سفره تفتح النفس
ماشاء الله تسلـــــــــــــــــــــــــــــــــــــمـ يدكـ يالغلا

يعطيك العاااافية

شكرا لمروركم وتعليقاتكم جميعاً :26:


اخواتي اللي سألوا عن الطرق .. أولا الباربكيو صوص هاد جاهز بتلاقيه في المحلات عند الكاتشب والمايونيز وغيرها من الصلصات ..

ااصابع الموزاريلا ..
بدك تشتري اصابع الموزاريلا Mozzarella strings / sticks من السوبرماركت تلاقيها عند الاجبان وهاي صورتها



جهزي بيضة مخفوقة وخليط بقسماط و خليط طحين مع شوية ملح وفلفل .. واقسمي كل اصبع جبنة لقسمين و اغمسي كل واحد منهم في البيض ثم الطحين ثم البيض كمان مرة ثم البقسماط ... اهم شي في هالعملية ما يبقى اي جزء ظاهر من الجبنة عشان وقت القلي ما تسيح في الزيت وتبهدل الدنيا .. و كرري العملية مع كل الجبنة وبعدين حطيها في التلاجة لحد وقت القلي

اقليها في زيت حامي وغزير حتى تتحمر ..

مقلوبة الباتنجان

طبعا الطريقة ممكن تتطبق لمقلوبة الباتنجان أو الزهرة او في ناس بيعملوها بالزهرة والباتنجان مع بعض بنفس الطنجرة ..

والمقلوبة طبعا اما باللحم او الدجاج هاي طريقة اللي باللحم ..

المكونات (وكميتها حسب الرغبة ما في مقادير) لحمة بعظم ، رز بسمتي، باذنجان ، بندورة ، ثوم ، بهارات حب، وبهار مشكل مطحون ، شعيرية، لوز وصنوبر للتزيين

اول شي بتغسلي اللحم منيح وبنغليه في طنجرة مع بصل وورق غار لحد ما تطلع كل الزفرة اللي فيه ... وبعدها بنكب المية وبنغسل اللحمة وبنحطها في طنجرة نضيفة (انا بسلقها في طنجرة الضغط) .. مع بهار حب وبصلة مفرومة وورق غار وروزماري (حصى البان) لحد ما تستوي .. ما بحط معها أي بهار مطحون وممكن نحط ماجي معها ..

في اثناء ما تستوي اللحمة اول شي ننقع الرز حسب الكمية اللي لازمتك .. انا بعملها بالرز البسمتي الطويل.. و بنكون من قبل بفترة قطعنا الباتنجان وقشرناه و بنحطه في مصفاية مع كمية ملح حتى تنزل المية اللي فيه وبالتالي ما بيشرب زيت لما ينقلي ..

اقلي الباتنجان في الزيت وبعد ما تخلصي اقلي حبة بندورة او حبتين مقطعين ارباع او أصغر شوي في نفس الزيت ، وبعدها اقلي ثوم مش مفروم يعني يكون فصوص كاملة او مقطوعة من نصفها فقط ، وارفعي البندورة والثوم من الزيت واخر شي اقلي شعيرية في نفس الزيت .. بس انتبهي لانها رح تتحمر بسرعة عشان الزيت سخن مستخدم من فترة..

هلا نصفي الرز اللي نقعناه اقل شي نص ساعة، و بعدها نبهر الرز بالبهار المشكل المطحون وشوية ملح و أي بهارات بتحبي تكون نكهتها ظاهرة في المقلوبة . .. و بعدها بنضيف عليه الشعيرية ونقلبهم منيح..

لما تستوي اللحمة بنصفي المرقة و بنشيل اللحم على جنب ونبدا نرتب طنجرة المقلوبة .. اول شي بنرص الباتنجان المقلي في القاع وعلى جوانب الطنجرة ومعه الزهرة (القرنبيط) لو كانت المقلوبة مشكلة .. و بعدين بنرتب قطع اللحمة (او الدجاج اذا كانت مقلوبة دجاج) و بعدها نحط الرز والثوم والبندورة و بنغمر الرز بمرق اللحم الساخن و بنحطها على نار عالية حتى تبدا بالغليان
في هالمرحلة ممكن نذوق الملح من المرقة ونعدل الطعم بالبهار او الملح ان لزم، و نوطي النار على اقل مستوى و نغطي الطنجرة لحد ما تنشف ميتها ويستوي الرز

نقلبها في صينية حجمها مناسب و نزينها باللوز او الصنوبر المقلي او حسب الرغبة ..

ماشاء الله
سفره عامره