بالبداية شوفي المهر كم وقسميه على بنود وجدول ...مثلا ترسمي جدول حسب التالي :
تخصصي لكل نوع من المشتريات المبلغ المرصود له يعني تقولي قسم المكياج البلغ المرصود 3 آلاف وتكتبي بالخانة المخصصة وتلتزمي يعني مهما شفتي بعد كذا لا تشتري الين تنتهي من مشترياتك وتشوفي كم بقي
طيب نجي لطريقة التسوق :
خلي لكل يوم نوع من المشتريات علشان ماتتعبي ولا تحتاسي ..مثلا لو نجي لبند قمصان النوم وكريماتها لو رصدتي لها مبلغ 4 آلاف بحدود هذه الفلوس نسقي اختاري قميص لليلة الدخلة وروب شيك ينلبس على كل القمصان وثلاث قمصان قصيرة وبجامتين وملابس داخلية وكريم للجسم وافضل خذي طقم شاور جل ولوشن تبعه والصوابين
لا تروح عينك بهذا اليوم على محلات الميك اب ولا الملابس ولا تضيعي وقتك تدخليها التزمي بالجدول وخلصي مشتريات هذا البند وارجعي البيت رتبيها وشوفي اذا زاد معاك فلوس اكتبيها بالخانة المخصصة وحطي الزايد بظرف واكتبي عليه بند القمصان واحفظيه بدولاب او شنطه
اليوم اللي بعده بند الميك اب والعطور روحي محل واحد ترتاحين له
وخذي كل اغراضك منه ليه ؟؟ لان اغلب المحلات تعطيك هدايا تستفيدي منها مثلا شنط ميك اب وفرش مكياج
لا تبالغي بشراء المكياج اساس واحد وبودرته وظلال عين مشكلة وارواج ناعمة حسب ميزانيتك ونفس الشي سجلي كم صرفتي وكم بقي واحفظي الباقي
اليوم اللي بعده وممكن تقسمينها على ثلاث او اربع ايام حسب مشترياتك وميزانيتك ونفس الشي التزمي فيها بالميزانية وقبل ماتروحي السوق افتحي دولابك وشوفي ايش ممكن تاخذي من ملابسك اللي بالدولاب وحاولي تنسقي بين الاحذية والملابس المتناسقة معاها ولا تكثري حاولي تشتري ملابس بيت ناعمة تقدري تستقبلي فيها اهلك واهل زوجك
ملابس السهرة فستانين او ثلاث كفاية هذا اذا كان فيه عروس بتحضريها باول سنة زواج واختاري احذيتها وشنطها
بند العناية الشخصية : لاتنسي غسول نسائي وادويتك اللي ماتستغني عنها مثلا بنادول ..شنطة للعناية بالاظافر ..شامبوهات كوتكس ..مزيلات مناكير وميك اب مزيلات الشعر وسشوار ومملس للشعر وكريمات شعر وبلسم ..معجون وفرشاة اسنان ..مطهرات ومعطرات للفم ..فازلين ..مطاطات شعر ومساكات تستخدميها وقت السشوار ..الخ
طبعا حسب رغبتك تزيدي وتنقصي من البنود وترتبيها حسب طريقتك والمدة اللي تلزمك او ممكن تضمي كم بند مع بعض هذا بس مثال ...اهم شي بالموضوع انك تسوي ميزانية لكل بند وتلتزمي فيها
واهم شي تلتزمي بالميزانية المرصودة لكل بند واكتبي بالملاحظات اي شي تبغيه
بعد ماتخلصي جميع مشترياتك وترتبيها ممكن تنزلي كذا بس استطلاع عن اشياء منوعة نفسك فيها
ومهما كانت قيمة المهر بالتنظيم راح يكفي ويزيد
انا خليت بند فستان العرس آخر شي انتي ممكن تحطيه اول شي
اتمنى اكون افدتكم ياعرايس ومرة ثانية الف مبروك
في الرابط مرفق الجدول المقترح
https://d2s63a22uzwg40.cloudfront.net/7/1/6/7/0/1/54a780f9302b7.rar
