عزت نفسي ما بتسمحلي ❌

مساء الخير والأنوار 💋💋


صحيتي الساعه 8 الصباح وتلحقين ما تلحقين على موعدك اللي حاجزته
وتروحين بدون فطور ولا حتى قهوه تركد راسك ☕
انا كذا زمله واتوتر من مواعيد المستشفى
ألخ ...
رجعت البيت مهدوده واشوف علقت عباتي واشوف بناتي ومتطلباتهم واستقبل ولدي من المدرسه
طقت الساعه 2 الظهر
حاولت انام حاولت أعوض سهرانهأمس لقبل الفجر وصحيت 6 لمدرسة ولدي ورجعت نمت نومه خطافيه
حسيت وقتي ضايع وانا بفراشي واقلب بالجوال من سنابات وواتس وانستقرام أنعمت عيوني 😖
رحت وجيت وجيت ورحت
فجأه أشوف واتس جايني .. هلا إبتسام حياك الله اليوم بعد المغرب جاراتي عندي .. !!!!!!!
نعم شخباااااااري ووش علومي وش الدنيابي 😷
الساعه طقت 3 العصر وتوك تعزميني < لا أنا أمونعليها ولا هي تمون علي
كلن منشغل بحاله وبحياته وجايه تعزميني أنا يا جارتك الجديده اللي سكنت بعدكم وبعد كل شلتكم
جايه تعزميني بالطريقه هذي وبالوقت المتأخر هذا !
تعوذت من أبليس وقلت يابنت يمكن هي بسيطه < مع أنها مو كذا سبق وعزمتها ببيتي من سنه تقريباً
فيها شوية مظاهر وحب الفشخره
قلت ممكن يمديني متحممه وخالصه من رجعت من المستشفى باقي أضبط شعري وألبس شيء خفيف ومريح
واتسمكر وخلصنا اسمها عزيمة شاي وقهوه يعني خلي البساط أحمدي وتوكلي على الله
بس ماش جسمي تعبان ووجهي يحتاج نوم وراحه ولا لي بال طويل وقبل هذا كله أسلوب العزيمه دون المستوى👎🏻
قلت خليني أكلم صاحبتي واشوف هي معزومه ولا لا
🙎🏼هلا كيفك أم فلان عازمتك اليوم عندها ؟
🙎🏻إيه وانتي ؟
🙎🏼ما أدري مو أكيد
بالصدفه سألت هالسؤال < مع أني مو شخصيه متكبره أو معقده بالعكس طيبتي أحياناً تصدمني بالناس
🙎🏼متى عزمتك ؟
🙎🏻أمس على صلاة العشاء أتصلت واعزمتني
🙎🏼 !!!!!
🙎🏼ممممم لا لا ما اتوقع اني بروح أحس نفسي تعبانه ولا لي خلقها قلتها بعصبيه
ما أكذب أنقهرت من أسلوب العزيمه وانقهرت أنها حاطتني بآخر القائمه
وفكرت تعزم قبل الموعد بساعتين ثلاث
هي ما تهمني أولاً وأخيراً بس قهري الوحيد أنها متعرفه على كم بيت وعن طريقها بتعرف وبكسب جيره
حتى لو كنا ما نشوف بعض ألا بالسنه حسنه اسم أنها جيره !
هل لإني جالسه بالبيت زوجه غير عامله واهي موظفه وصاحبتي معلمه وأغلب الحي طبيبات ومعلمات ألخ
تحطني بآخر القائمه !؟
ليش تعتقد اللي جالسه بالبيت متفرغه ! ماعندها تربية أبناء إرتباطات ممارسة هوايات جمع طوابع 😂🙄
كرهت أروح لعزيمتها زود
ورديت عليها
🙎🏼أهلين .. أعتذر منك الوقت ما أسعفني لتلبية الدعوه خيرها بغيرها .
على طول على طول بسرعة الجن
ردت علي
🙎🏽نعوضك إن شاءالله
مستغربه أسلوب الدعوه واني بآخر القائمه وفوقها ردها اللي مثل وجهها بالضبط
ليش يا ماما أنا أنتظر عزيمتك مثلاً ؟
للأمانه حسيتها سوت كذا 💃🏽💃🏽 يوم أعتذرت !


يبقى سؤالي
لو كنتي بمكاني تقبلين الدعوه وانتي عارفه انو صاحبة العزيمه مو حريصه على جيتك ؟
أو بتسوين مثلي ؟
بترفضينها وبتكبرين الوساده وتنامين وتقضين وقتك بين أسرتك ؟




مشرفات يا ويلكم تنقلون الموضوع 🙄😘
على فكره اشتقتلكم 😘