متابعة ,,,,,,,,,,

يالله نكمل...




على كرهي لــ عمي الا اني احترمه ,طبعاً موب عشانه ادري انه مايستاهل بس عشان الوالد ..


نزلت له غصبن علي,وبالطريق شفت الوالد يتوضى عشان يروح الصلاه..


ابوي: لايهمك يابنيتي ,خذيه على قد عقله قولي طيب ,وابشر ,وتامر ,خذيه على قد عقله ..


ـ ابشر ياابوي ..



وانا رايحه للمجلس اذن المغرب ..

شوي واطير من الفرحه بالأذان ,,اكيد انه بيروح يصلي وافتك منه ..


رحت المطبخ اسوي القهوه ,وصليت,وبس انتظر اسمع صكة الباب ..


اقامت الصلاه وانتهت وهو مكانه ..


معقول ماصلى ؟!!



توني اصدق كلمتهم لقالوا هم يضحك وهم يبكي ..



جت بنت اخوي الصغيره وسألتها :عمك ماصلى؟


ـ لا يكلم بالجوال ,اجل ماسمعتيه يضحك ؟ من اول ماجى يسأل عنك روحيله..

ياقلة الحيا بس ..


الرجال راحوا وصلوا وهو مكانه..واعيباااه بس ..


أخذت قهوتي ورحت المجلس وفي نيتي افشله كود يستحي ويصلي ..


انا: هلا عم ,كيف حالك؟


ـ بخير..,, وش اللي سامعه انا ؟اجل طالعة لك بعثه وبتطسين تفشلينا ..


شوفي اهون علي ادفنك حيه بس ,مااخليك تسافرين لحالك ..


ـ والله ياعمي اللي بيفشلكم موب روحتي ,اللي بيفشلكم شي اكبر ..


ـ (في ذهول) وشو؟


ـ امس دق علينا الجرس امام المسجد وطلع له الوالد ..


ـ ايه..


ـ يقول ان عندكم رجال مايصلي ,يدخل ويطلع من بيتكم

مانشوفه بالمسجد خلوه يستحي على وجهه ويجي يصلي ..


ـ (قلب وجهه الوااان) طيب كان قلتو له مريض فيه سكر ورجله منكسره ويصلي بالبيت ..


ـ لاوالله ماقلنا له ,قلنا جايته زكمه قووويه وخاف يعدي المصلين ,واول مايتحسن بيجي يصلي ..


طبعاً كل هذا وانا يدي على قلبي لايكشف كذبتي ..



بس كانت هالكذبه ضروريه ..يمكن ربي الهمني فيها الهام عشان اقدر اخليه يصلي

سكت فتره طويله وكأنه يراجع نفسه ,كانت الوقاحه من اهم صفاته عشان كذا رجع فتح نفس الموضوع ..


ـ المهم ان مافيه سفر..البنت مكانها من بيت اهلها لقبرها ..


ـ ابشر, طيب ..



ودعته, وقبل يمشي تذكرت ان عندي مطويات دينيه ,قدمتها له وحبيت راسه وطلبت منه يسامحني لو كنت اخطيت عليه ..




الخميس كان في بالي شي مهم اسويه ,ادري انه صعب وقويه بحقي بس بجد هالشي مهم ..




زرت عمتي هند ..طبعاً عمتي هند اكثر انسان يكرهني بالعالم ..من صغري تحقد علي ..



الهدف طبعاً.........والا اقول ..ماله داعي اقولكم بس ..





الهدف اني ,اني خفت تموت وانا مازرتها خصوصاً وان فيه نص صريح في الدين








استقبلتني اسوأ استقبال

كانت طول الوقت تحاول تجرحني بكلام ماله معنى ..



اخذتها على قد عقلها وسايرتها ..



وطلبت منها تسامحني لو كنت اخطيت عليها بيوم من الايام ..



وانا طالعه من عندها والا داخله بنتها (ابلى ريم)>>تدرس دين..



بنات عمتي مالي أي علاقه فيهم ,من صغرنا وحنا مشاكل وطقاق ..



مسكتني بطريقه غريبه وكأنها تشحدني ..



ـ زهره ,تكفين سامحي امي ..



ـ على ايش ؟



ـ بس تكفين سامحيها ,من اول مادريت انك بتسافرين وانا ادور رقمك بقولك سامحيها ..تكفين الله يخليك ,ترا مهما كانت تراها عمتك..



ـ والله مسامحتها ,انا مسامحه كل اللي اخطو علي واللي مااخطو ,عسى ربي يسامحها دنيا وآخره ..



ـ جزاك الله خير ,ترجعين بالسلامه ..




ـ الله يسلمك ..



طلعت وانا مستغربه من اسلوبها ومن موقفها معي..[/