عشاء لذيـــذ ,,بالصــــور,,

ماشاء الله تبارك الله

السلام عليكم ورحمة الله وبركاته ,,


هذي أول مرة انزل طبق من اطبااقي ومايمنعني انزل دايم الا الكسل :42: .. الحمدلله طبخي زين واحب الطبخ جدااا وان شاء الله يعجبكم ..

الطبق الاول :: دجاج شواية في الفرن


المقادير لشخصين :
دجاجة 800 غرام
علبة زبادي (روبة)
3 فصوص ثوم مدقوق
فلفل اسود-فلفل احمر حار بودرة -ملح
ملعقتين اكل بهارات الشوي من اسناد
شوي زيت زيتون
حبة بطاطس وسط
الطريقة:
قطعي الدجاجة من الوسط من جهة واحدة بس ونظفيها من داخل وغسليها بشوي خل عشان الزفرة
اخلطي الروبة والثوم والبهارات وحطي الدجاجة فيها وخليها ساعة اقل شي وكل ماطولت كل ماكان الطعم احلى ..

اذا خلصت الساعة جيبي الدجاجة وقطعي البطاطس 4 قطع كبيرة وقلبيها في التتبيلة وحطيها في وسط الجاجة وخيطي الدجاجة زي ماكانت كأنها ماتقطعت ..

جيبي كيس الشوي وحطي الدجاجة فيه وصبي عليها باقي التتبيلة في وسط الكيس واربطيه وشقي فيه فتحة صغيرة عشان يطلع البخار ..

حطيها في صينية ودخليها فرن حرارته 180 درجة وخليها ساعة الا عشر دقايق ( ممكن تزيدي الوقت حسب فرنك) وطول وقت ماهي في الفرن كل ربع ساعه افتحي الفرن واقلبي الكيس عشان تستوي اسرع ..

اذا خلصت الساعه الا عشر اختبري الدجاجة بعود اسنان اذا استوت شقي الكيس وولعي الفرن من فوق وصبي ع الدجاجة شوي عصير برتقال طبيعي تقريبا 3 ملاعق يعطيها نكهة حلوة ولون احلى وخليها تتحمر ..

قدميها مع بطاطس مقلي او رز او خبز حسب رغبتك وبالعافية ..ولاتنسي تفكي الخيط قبل لاتقدميها :42:

الطبق الثاني شوربة الشوفان بالدجاج والطماط ..


المقادير لشخصين :
2 صدور دجاج مقطعة مكعبات
1 حبة بصل متوسطة مفرومة
3 فصوص ثوم مقطعة شرائح
حبة طماط متوسطة مقطعة مكعبات صغيرة
4 ملاعق شوفان كويكر ( وممكن تزيدي اذا تحبي الشوربة ثقيلة)
ملح - فلفل اسود
نص مكعب ماجي
ملعقتين اكل صلصة طماط السعودية
الطريقة :
احمسي البصل والثوم مع شوي زيت الى ان يصفر لونه
ضيفي قطع الدجاج وقلبيها مع البصل والثوم دقيقة
ضيفي الماجي والطماط والصلصة واحمسي شوي الين يذبل الطماط ويبدا ينهرس
ضيفي الماء والملح والفلفل الاسود

اتركيها ع النار تقريبا نص ساعه يكون استوى الدجاج ضيفي الشوفان وخليها تغلي عشر دقايق الى ربع ساعة ..

تقدم مع الليمون حسب الرغبة ..

الصورة النهاااائية .

http://m002.maktoob.com/alfrasha/up/15158167991828703795.JPG

http://m002.maktoob.com/alfrasha/up/12140860272098055151.JPG


بانتظار ردودكم وان شاء الله يعجبكم وتشجعوني انزل اطباق اكثر ..:26: