكونون ok علشان أبغي أفصل تنانير وقمصان وفساتين ناعمة بدون تطريز:
( سمعي اذا انتي من دبي أقدر افيدج عن الخياييط الي اروحلهم ويخيطون أوكيه يسوولج المغربي والا الهندي والي تبينه)..
1- عندج في البدع دبي.. يوم توصلين لدوار السطوه تدخلين السطوه سيدا وتمي على خط اليمين وامشي سيداااااا.. وعلى آخر الخط بتلقين لفه على ايدينج اليمين لفيها بتحصلين كذا محل خياييط أختاري الي تبينه كلهم أوكيه..
2- عندج في بر دبي (مينابازار) ساليهم عن سكة الخياييط بيدلونج الهنود..

* بالنسبة للصباحية شو ألبس؟؟؟؟
( حطي شي واحد في بالج انج في بيتج ويمكن انج تأخذين راحتج معاه.. لبسي الشي الي هو يعجبه مثلا تنوره وكات- تنوره وقميص ضيق- جلابيه فيها نقشات خفيفه)..
1- تلبسين الالوان الفاتحه..
2- تحطين ميكياج ألوانها فاتحه..
3- وتسريحه هاديه..

*أحسن مرطب للشفايف بطعم الفواكه؟؟
( عندج في الريد أيرث رووووووووعه ومجربتنه.. خذيلج الاحمر بطعم الفراويه والاخضر بالكيوي والبرتقالي بالبرتقال)..

*لشنطة الماكياج من وين أشتريها وكيف شكلها؟؟
( روحي لمحلات المكياج وساليهم عن ميك أب بكس أو ميك آب باغز وبيراوونج اياه هم على أشكال والانواع انتي تختارين الي يناسبج حبذا لو تشترين واحد صغير حق الاشياء الصغيره مثل النيل بولش ومقص الاظافر والقطن والريموفر...الخ وواحد حجمه مب عوود وايد حق الاشياء الاساسيه مثل الارواج والكحل والفاونديشن وهالشغلات.. يعني قايسي الاشياء هل يوم بتحطين هالاشياء بيكفونج والا لا)..

*لمحل الشيل والعباية اللي في عيمان ماقلتي لي وين مكانه؟؟
(اذا تعرفين جمعية ام المؤمنين وانتي ياية من الشارقة روحي سيده وخلي الجمعية على ايدج اليسار بعدين روحي سيده بتشوفين جدامج تقاطع بعدين روحي سيده بتشوفين جدامج مطبة تمي مواصله سيده في سيده الين ماتحصلين جدامك التقاطع الثاني لفي يسار كانج راجعة وروحي سيده بيكون على ايدك اليمين موناليزا روحي سيده بعد الموناليزا اتركي اللفة الاولى بعدين اوصلي اللفة الثانية اوقفي عندها بتشوفين العمارة البيضاء للشيخ حميد انزلي اهناك بتشوفين محلات عبايات اسئلي اي حد فيهم وقوليلهم عن المحل بيدلونك انشالله اكون وصلت المعلومة)..

السلام عليكم ورحمة الله وبركاته ،،،
اسمحو لي بنات على التأخير لأني كنت مشغولة في التجهيز واليوم شفت ردوكم
عزيزتي fofoeyes جزاج الله خير ما قصرتي

الغالية Pink Rose
مشكورة وايد وايد وايد على كل المعلومات
وماشاءالله عليج توصفين عيمان عدل جنج من أهلها ؟؟؟
بس باقي لي الحين شي واحد وين أفصل أو أشتري فستان ليوم الحناء
اللي تعرف لا تبخل علي لأن الوقت يركض وها الشي مب في صالحي

والله يقدرني على رد جمايلكم

أختكم
أم عـــــيون فـــتانــــــــة

الغاليه انا من دبي ههههههههههه بس لاني اتجهز للعرس شراتج..

المهم ليش ما تاخذيلج لبس هندي حق ليلة الحنى.. هاي فكره لاني انا بعد افكر اسوي جيه حق ليلة الحنى.. سيري لمينا بازا في دبي عندهم لبس روعه لليلة الحنى واشياء اتخبل.. يعني حتى محلات الاكسسوارات الهنديه بتحصلينها هناك واتمنى اني فدتج.. وادعيلي ان شاء الله يتحقق الي في بالي يا رب.. لا تنسيني من الدعاء الغاليه.. :06:

pink_rose تسلم ايدج والله يكثر من امثالج يارب ... صراحه لما قريت الموضوع ردج اثلج صدرى حسيت صج الدنيا لحد الحين فيها خير .......... الحمدلله الناس للناس والكل بالله


أم عيون فتانة........ الله يوفقج يارب ويتمم عليج ويسخر زوجج لج ويرزقج الذريه الصالحه انشالله يارب

حبيبتي Pink Rose ماقصرتي ومثل ما قالت الأخت أميرة الأحلام ردج أثلج الصدر
وإنتي مبين عليج إنج انسانة طيبة وحبوبة وايد وتحبين الخير للجميع
الله يوفقج ويسعدج ويحقق كل اللي في بالج 00اللهم آمين

ومشكورة أختي أميرة الأحلام على الدعاء الطيب والله يجازيج بالمثل ان شاء الله

والحين برجع لج Pink Rose
أنا الصراحة ما عرف مينابازار وايد قبل يومين سرت لبعض المحلات بس مب كل
شي عجبني أنا أبغي شي فخم وزين ، إذا تعرفين أسماء المحلات خبريني علشان
تسهلين علي الموضوع ، بس لين الحين ما قلتي لي وين أسوى فستان ليلة الحناء
وإذا حد عنده صور ياليت ينزلهم .

شاكرة لكم تعاونكم

أختكم
أم عيـــــــون فتــــانــــــــة