دى عزومنى لاخوات زوجى ومامته بس معرفتش اصور كل صنف لوحده واتمنى انها تعجبكم وتستفيدوا منها
عملت فراخ بانيه ورز بالكاري
صينيه بطاطس وفراخ مشويه
رز بالخلطه والمكسرات
شيش طاووق
بيتزا باللحمه المفرومه
كفته مشويه
سلطه
كيك وشاي
وعصير مانجو وجوافه
لو عايزين طريقه اى اكله من عيونى
انا تعبت اوى في العزومه دى والتجهيز ليها واى سؤال انا موجوده
وطبعا جهزت ليها من قبلها بفتره واشتريت الطلبات وتبلت الفراخ واللحم وعلي الفريزر وقبلها بيوم جهزت الاكل كله ماعدا الرز وعملت اشكال التزين وحطتها في التلاجه وعملت الكيك ويوم العزومه سخنت الاكل في الفرن وسويت البانيه والرز بالخلطه والرز بالكاري والحمد لله العزومه حازت الاعجاب وعجبتتهم كلهم
وجوزى حبيبى ساعدنى في تقديم الاكل وتزين الاطباق
اصلي معرفش اعمل حاجه غير لو قال رايه فيهاربنا يخليه ويشفيه يارب
انا معنديش سفره علشان كدا فرشت مشمع بلاستيك شفاف ورصيت عليه الاكل
وطبعا انا ماليش في العزومات خالص علشان عندى طفله صغيره شغلانى وكمان زوجى مش فاضي ودى اول عزومه اعملها:icon28:
هنزلكوا طريقه الرز بالخلطه والفراخ البانيه
الفراخ البانيه
بتجيبي صدور الدجاج وتقطعيها شرايح رقيقه
وتتبل بفلفل وكمون وملح وشطه وليمون وحبهان وورق لورا ومعلقه خل وتسبيها طول الليل
وقبل التقيم تحطيها في دقيق ثم بيض ثم بقسماط
وتقليها علي نار عاليه وتفرديها علي مناديل ومترصيهاش فيوق بعضها في الطبق علشا مش تطري
الشيش طاووق
صدور فراخ تقطع مكعبات وتتبل بنفس تتبيله البانيه وكركم وكوب زبادى وبصل قبلها بيوم
وقطعى بصل وفلفل وطماطم مكعبات كبيره
واغرزيهم في الاسياخ بعد نقعها بالماء لمده ساعه علشان السيخ ما يتحرقش
حطى قطعه فراخ بصل فلفل طماطم وكرري كمان مره
وحطيهم في صنيه علي نار هاديه وغطيها بالفويل ولما تستوى دخليها تحت الشوايه تتحمر واقلبيها علي الوش التانى كمان علشان يحمر
وبعدين دخنيها بفحمه ومعلقه زيت واقفلي عليها بالفويل كري الخطوه دى مرتين تلاته
الارز بالخلطه......
كل كوب رز عليه معلقه سكر
حطى معلقه السكر في الحله علي النار لحد ماتبقي كراميل وخلي بالك لو فاتح الرز هيسكر لو غمق هيمرر
اول ما يكرمل تحطى عليه الشوربه والتوابل ملح فلفل كمون قرفه قرنفل
ولما يغلي تضيفي الرز وتسويه عادى
وتكونى مقطعه كبد وقوانص وتشوحيهم مع سمن او زبده وبصل وتسقيهم نص كوب ماء وتسبيهم يستو وتحمري لوز وصنوبر وممكن زبيب
وعند التقديم لو قالب حطى المكسرات بعدين الكبد والقونص بعدين الرز
واقلبيه في طبق التقديم
الرز بالكاري
قطعي بصل وشوحيه بسيط في السمن
وكونى مجهزه فلفل اربع كبار وطماطم 4 كبار قطعيه مكعبات صغيره خالص
وحطيهم علي البصل يتشوحوا شويه وبعدين ضيفي معلقه صلصه ومعلقه كاري وفلفل اسمر وكمون وشطه وكسبره وشوربه وسبيهم يغلوا وضيفي الرز وسويه بالطريقه العاديه يقدم ساخن