الاول التحضير للعزومه كان قبلها بيومين و زي ماميرو دايما بتفكرنا استحضرت النيه لله وابتغاء مرضاة زوجي
وافتكرتك ياميرو ربنا يجازيكي خير
كتبت في ورقه كل الي محتاجاه ورتبت الاصناف
لحوم (( حمام محشي بالفريك + فخدتين هشويهم في الفرن + بانيه مشوي بالصويا صوص الحلو))
خضار(( طاجن باميه + جزر وبطاطس مكعبات جنب الفخده ))
اصناف جانبيه (( لازانيا باللحمه + رز بالشعريه والكبد))
سلطات (( كول سلو + فتوش ))
مقبلات
هوت صوص + فلفل احمر حراق دول الي في الاطباق الصغيره
شوربة كريمه
الحلو
حلا بلكاكاو والكريم كراميل
فروت سلاط
الاول غسلت الحمام كويس ومش خليت الراجل يفتحه من جوه عشان مش يبوظ منطقة الصدر عشان اعرف احشيه
نضفته كويس ومسكت كل واحده من بداية الرقبه وشيلت جلده صغيره مابين الجلد وجسم الحمامه بيقولو عليها الحوصله
وبعدين غسلته كويس من جوه بالملح والدقيق وتبلته بالفلفل الاسود والتوم المفروم علي خفيف من جوه
كنت ناقعه الفريك ربع ساعه
جبت كبد الحمام وقطعتها ودبلت بصله في زيت علي النار وحطيت الكبد والفلفل الاسود والبهارات وبعد مااتشوحت حطيت الفريك بعد ماصفيته
وحطيت عليهم معلقتين زبده وملح وتوم مفروم وشوحتهم كويس اوي لمدة 5 دقايق وبعدين زودتهم نص كوباية مايه وسبته لحد ماشرب مايته يعني نص سوا
وحشيت الحمام بس طبعا مش مليته اوي عشان مش يفرقع في الشوربه وهو بيستوي
وتاني يوم وقت السوا سلقته بالظبط ساعه الا ربع وحمرته في زيت مع زبده نص تحميره عشان بيغمق بعد كده
( معلومه من ام مريم )
معلش نسيت اصوره لوحده لكن تقريبا هو باين في الصوره
الفخده
من بليل تبلتها ب ( ملح وفلفل وبهارات وصلصة باربيكيو بتاعة الشوي وممكن من غيرها
وعملت فتحات بالسكينه جواها حشيتها فصوص توم وحلقات بصل يعني مش كتير تقريبا 6 فتحات صغيره
ولفيت الصينيه بالفويل وقبل الاكل ب 3 ساعات دخلتها الفرن بعد مازودت جنبها بطاطس وجزر متقطعين كبار عشان يستحملوا وقت الشوي
وبالظبط اخدت ساعتين ونص
البانيه المشوي
تبلته من قبلها بليله ( صويا صوص حلو ( معلومه من ام عبدالله ) وصويا صوص عادي وفلفل وبهارات وبودرة توم
وقبل الاكل شويته بمعلقة زيت في طاسه تيفال لمدة 5 دقايق علي كل جهه
اللازانيا
عصجت اللحمه من قبلها بيوم وزودتها بصلصه طماطم وشوية مايه
وسلقت قطع اللازانيا نص سلق في مايه وزيت
وعملت البشاميل عادي ( معلقتين دقيق وزيت وبيضه وكوباية حليب ومكعب مرقه وملح وبهار حلو وفلفل اسود
وبشرت جبنه شيدر وموتزاريللا وحتة جبنه رومي صغيره بتخلي طعمها حلو اوي
وجبت البيركس وحطيت معلقتين بشاميل وعليهم رصيت 4 لازانيا وعليهم بشاميل وعليهماللحمه وعليهم الجبنه وكررت الترتيب ده مره كمان وفوق الوش طبعا الجبنه كتير
ودخلتها التلاجه وسويتها تاني يوم قبل الاكل
الكول سلو
قطعت الكرنب وبشرت الجزر وحطيت عليهم معلقتين حليب ومعلقتين مايونيز ومعلقة سكر وبسسسسسسسس وشيلته في التلاجه لتاني يوم
وعملت الفروت سلاط والحلا
طبعا دي طريقة سمر في الاصل ربنا يجازيها خير هي ورشا
نعمل خلطه )2 كيس دريم ويب + 2 علبة قشطه +2 باكيت بودرة الكريم كراميل ( ونضربهم كويس اوي بالمضرب
نجيب القالب ونرص طبقة بسكوت مشرب الحليب وعليهم طبقة من الخليط ونكررها مره كمان وندخلها التلاجه
وقبل التقديم نرش كاكاو من فوق بالمصفاه
وه كان استعدادي من قبلها بيوم
يوم العزومه الصبح
اول حاجه حطيت الحمام يتسلق وولعت الفرن علي صواني الفخده
وروقت البيت ورتبت السفره وكنت لسه مش جبت مناديل للسفره ودبل وكده
لفيت كل شوكه وسكينه ومعلقه مع بعض بمناديل كلينكس وحطيتهم جوه كل طبق اكل
وجوه الطبق طبق للشوربه وكنت جايبه زجاجات مايه صغيره وكانز عشان يبقي اسهل من غير كاسات او كده
وعملت الرز نقعت رز بسمتي وكان عندي كبد فراخ عملتها بالبصل والتوم وسبتها علي جنب وعملت الرز بالشعريه وحطيت علي الوش الكبد وحمرت صنوبر ورشيته عليهم وقت التقديم
عملت الفتوش
قطعت خيار وطماطم وخس وبصل وعليهم لمون وزيت زتون وسماق وحمرت عيش متقطع وحطيته علي الوش
الشوربه
جبت باكتات شوربة كنور جاهزه وعملتها بشوربة الحمام
طاجن الباميه
دبلت بصل متقطع مع رشة سكر ( معلومه من ريهام (
وحطيت الباميه مع رشة بهارات وبعدين الصلصه والشوربه وعلي جنب حمرت توم مع كزبره ناشفه وزبده وطشيت بيها الباميه ونقلتها في الطاجن ودخلته الفرن
ولا تنسوني بدعوه بتيسير الحال