اتصلت علي سلمى..



ـ هلا زهره..

ـ هلافيك..

ـ تعالي تغدي عندي اليوم تكفين ,تركي يقول عنده شغل ومااظن يجي قبل الليل..



تذكرت موضوع الإجازه اللي كان يتكلم عنها ..وش شغله اللي بيسويه وهو بإجازه؟ ..حسيت ان وراه مصيبه بس ماحبيت اقول لـ سلمى شي ..
المهم انها اصرت علي ووافقت اتغدى عندها ..



طول ماانا عندها وانا اقول الله يعينها على هالبيت ,موب عشانه شين لا بلعكس



مبين ان اثاثهم غالي ومتكلفين ..



بس الراحه النفسيه عندهم معدومه ..



في كل مكان تمثال وفي كل مكان درج او دولاب ..



قلت وانا امزح:وش هالدروج كلها ؟ماكأنكم شخصين..

ـ افتحيها,افتيحها بس بيجيك صدمه..

ـ ليه؟

ـ قلت لك افتحيها..




فتحت اول درج والا فيه علب مويا فاضيه ..
وثاني درج والا فيه علب سجاير فاضيه مصففه بعنايه وترتيب
وثالث درج فيه جرايد من سنة جدي نظيفه وممسحه من الغبار..




ـ هههههههههههههههههههه من جدك والا تضحكين علي؟ وش هالخبال ؟ماعندكم زباله؟


ـ مايحب يرمي شي ,حتى علب المويا اللي شفيتها يكتب على كل وحده متى شربها ؟التاريخ والوقت..

ـ ليه طيب؟

ـ قلت لك مريض..تبين تشوفين اكثر عشان تصدقين انه مريض ,تعالي..


كان في غرفة النوم ورقه كبيره معلقه على الجدار ..
مافهمت منها شي بس ارقام واحرف انجليزيه ..



ـ وش هذا؟

ـ جدول السنه..

ـ مافهمت..

ـ الساعات اللي يدرس فيها,مقسم وقته بعنايه كل يوم يدرس شي معين بعدد دقائق محدده ..ممكن ينهار لو ضاعت دقيقه,,تدرين اليوم اللي ينقص فيه درجه وحده عن المعدل اللي يتوقعه يصير يومنا اسود ..

بالعافيه ارده لايضرنفسه ..انسان مريض كل شي عنده ماشي على الساعه ..

ـ من جد الله يعينك,,ليه صابره؟تطلقي وافتكي ,العيشه مع هالمجنون اكيد عذاب..

ـ مااقدر..

ـ تخافين منه ؟

ـ لا

ـ ليه,طيب؟

ـ احبه..

ـ طيب ,مجنون,يطقك ,ممكن تموتين ؟

ـ تصدقين انا استمتع بالطق منه ..

ـ صاحيه انتي؟

ـ وش اسوي احبه ,لدرجة اني صرت اتقبل منه أي شي ..

ـ (بمزح) اجل تحملي ماجاك..



بعد ماتركتها ادركت ان الحب يصنع المستحيل,اجل وحده مثل سلمى صغيره,وحلوه,والف من يتمناها,,وش يصبرها على هالمجنون؟الا الحب ..اذن الحب يصنع المستحيل..




في الطريق دق جوالي والا راشيل ..
كانت تقول ان فيه ناس جوو يسألون عنك ..

طول الطريق وانا افكر بطريقه انهي فيها الموضوع وامشي عمي بأقل خسائر ممكنه ..


مابي مشاكل مع الناس ..ولاابي تطلع علي سمعه شينه بالحي ...


وصلت البيت ولقيت راشيل تنتظرني عند الباب ..



قالت اني اقدر استعمل غرفة الضيوف متى مابغيت ..



شكرتها كثير ودخلت ..







كانت ضيفتي الغير متوقعه زوجة احمد ..





يوم شفتها حسيت ان همي راح ,وايقنت ان اللي بيسوي شي مايهدد..وكلام عمي وتهديداته بالهوااااا ..مايقدر يسوي شي ..



اجل واحد من العجز مايصلي بالمسجد القريب عاد كيف يسافر ديره بعيده ؟!!



رحبت فيها ..



كانت امريكيه من اصول سوريه ..جميله جداً ..واجمل من زوجها بعد ...



كان في نيتي اخليها تكون صديقتي المقربه.. لسبب قوي وهو لأنها تقريباً من نفس عمري ..واحس انها ممكن تفهم علي ..




تشتغل بالبريد وعندها ثلاث بنات و ولد واحد ..



ارتحت لها راحه عجيبه حسيتها تفكر بنفس طريقتي ..





اقترحت علي اكلمها باللغه العربيه الفصحى لأنها على كلامها نست العربي من زمان ونفسها ترجع تتكلم فيه وتقرا قرآن..





وواعدتها اعطيها دروس في وقت فراغي لو حبت ..ورحبت بالفكره ..




اقترحت علي اسهر معها في بار قريب.. لكني رفضت بحجة ان عندي كليه من بدري ومااقدر اسهر ..





وفي الحقيقه انا من قبل اسافر أخذت عهد على نفسي ان رحلتي هاذي هدفها طلب العلم في مكان بعيد وهادي فقـط..


موب لمعصيه مااضمن عمري اقدر اتوب منها أو لا..


مر اسبوع كامل وانا كل يوم احب المكان واتعلق فيه اكثر..

بيوم من الأيام طلب واحد من الدكاتره ان حنى طلبة الماستر نقوم بعمل انساني على مستوى الكليه ..


نصير قروبات وكل قروب يكون لهم نشاط مستقل عن الباقين وقال انتم احرار بالفكره اختارو اللي يناسبكم ..


شرط انه يكون عمل انساني فقط ..



كان في نيتي ادخل في قروب كله بنات ,مابي احتك بالشباب ابداً..بس للأسف ..كل قروب فيه كميه لابأس فيها من عيالنا المهبل..



استشرت ابو فهد ..وقال لي خليك رسميه ولاتعطينهم وجه كثير ..


دخلت بواحد من القروبات ..


تقريباً مااتكلم الا مع الأجانب وواحد مصري بس والباقين انواع الطناش ..


وفي اول اجتماعات القروب ..مسكت المايك بكل ثقه وعرضت فكرتي..
ولاقت ترحيب كبير واقتناع ..

فكرتي بكل بساطه ..



تنظيم رحله لدار الأيتام وتخصيص ميزانيه معينه ناخذهم فيها لمدينه ترفيهيه ونقضي معهم يوم كامل..



مر الإجتماع سريع وقسمنا الأعمال بالتساوي..وتم تعييني كقائد للقروب بناءاً على اختيارهم لي ..




زرت الدكتور في المكتب واقتنع بالفكره ورحب فيها وعطانا الموافقه..
واتفقنا على تاريخ معين بعد اسبوع واحد..



رجعت البيت وتعشيت وصليت ..وبديت استعد للنوم ..



دق جوالي ..




ـ الو..

ـ مرحبا يازهره انا خالد زميلك بالقروب..

ـ ووش تبي يازميلي بهالوقت؟

ـ زهره الله يخليك لاتتريقين والله اني جاد..

ـ جاد بإيش ,وش عندك ؟

ـ ابي اتعرف عليك..

ـ ياامي ياقدمك ,ماتو اللي يسوون هالحركات ..اقول بس روح نام ورانا شغل كثير بكرى..

ـ طيب بس عطيني فرصه..

ـ وشوله اعطيك فرصه ممكن تخليك تخسر نفسك ؟؟ياامي حتى لو تبي تتزوجني ,انا اكبر منك ..وش تبي فيني ؟ بجد بجد ,ترى الدنيا حلوه ومليانه بنات ,,واكيد الوالده هناك بالرياض تنتظرك تتخرج عشان تخطب لك بنت من سنك ..
اقول بس روح نام وراك جامعه ياامي ..



سكرت ,وندمت اني عطيتهم رقمي وقلت لنفسي اذا استمر الإزعاج بغيره..


بجد انا استغرب من بعض عيالنا ..


تصير قدامهم بنات عمهم وبنات خالهم مافيه احسن ولااجمل منهم ويروحون يدورون وحده غريبه مايعرفون عنها شي ..


الله يصلحهم بس..


ثاني يوم خبرونا في الكليه ان واحد من الدكاتره مريض ومنوم في المستشفى ..


وان الكليه قررت تعين واحد من الأساتذه مكانه يخلص لنا باقي الفصل عشان مانضيع وقت ..



كانت ماده علميه بحته ,والصراحه اني شلت هم الخبط كل معلوماتي مع الأستاذ ..



كنت انتظر في القاعه ومع دقة الساعه دخل الأستاذ,طالعت بوجهه..لا مااصدق مستحيل يكون هو ..



هو نفسه ,نفس الطول ,نفس النظره,نفس الملامح ..



الا هو ,هو اكيد هو .. كأني احاول اقنع نفسي بس نفسي ماكانت تبي تقتنع لسبب مااعرفه ..


زوج زهره ..تركي ..



كان انسان طبيعي يشرح عادي ,موب مبين عليه ابداً انه المريض النفسي اللي يجمع العلب..



اصلاً,اصلاً..لو عرفو الكليه بمرضه اول شي يسوونه بيمشونه ..


الا الصدق هو كيف تعين بجامعه مثل هاذي وهو سعودي ؟؟


مر في خيالي حلم جميل اتمنى من كل قلبي احققه ..


وهو اكون انا بعد استاذه بهالجامعه واستقر بنيورك طول حياتي ..


كان مجرد تخيل هالشي يخليني احس بسعاده مالها مثيل ..


مرت المحاضره سريعه ..

طلعت والسماا تمطر ..


ياقدمي بس عن المطر ..من متى ماشفت مطر ؟؟


كان غزير ورائع ..


ماحبيت ارجع البيت ..رحت اتمشى وادعي لأني قد سمعت ان الرسول عليه الصلاه والسلام كان يحب يدعي في المطر..



رجعت البيت واخذت شور سريع ..


طالعت بالمرايه وبدون مااحس بنفسي صرت ادندن واغني مقطع في طفولتي كنت اسمعه بأفلام كارتون..



غالي ترابك ياوطني**حبك نبض دمانااااااا
سحر انت وجمااااال**تزهر فيك آمالوووووو
غالي ترابك ياوطنييييييييييييييييييييييي
دمت ,يااملي المنشووووود..
حراً,تعلو,بنيانااااااااااااااااااااا



كنت اظن ان حب الوطن للصغار بس ,اما الكبار مايحسون فيه عادي ..


واثبت لي عقلي الباطن بإسترجاعه لهذا المقطع اني موب بس احب وطني الا اعشقه ..


مهما بعدت عنه ,ومهما كانت ظروفي وانا فيه صعبه ..




دق جوالي وكانت امي ..وبعد السلام ..




ـ ابشرك يابنيتي شفت فيك حلم زين..

ـ خير ان شاء الله ياميمتي..

ـ خير يابنيتي ماودي افسره بس ان شاء الله انه زين وفيه خير لك ..




خذي كلمي عبد العزيز له ثلاث ايام يبكي يبي يكلمك ..



ـ عمه انتي طيبه؟

ـ ايه حبيبي الحمدلله ,انت وشلونك؟

ـ عمه بابا يقول بنجيك بإجازة العيد ..وكتبنا على التقويم اجازة بابا..

ـ ان شاء الله حبيبي ..عطني اختك اكلمها ..

ـ لا انا ابيك,,,,عمه انا كل يوم انام بغرفتك عشان اشم ريحتك واتذكرك..





مدري كيف مسكت نفسي لآخر المكالمه وبكيت من كل قلبي ..


لهالدرجه صرت بمكانة امه ؟ لهالدرجه متعلق فيني ويحبني؟



يمكن ربي عوضني بعبودي ولد لي ..ومن يومها قررت اسمي نفسي ام عبد العزيز ...




مالكم بالطويله ..


شيكت بالصرافه ولقيت مكافأتي نازله ..


طبعاً كان المبلغ متواضع جداً وقررت اني ابدا اتبع اسلوب جديد في الصرف ..


يمكن اكون ظالمه نفسي شوي ..


بس اظلم نفسي ولااظلم اخوي ابو فهد مهما كان..


عياله اولى بخيره ..


وحولت له كامل فلوسه مع المبلغ اللي صرفته ..



دق علي ثاني يوم ومسح فيني الأرض مسح..



وفشلت كل محاولاتي بإقناعه اني ولله الحمد موب حاجه..



ورجع حول لي المبلغ بزياده ..



الله يخليه لي ابو فهد ..بالنسبه لي اعتبره اب موب مجرد اخ ..



من مميزات الغربه انها تخلي الشخص العادي رومانسي وشاعر ..



بهاذيك الفتره زدت قرآتي من الشعر التقليدي العامي وصرت من اشد متابعينه ومتذوقينه ..



كنت استغل أي وقت فراغ عشان اقرا في المنتديات قصائد شعرائي المفضلين ..




حتى صرت انظم قصائد بنفسي ..

المهم
جا يوم النشاط ..


كانت مسؤوليه كبيره بالنسبه لي..ويمكن مااقدر عليها ..فكره سلبيه حاولت اقاومها ..


مر اليوم طويل وصعب ..ماواجهتنا مواقف صعبه مثل ماتوقعنا بس تعبنا من المشي واللعب طول النهار ..



رجعنا الدار وسلمنا الأطفال وهم مبسوطين ووعدناهم نعيد هالرحله بأقرب فرصه تتوفر لنا ..



وانا طالعه من الدار ..دخل خالد ..



ـ وين رايحه ؟براا مطر ..خطر الطلعه اللحين اصبري شوي ..

ـ طيب ..شكرا..




جلست انتظر المطر يخف على الأقل..ودي ارجع للبيت اريح من الصبح وانا واقفه ..




كان اسلوبه غبي في محاولة فتح حوار معي ..




ـ عندك سياره ؟والا اوصلك ؟

ـ لاشكراً باخذ تاكسي ..

ـ مااظن يجيك تكسي اللحين حتى لو طلبتي ,بهالمطر صعبه يوصل بسرعه ..

ـ معليش بكيفه متى ماجا يجي ..




اتصلت بسلمى وسألتها اذا ممكن تقدر تجي تاخذني بس انها قالت ماتقدر تطلع ومعها الصغير بالبرررد القوي والمطر واقترحت علي تكلم تركي يوصلني لكني رفضت ..




خف المطر شوي وخالد مازال موجود على امل اني اعطيه وجه واطلع معه ..



قلت لنفسي مستحيل اعطي أي شخص فرصه يكون له فضل علي ..ورحت للبيت مشي..



وصلت بعد ماتغرقت ملابسي ومرضت لأن المسافه بلمره بعيده ..



طول فترة الزكام كانت سلمى تزورني يومياً..لحد ماتعافيت ورجعت اداوم في الكليه ..


فترة المرض خلتني اكشف زميلاتي بالكليه على حقيقتهم ..


على علمهم بمرضي ولاوحده فكرت تكلمني بالجوال على الأقل ..


وناقشت هالموضوع مع ام فهد كثير ..وحذرتني منهم وكأن قلبها حاس ان فيه شي ..


مرشهرين وبدت اجازة العيد ..


اخذت اجازه ثلاث ايام من الكليه ووافقو لي عليها بمنتهى السهوله,, وقدرو ان يوم العيد عندنا موب للدراسه ..



جوو اهلي ..



ابو فهد وام فهد وعيالهم والوالده ..جلسو عندي اسبوع خيالي ..



وكان عبودي اكثر واحد قضيت معه اكبر وقت ..



مشيته ووانبسط ..ويوم اخذته معي الكليه بعد ماخلصت اجازتي ..



وودعتهم وهو اكثر واحد يبكي ..



امي تغيرت من ناحييتي من بعد ماجت وشافت كيف انا عايشه ..يمكن انها صارت تثق اني قد الغربه وقد العيشه بلحالي ..



ويمكن انها قطعت الأمل بزواجي مثل ماانا قطعته, وشافت ان الغربه افضل الحلول لي ..