أول حاجة كل سنة و أنتم طيبين و ربنا يتقبل منا الصيام و يرزقنا الحج......
من غير رغي كتير النهارده كان عندي عزومة صغيرة يلا نبدأ بسم الله
ده شكل السفرة كاملة
قسمت المنيو كالآتي:
- الطبق الرئيسي : جلاش باللحمة المفرومة والمشروم والجبنة - رز بسمتي بالخضار
- الشوربة: شوربة كريمة بالذره والفراخ
- السلطة: سلطة خضراء
- اللحوم: فرخة مشوية - كفتة مشوية
- الحلو:مولتن كيك - ورمان بسكر وعصير جاهز
شوربة الكريمة بالذرة والفراخ:
أنا واخدة الفكرة من شوربة البصل الفرنسية
- بجيب بصلتين متقطعين صغير أو مفرومين نشوحهم في شوية زبدة و زيت لحد ما يدبل خالص وتكون النار هادية شوية عشان ميتحرقش لحد مايبقى لونه اصفر على ابيض
- نحط عليه 2 أو 3 م/ك دقيق ونقلب كويس بعدين احط عليه 2 أو أكتر كوب شوربة (أنا بحط مية سخنة مع مرقة دجاج ) ونقلب كويس و اظبط الملح والفلفل واسيبه يستوي مع التقليب كل شوية
- اضربه فالخلاط عشان مش يظهر فيه حتت بصل وأرجعه تاني الحلة و حسب مزاجك بقى حطي اضافاتك (أنا بحط ذرة صفرا و جزر مبشور و مكعبات فراخ مسلوق )ممكن تحطي خضار مسلوق أي نوع برده واضيف له نص كوب لبن حليب و اسيبهم يستوا شوية و في الآخر شوية كريمة لباني و غلوة و تطفي النار
بتبقى حلوة و مغذية.
الجلاش باللحمة المفرومة والمشروم:
اخدت طريقته من أختي لبنان وحبايبه في منتدى لك بس بدل الفراخ استخدمت لحمة مفرومة
عصجت اللحمة بـطريقة خفيفة عشان اقلل الدهون بإني حطيت عليها بصلة مفرومة وحطيتها في حلة على النار وفضلت اقلب لحد ما اختفى اللون الاحمربتاع اللحمة حطيت فلفل اسود و شوية بهارات ورشة زعتر ناشف ومية يادوب تغطيها بسيط ولماغليت وقربت المية تنشف وطيت عليها ومش بتاخد وقت خالص عشان تستوي
بعدكده جبت بصل جوانح شوحته في قليل من الزيت واضفت عليها المشروم المقطع صغير )أنا استخدمت مشروم فريش (ورشة فلفل اسود قلبت شوية واضفت اللحمة وظبطت الملح وكده الحشوة جاهزة
نيجي للحشو بأي طريقة تفضليها أنا عملته بالطريقة العادية فردته في صينية طبقات ودهنت بين كل طبقة بـقليل من الزيت والزبدة السايحة حوالي7 ورقات وبعدي نفرد الحشوة و حطيت عليها جبنة موزاريلا و شيدر مبشورين
وكملت الطبقات وقطعت الصينية مربعات
ودخلتها فرن ساخن 5 دقايق وطلعتها سقيتها بـ ¾ كوب لبن حليب مخفوق مع بيضة وشوية فلفل اسود وملح بسيط وتدخل الفرن تاني لحد ماتحمر وتستوي الجبنة ادتها طعم ماشاء الله خطير
وده شكل الطبق
الرز بالخضار المشكل:
عملت طريقة بسيطة اوي إني نقعت الرز البسمتي نص ساعة في مية سخنة وشوحت الخضار في شوية زيت صفيت الرز وأضفته للخضار وقعدت أقلب لحد ما ميته نشفت شوية بس بالراحة عشان الرز مش يتكسر واضفت الشوربة (استخدمت مية سخنة وماجي (والملح والفلفل وسويته زي الرزالعادي بس لما وطيت عليها النار غطيت الحلة بورق فويل وسبته لحد ما استوى بيطلع مستوي أحسن
وده شكل الطبق:
يتبع
بالعاااااااافيه