هاي العزومة كانت مميزة واطباقها جديدة عليّ .. لاني عملت ديك رومي وكتف خروف مشوي (2) .. وكان معهم شوربة جزر وتشكيلة سلطات وسمبوسة وعملت صينية خضار مشوية متبلة بالكزبرة والتوم . الكميات كبيرة شوي لان الفطور كان لتلات عائلات حوالي
turkey

وهاد الديك الفصيح
eldeek

التتبيلة قبل بيوم ليمون وزيت زيتون و شوية خل، بابريكا وبهار مشكل وفلفل أسود وريحان مجفف وسماق وملح ..
وتاني يوم لما تيجي تشويه حطي عليه أصبع زبدة وافركيه منيييييح منيح ... وفي الصينية حطي مكعب ماجي ومية .. وغطيه بالقصدير أول ساعة بس و بعدها اكشفيه .. وكل ربع ساعة سقيه من المية اللي تجمعت بالصينية لحد ما يستوي تمام ويتحمر. بيلزمه حوالي 3-4 ساعات وحسب وزنه بالفرن وعلى حرارة 200 تقريباً

كتف الخروف
IMG_0422


سلطة الجرجير مع المشروم الطازج
mushroom

جرجير منضف ومقطع خشن، وبندورة حمرا يفضل اللي طعمها حلو شوي مقطعة و مشروم طازج مقشر ومقطع .. بتخلطيهم مع بعض و التتبيلة هي خل البلسميك + زيت زيتون + ملح + ريحان مجفف .. و اذا ما كان عندك خل البلسميك او ما بتحبيه استبدليه بالليمون ..

شوربة الجزر
carrot
جزر مبشور او مفروم ناااعم الكمية الي بدك ياها ..

في طنجرة بتقلبي بزيت الزيتون وشوية زبدة بصلة مفرومة ومكعب ماجي ولما يتحمر البصل حطي فوقه الجزر المبشور وقلبي شوي و ضيفي كمية من الماء تغمر الجزر، حركيهم واتركيه يغلي لحد ما تحسي انه الجزر استوى..

اطفي النار واتركيها تبرد شوي وبعدين حطيها في خلاط العصير حتى تصير ناعمة .. و ضيفي عليها الملح وقلييل من البهار المشكل والفلفل الاسود او البابريكا .. ورجعيها على النار تغلي مرة او مرتين وخلص. طبعا في ناس بتحط كريمة الطبخ او القشطة بس احنا ما بنحب الشوربة تكون تقيلة.

خليني ارحمكم من الطبخ شوي ونيجي للحلويات .. كلها حلويات عادية وتقليدية ومعروفة عموما ً

حلو النسكافيه البارد – أسهل حلو بالعالم
nescafe_cake
طبقات بسكوت مغطسة بالنسكافيه وبينها طبقات كريمة ! ما في أسهل من هيك بس فيك تتفنني بنكهة الكريما او الزينة أو تضيفي طبقات تانية وميزته انه سريييع ازا انزنقت بضيوف أو عزومة مش متوقعين

حلو بالكاسات

طبقة كيك مفتت ومرصوص في اسفل الكاسة، وطبقة جلي بالكرز وطبقة (كريمة مع كريم كراميل ) وفوقها كرزة – طبعا ممكن تشكلي النكهات والخلطات متل ما بتحبي
kasaat
مهلبية بالفراولة ..
mhallabeyye

تشيز كيك بارد (مش بالفرن)
cheesecaketi
اله كتيير وصفات وطرق ونكهات عشان هيك بحبه لانو ما بتقيد لا بالمقادير ولا الطريقة (عجازة)


موالح خفيفة للجمعات الصباحية او العصرونية ..
طبق مفضل للصبايا في جمعاتنا .. خضار مقطعة مع تغميسة خفيفة
dipandveggies

طريقة التغميس (الديب) : علبة لبنة (500 غرام) + كيس شوربة ماجي 11 صنف خضار + كاسة ماء مغلي
بعد ما نغلي المي بندوب فيه الشوربة وبس تدوب تمام بنخلط معها اللبنة كوييس .. فيك تتحكمي بكمية المية حسب القوام اللي بتفضليه

تشكيلة كانابيه .. الصور من سنتين تقريبا أكيد في اشكال وطرق أحلى واحسن من هيك بس بعد ما عملتهم أول مرة ما صورتهم (كنت فرحانة فيهم أول مرة)

ducks

canapes

canapes2

وهي صورة لكل الأطباق معهم سندويشات تونة بالذرة والمايونيز و ميني بيرغر وميني هوت دوغ .. وطبعا تبولة وسمبوسة وسلطة باستا وبيتزا وورق عنب

IMG_5072

نرجع للطبيخ هههه بس حتكون أطباق متفرقة عشان العزايم حتكون متكررة ...

سمك مشوي

fish

التتبيلة: ملح وفلفل وليمون وزيت زيتون وبابريكا وتوم مهروس وروزماري وكمون .. بنرتب السمك فوق شرايح بطاطا ووبنحط فوقه شرايح بندورة وليمون وبصل أخضر مفروم او حسب الرغبة .. حوالي 20 دقيقة بالفرن او حسب حجم السمك



المسخن الأصلي (مو الرولات) ..

163034_10150354185125156_77080

أكلة فلسطينية تقليدية وشتوية وبتنعمل دايما في موسم قطف الزيتون وعصر الزيت ..
أساسها خبز خاص بالمسخن اسمه الخبز المفرود، وكميات هائلة من البصل المفروم – بينطبخ في زيت الزيتون مع السماق والصنوبر
والدجاج بينسلق لحد الاستواء وبيتحمر ، وبعدها نغمس الخبز بالزيت ومرقة الجاج ليطرى شوي (بس ما يتشرب) وبنحط فوقه كمية من البصل و بنرص الأرغفة كلها بنفس الطريقة وفي الأخير بنحط الدجاج المحمر على الوجه ..



سوفليه البطاطس

021

للأسف الصورة مش حلوة بس الطعم ممتاز ..
طبقتين من البطاطس المهروسة وبينهم طبقة من اللحمة المفرومة المطبوخة مع البصل والبهار .. وعلى الوجه باشميل وجبنة موزاريلا.

دجاج تكا..

022


دجاج مقطع نعمل فيه شقوق كبيرة وينقع بشوية خل وبعدين نتبله: توم وبابريكا وزنجبيل وكمون وكزبرة وهيل ومعلقة صلصة بندورة ولبن زبادي وملح وزيتون وبيبقى بالتلاجة لتاني يوم
قبل الطبخ بتطلعيهم فتره وبصينية عدرجة 200 بدون تغطية لمدة نص ساعة_بعدين بتولعي فحمة وبتحطي سمن او زيت بقصديره بنص الصينيه وفوقها الفحمة وبتغطي الصينية بقصدير حوالي ساعة لحد ما يستوي.


طبق دسم بس لذيييذ.. موزات الخروف

IMG_0375


تتبيلتها كاتشب وخل وبهار وملح وليمون وزيت زيتون .. ويفضل تبقى لتاني يوم.. وبعدها بنلف كل وحدة منهم بالقصدير مع بهارات حب وبصل مفروم وورق غار و بنصفهم في صينية. نملأ الصينية بالماء ونستخدم مكعب ماجي او 2 حسب الكمية، ونلقها كمان مرة بالقصدير وبدها بالفرن حوالي ساعتين على حرارة 200.

هاي مجموعة أطباق لما قررنا ناكل اكل صحي .. بس ما طولت الحالة معنا هههه

دجاج وخضار مشوية على الصاج

009


ستيك مشوي عالصاج مع بطاطس مهروسة ومشروم صوص
017


عصير تفاح رائع بيبرد القلب
IMG_0436


لكل حبة تفاح أخضر بدك حبة ليمون و3-4 ورقات نعنع طازج و ملعقتين سكر كبااار
حطي الكمية اللي بدك ياها وضاعفي كل المقادير حسب المذكور، وحطيها في الخلاط وحطي معها كمية من التلج والماء الباااارد .. واخلطي

انا بحط التفاح والليمون بقشره بس بقطعه ارباع بعد ما أغسله .. و بعد العصير بتصفيه منييييح من القشر و بيطلع عصير روعة جد

الكراوية
caraway
هي طبق تقليدي بينعمل لما وحدة بتولد وبيتقدم للضيوف .. الكراوية عموماً صحية جدا بس احنا بنخربها بالمكسرات اللي عليها ههه
بتنطبخ مع الرز المطحون وشوية قرفة وعلى وجهها مكسرات نية مو محمصة وجوز هند


قطع دجاج مشوي ما فيها شي جديد غير التقديم
grilled_chicken

zoom_chicken



مربى الفراولة اجا على بالي في يوم أعمل كمية وأوزعها على القرايب هدايا بسيطة ..


jam1

jam2

jam3
طريقته بسيطة .. لكل كيلو فراولة كيلو سكر وعصير ليمونة.. بينطبخوا على النار منيييح مع التحريك المستمر لحتى توصلي للقوام المطلوب وتتركيه يبرد
انتبهي لانو بيطرطش وحرق المواد السكرية مؤلم ومزعج وممكن يعلّم

سلطة المعكرونة الملونة
014

نفس الطريقة بس بنوع معكرونة ملونة بنكهات مختلفة

والختام مع هالمملوح ديك رومي مع الخضار
IMG_1070

اللي بدها أي وصفة أو عندها أي سؤال لا تتردد طبعاً.. بس اهم شي ما يكون وارد في الموضوع

وسلامتكم :)