عروس لي شهرين طالبه الطلاق .. ادخلوا لازم

السلام عليكم ❄️♥️♥️♥️
هذا اول موضوع لي بالمنتدى ، بعد الزواج و بعد ما صرت ست بيت كنت بين فتره و فتره ادخل اقرأ و اطلع
ماتوقعت بيجي يوم ادخل هنا اكتب مشكلتي و طلبي للطلاق ):
انا عمري ٢٠ سنه ادرس جامعه ، خذيت زوجي زواج تقليدي
كانت فترة الملكه ٧ اشهر خلالها مكالمات و زيارات و كل شي تمام يعني و الحمدلله متفقين ( الا نقطة انه مره جاف و عربجي و انا العكس هاديه و بحالي )
كان مواعدني نسافر شهر عسل و مدة الملكه كلها كان يأجل هالموضوع و يتهرب منه و يقول لما نجي سوا بنشوف و نختار قلت اوكِ و سكتت عن هالموضوع
بعد الزواج فجأه انقلب كل شي لجحيم
اكتشفت ان عليه ديون و مايقدر يسافر ( ديون مو ناس لا ديون مخالفات بسبب استهتاره و سرعه و خرابيط ) مو ذنبي يحرمني السفر عشانه مستهتر المفروض كان مضبط وضعه قبل

اكتشفت انه يدخن و علمني ان محد يدري و قال بيحاول يتركه و سكرنا الموضوع .

كل ويكند ينام برا البيت فالبر ااه يا هالبر اففف و انا عند اهلي ( علمني ان هالشي بيكون لمدة العمر كله مافيه امل يتغير هالشي ولا فيه امل يبطل هالعاده )
من اول مايصحى يطلع مايرجع الا الساعه ٣ او ٢ من الليل و انا لحالي بالبيت!

لا اكل ياكل معاي ولا جلسه نفس الناس مافيه بيننا اي موده و اهتمامات مشتركه

اكتشفت انه عصبي مره + مو قد المسؤوليه + مافيه ذرة اهتمام

يخلي السواق يجيب لي اكلي و انا لحالي بالبيت و يخليني انزل افتح له و انا لحالي!

عبايتي غيرها و ملابسي و بدأ يسيطر على اسلوب حياتي و طريقة كلامي لا تقولين ماما و بابا لا تقولين كويس خليك حرمه و و ...

انا مو اول كم مره يطيح جوالي مني بالسياره بالغلط طبعاً ): و مره بديت دوام بالجامعه و طاح خاتمي بالغلط و طلبته يجيبه و عصب انتي مهمله و انك ماتحافظين على اغراضك قلت خلاص لا تجيبه مابيه ( قال الله لا يبيك و اسكتي لا اسمع لك صوت ) نزلني و راح من ١٢ الظهر لما ١ الليل مخليني لحالي بالبيت رجع و صارت مشكله كبيره ( و قلتله انت تخليني و انا ألف واحد يتمناني صغيره و حلوه و جامعيه و انت ماتقدر هالنعمه ) قام قلب الزعل و زعل و جلس يسب والله يلعن الزواج و انتي مو شايفتني شي و انا مو مالي عينك خليته يهدأ و تراضينا بعدين ..

بالسوق اقوله ممكن تشيل اكياسي يقول لك يدين شيليها ، لما مااقوى افك علبة المويه يقول خليك حرمه و فكيهاااا منيب فاك لك شي و يعصب و يصارخ عشان قلتله افتح لي المويه!

كل اوقاتي لحالي و مااستانست ولا حسيت بطعم السفر ولا دلع الزوج ابداً ! كل وقته مع اصحابه و طلعات و جيات و انا مزهريه قدام الناس اني زوجته لا و مُصر عالحمل احملي احملييي بسرعه! كأنه يبي يدبسني معاه
اقوله متى نسافر شهر عسل ( يقول تبين شهر العسل ألحقيه ) لو قلت ممكن نطلع سوا ( افتحي الباب و اطلعي )

متخيلين مدة شهرين ماطلعنا للسوق الا مره وحده و مافيه اي طلعات لا كوفي لا مطاعم ولا اي شي!
و كل مره يواعدني نروح و يأجل و يأجل و يأجل
حتى المصروف ما عطاني كرم من نفسه و شهامه و و رجوله لاا انا بكيت و قلت اني محتاجه مصروف كل اسبوع! لأنه يحطني عند اهلي كل ويكند و احتاج و استحي اطلب منهم يعني ماحس من نفسه و عطاني؟ بس قام يعطيني

كل هذا لاحظوا و انا ساكته! داخل عالزواج كأنه حرب مو موده و رحمه و استقرار كأن احد محرشه عالزواج ( لا تعطي الحرمه وجه و مدري ايش و عودها على نظامك ولا تدلعها و و و ... ) ماادري انااستنتجت هذا من اسلوبه معاي كأنه يبي يعاقبني والله

المهم كل اسبوع لازم تصير مشكله صار يحطني من الثلاثاء عند اهلي مايجي ياخذني الا السبت و احيانا الاحد؟ مافيه استقرار ولا اماااان ولا اي شي متخيلين اني لما اروح بيتنا احس كأني ضيفه لدرجة اني مااقدر انام احس ماارتحت ولا تعودت عليه كل ماحاولت اتأقلم حطني عند اهلي ٤ ٥ ايام! و اروح لأهلي كل ويكند طول وقتي نايمه كأني جايه من حرب

يصحى منفسسسس مافيه صباح الخير ولا اي شي علطول يلبس و يطلع!

لازم شي روتيني نتطاق كل اسبوع ، آخر اسبوع خذاني السبت و صحينا الاحد متفقين نطلع السوق كنت بسخن صينية دجاج جايبتها من اهلي و ماعرفت اطلعهاا حاره قام يصارخ وجع وش هالدلع و القرف قال تدرين اكلك كليه لحالك و يطلع و يسكر الباب بأقوى ماعنده و يخليني! احسبه يمزززح والله قام ارسل سوق مافيه و مع السلامه قلت اوك صادق يعني .. رجع آخر الليل ٤ الفجر و جى يبي يراضيني و مارضيت طولت عالتلفزيون و خليته يتكلم و راح نام بمجلس الرجال قلت كيفه بكره بيصحى و يجي يطلعني او يراضيني! انتظرت لما بكره صحى و طلع بدون مايكلمني ولا يشوفني! و ارسل رساله ( لو تبين اهلك روحي مسموحه ) مارحت جلست لما رجع الفجر و نام بالمجلس و رحت له و حاولت نتراضى قال ترا انا تعبان نفسيا انا ماارتحت معك ولا انتي ريحتيني! ( هذي بقلبي للحين ) بعدين بالنهايه تراضينا بدون نفس
اليوم الثاني كالعاده صار الثلاثاء حطني عند اهلي و مارجع لي الا السبت و قبلها رحت بيتنا مع اخوي باخذ كم شغله و لقيت مفرشه و كل شي يدل انه نايم بالبيت لحاله بدوني! و احنا متفقين مايدخل ينام بدوني و زعلت بس ماعلمته ولا كلمته! المهم جى يوم السبت و ارسل ( تبين اجيك ولا لا ) يعني ماقال يلا مشينا يلا مشتاق اي شي! قمت كابرت و قلت لااا مابي قال زين كيفك توقعت بيقول ليش ماتبين طلع مو هامه!!! اناني

المهم لاحظوا كل هذييي ولا رحت اتشكى ولا قلت اي شي ولا طلعت اسرارنا ..

جى اليوم الثاني و ارسلت له يلا اذا بتجي اليوم ترا استناك .. قال ماراح اجي قلت ليش؟ قال بس احنا مانصلح لبعض روحي بطريقك انتي عقلك صغير و تفكيرك و اسلوبك وحتى طريقة كلامك ماتعجبني ولا تصلح لي!!! قلت اللي يريحك و بقول لبابا قال قولي بكيفك

جى اليوم الثاني و كلمت امه امي ، طلع قايل له كل شيييي كل شييييي عني! انها دلوعه و مايعه و ماتعرف شي و تتقرف من البصل و انا ابي وحده قويه و بدويه و تعرف السنع مب اجي و اشوفها منسدحه ( يحاسبني حتى عالسدحه و الراحه! غريب هالانسان ) و كلام كلام كلااام
المهم كبر الموضوع و وصل لأهله و اهلي و قلت ماتوقعت اسرارنا تطلعها ب هالشكل و تخرب صورتي قدام اهلك و انا يا ما شفت منك بس لأني ابيك سكتت و تحملت على اساس بتزين مع الايام و بلكته ..

كلمه ابوي قال تعال نتفاهم قال طيب ولا جى ( هذي اهانه لأبوي انه ينتظره و قهوه و شاهي و يسحب عليه! )
زعل ابوي و خليناه ماكلمناااه ابداً

جاني بعد اسبوعين كلمني مكالمه قال ترا انا فيني عين منك و من البيت بس بنغير البيت و نرجع لبعض! قلت لااا خلاص مابيك اللي يتخلى مره يتخلى الف مره و كلام كلام كلام و سكرت

امس كلمت امه تقول خلاص خليهم يرجعون لبعض و يصلون عالنبي و ليش معطيته حظر خليها تفكه! و انه مختزي من ابوكم مايدري وش يقوله ( ولد امه كل شيييي يعلم امه كل شييي )

رحت فكيت البلوك و قلت ليش انت طفل ليش تخطي و تروح لأمك تتوسط لك ماتقدر تواجه بابا؟
قال احترمي نفسك بعدين انا فيني عين من البيت و ترا بنسكن عند اهلي لين تزين الامور!!!!

تخيلوا شين وقوي عين راجع فوق غلطه يبيني اسكن مع امه؟

قلت لا شكراااا خلني اعيش حياتي و رح خذلك البدويه السنعه اللي تبيها قال خلاص لا تتكلمين فالماضي و و و .. قمت بلكته

و احس اني مابيه كرهته خلاااااااص
عديم مسؤوليه و يبي يرجعني مع اهله بعد! و مُسيطر و ادري انه مارجع الا عشان امه تعبت و تبكي و قالبه عليه بس خلاص صح بنات اللي يقوى قلبه و يقسى و يتخلى مره يتخلى الف مره؟ و ياليت على اشياء تسوى على ولا شي راح طلع اسرارنا و قال انا مابيها اجل بعد سنه سنتين وش بيسوي فيني؟
مع العلم انه ايام الملكه كان حاط لي القمر بيدي و انا بعلمك الطبخ و انا بعلمك كل شي و ماعليك من شييي ( بعد ما طاح الفاس بالراس صرت مااصلح له ولا على جوه!!! ) حسبي الله ونعم الوكيل كنت ئُطه مغمضه خذاني خربني و يبيني اصيرله طباخه و اسكت على كل شي وهو لااا مايرضى على نفسه
شوفوا لا تقولون بعد انتي اطبخي و مدري كيفففف ترا الطبخ معروف من الشهر الثالث و حتى الطبخ مو عذر انه يتخلى عني! كان يقدر يكلمني بشويش يجيني بالطيب و اللين ابدا ما كان يقول اطبخي ولا اي شييي حتى كنت اقوله جب اكل بطبخ يقول لا ماتعرفين ماله داعي بيخرب يعني هو ماشجعنيييي
بدال مايعلم اهله و يفضحني عند القبيله كلها انه بس تنسدح و بس ماتعرف تسوي شي كان علم امي و ابوي! هذا لو جد كان شاريني
مافيه اي استقرار يوم ببيتنا ٥ عند اهلي خير؟ بنات عماتي و صديقاتي ازواجهم ٢٤ ساعه عندهم و مستحيل ينامون برا البيت لو وش ما صاااار ودي نفسهم يجي يحطني و يكلمني انزلي انا تحت مو يخليني انام ٤ ايام اعوذ بالله؟ و في كل العزايم ازواجهم يجيبونهم الا انا اجي مع امي كني للحين ماتزوجت! هذا غير كلامهم يوه الله يعينك يوه ماحسيتي بطعم الزواج انقهههر لما وحده يكلمها زوجها و تلبس عبايتها و تطلع و انا زوجي ولا عمره وصلني لمشوار ولا خلاني احس نفس باقي البنات! غبيييي

انا انسانه هالتشتت مااحبه ولا اقدر اتعايش معه ولا اتعود عليه مرررره ماحبيت مره
كنت صابره و متحمله و اقول كل الناس ف بداية الزواج تصير بينهم مشاكل آخر شي راح و تخلى عني!! راح يقول لأمه عن كل شييييي بيننا كل شي ما صبر و كلمني ولا كلم اهلي راح قالها انها دلوعه و تقول ماما و بابا و تتقرف من البصل!! يعني عروس المفروض يراعيني و بالعكس يصبر علي و يحاول يغيرني شوي شوي!!! و امه كلمت تقول لأمي ليش بنتك مايعه!!! طيب انتم عارفينييي قبل الزواج ولدك ٧ شهور كل يوم ف بيتنا توه يكتشف اني مااصلح له ؟ انا اللي صابره عليك انا اللي قال مافيه شهر عسل و بلعتها اكشتفت انه يدخن و بلعتهاا ٢٤ ساعه يطلع و يخليني و انا عروس لحالي لما ٢ الليل!!! كل ويكند ينام برا و يحطني عند اهلي و انا عروس!!! و كل هذا و سكت له!!! ما يراعيني ولا يداريني ولا ياكل معاي ولا يجلس معاي زي الناس و فوق كذا رايح يتشكى وش يقول انها تقول ماما و بابا و مايعه!!! بس هذا كل اللي جاك منييييي؟ باعني بنااات كذا زي السلام عليكم وين الرجوله!!! بنات منقهره نار بصدري انا اللي متحملتك اناااا تروح تقلب الطاوله علييييي عشان اشياء سخيفه كان يقدر يجلس معي و يعلمني و شوي شوي معاي لما كل شي يزييين بس هو مايبي هو باعني كذااااا شهرين ما اعجبه الوضع استسلم لعبه انا عنددددده!!! و يرجع كذا بكل برود يلا ارجعي كان فيني نفس و بنروح نسكن عند اهلي!!! عفوا؟ قال تبين الطلاق قلت ايه قال اوك بعدين شوي رجع قال ترا ماله داعي الناس تصير لهم مشاكل اكبر من كذا اعقلي ؟؟؟ وين باقي فيني عقل وين 😭
ادري كثرت و طولت بس الأكيد ان هذا اول و آخر موضوع لي ابي قرار نهائي مابي اندم و اتحسف بعدين ، و بحكم انكم مجربين و سامعين تجارب ناس و اكيد لكم خبرات بالحياة اكثر مني فعطوني وجهات نظركم و حللوا الموضوع و فصلوه من جميع النواحي و ابي كلام جميل نفس جمالكم لعلّ و عسى يبرد اللي بقلبي شوي 😢 انصحونيييييي و دلوني بنات اعتبروني اختكم الصغيره 😢