كيف حالكم اخواتي الغاليات ان شاء الله تكونوا بخير
الاطباق دي كانت بعض الاخوات طلبوها مني ومنهم ام اختنا الغالية ام اليتيم وسامحوني علي التاخير انتم عارفين كانت حوسة اصناف العيد وكمان كان كل صنف بيتعمل في يوم لوحده في يوم منفصل مش حطول عليكم تعالوا ندخل المطبخ
بسم الله الرحمن الرحيم
1-الحمام المحشي:
نحمر رز في زيت قليل ونضيف عليه بصلة مبشورة ونقلب معاه القوانص وملح وفلفل وبعدين نضيف المية ولما تغلي نوطي النار لحد لما يستوي تلات ارباع السوا ونستني لما يبرد ونضيف شوية صغيرين كمون مطحون ونزيد بالكبدة النية علشان لو اتحطت مع القوانص تتهري ونحشي الحمام واسيبكم مع الصور توضح
هنا كتفتها ودخلت الارجل جواها ونخيط بابرة تخينة
احط الحمام في حلة واحط المية تغطيه وبصلة مقطعة وملح وفلفل واسيبه يتسلق لحد لما يستوي وبعدين احمره في زيت مع سمن
وبالف هنا وشفا وعلي فكرة مقدار الرز كل 5 حمامات بياخدوا كوباية رز صغيرة
نيجي للصنف التاني
البط بالخلطة
الخلطة تشبه خلطة الحمام بس مش حنحط الكمون ومش حنخيط بس حنحط سيخ شوي خشب ونقطع القوانص علشان كبيرة
استنوني ياحبايبي لسه لينا تكملة :27:
بعد لما اقفلنا البطة نبشر عليها بصلة وملح وفلفل وياريت نسيبها شوية حوالي ساعة وبعد كدة نسويها في ميتها يعني نحطلها حوالي كوب مية ونوطي لحد لما تستوي وبعدين نحطها في صينية ونسقيها المية اللي نزلت وندخلها الفرن لحد لما وشها يحمر والصور توضح
وبالف صحة وعافية
نيجي للصنف التالت
محشي الكرنب او الملفوف
حنجيب الكرنبة ونقطع من فوق ببوز السكينة ونخلع الورق ونغلي المية ونسقط الورق بس مش دفعة واحدة يعني اجزاء ونحط في المصفاه ولما يبرد اقطعه مربعات حسب حجم المحشي اللي عايزاه
احضر الخلطه اقلب بصلة مبشورة مع ملعقة سمن لحد لما تصفر واضيف عصير الطماطم واسيبها تتسبك واول لما تطخن اضيف الرز المغسول واقلبه واطفي علي طول واخرط عليه شبت وبقدونس ونعناع جاف وملح وفلفلاسود ولو حابة قرن فلفل حار وابدا احشي القطع بس سامحوني نسيت اصور الخلطة بس هس واضحة من الصور
احط ملعقة من الخلطة وابرم الكرنب بس اسيب الاطراف من غير حشوة
ارص في الحلة واسقيه بالمرقة لما تغطيه ومكعب مرقة واحط طبق بايركس عليه علشان مايفكش واوطي النار لحد لما يستوي بس اغرف لما يبرد شوية
وبالف هنا وشفا اتمني الاطباق تعجبكم واسيبكم في رعاية الله