السلام عليكم ورحمة الله وبركاته
كيفكم خواتي ان شاء الله كلكم طيبين وبخير وبصحة وعافية
اتمنى من مشرفات المنتدى مايحذفوا او يغيروا مكان الموضوع عشان الكل يستفيد بليززززز
اول شئ احب اقولكم الله يبلغنا ويبلغكم رمضان لافاقدين ولامفقودين وكل عام وانتم بخير
اتمنى كلامي يكون خفيف عليكم رمضان يا اخواتي شهر عباده شهر خير غير عن باقي الاشهر كلها
لاحظت مواضيع كثير تتكلم عن وصفات ومقاضي رمضان وكيف مجهزة نفسك ومستعده ومين بتعزمين
ومن فين راح تاخذين اغراض للعيد خواتي وحبايبي انا مو ضد انك تبدعين لاهلك وزوجك برمضان ومو
ضد انك تقضين وتستعدين بس لايكون مبالغ في هذي الناحية وننسى النواحي الثانية وانا والله ما تكلمت ولا
فتحت الموضوع الي اني احبكم واعزكم واشوفكم زي خواتي ونبغى نستغل رمضان في العباده والدعاء
والطاعه
مراح اطول عليكم واقرقر كثير وباذن الله عندي الحلول وعندي طرق كثيرة عشان توفقين بين العباده والصلاة وسفرتك وفطورك وسحورك
بعض الافكار مني وبعضها من منتديات
1- خذي مع اغراض رمضان شرشف صلاة مريح وسجاده جديده وخصصي لنفسك مكان للعباده يكون مريح نفسيا لصلاة التراويح او لقراءة القران يكون مكيف وهنا راح تحسين بخشوع وروحانيه اكثر وياسلام لو المكان مبخر ومعطر
2- الحلى افضل شئ يتجهز من الليل لانه ياخذ ساعات طويلة عشان يبرد فسوية من الليل مثل الكريم كراميل . الجلي, التشيز كيك.
3- قبل رمضان بكم يوم سوي كمية من الشيرة واحفضية بعلبة في الثلاجة ,اطحني سكر بودرة للحلى وحطية بعلبة بلاستيك , اطحني كمية من البسكوت وكل بكت مطحون حطية في كيس وبعدين حطيها كلها في علبة بلاستيك في الدولاب.
4- خذي علبة ملح ناعم فاضية ونظيفه وحطي فيها دقيق لاستخدامها وقت فرد العجين.
5- اذا بدا رمضان اخرجي القلاية والخلاط والفرامة وحطيها على الرخام قريبه من فيش الكهرباء ولبسيها باكياس عشان ماتغبر ويسهل استخدامها يوميا.
6- اصنعي كشنة تكفي لمدة اسبوع واكثر وقسميها باكياس.
7- الدجاج اول ماتشترينه قسمية ارباع او انصاص وقسمية باكياس وبهري منه للبروستد او الشبش طاووق وفرزنيه.
8- كل ماسويتي دجاج خذي كمية من المرق وحطية بكيس بوقت الحاجه ويستخدم المرق في الشوربات والبشاميل والايدامات.
9- جهزي بهارات السينيبون سكر البودرة والقرفه والكاكاو في علبة .
10 - اذا راح يجيك ضيوف على الفطور جهزي صواني من الليل وجمديها مثل البشاميل والمصقعه.
11- في انواع من الحلى ممكن تسوينة وتجمدينه مثل اصابع العروس, القطايف احشيها واحفظيها لحين القلي ورشيها بشيرة, السمبوسات المثلثة الصغيرة احشيها جبن كيري واحفظيها لوقت القلي , الكبه, ورق العنب , سبيرنق رول.
12- الشغلات الي تستخدمينها دايم حطيها بدولاب لحالها اسهل وقت العمل.
13- سوي نوعين عصير في جيك عصير الربيع مثلا ويجلس يومين او ثلاثه مو لازم كل يوم تسوين.
14- لسحور اذا بتطبخين في العاده نص دجاجه اطبخي دجاجه كامله وضعي نص الدجاجه مع نص من المرقة في حافظة بلاستيك لليوم الثاني.
15- الشوربة اذا طبختي كمية كبيرة قبل لاتحطين الملح والبهارات اقسمي منها وضعيه في الثلاجه لليوم الثاني.
16- الحلى ولف السمبوسة دايم سويه من الليل علشان العصر تكوني فاضية ويخف عليك الشغل.
طبعا هذي نقاط بسيطة ان شاء الله تستفيدون منها وصدقوني توفرلكم وقت افضل بدال مايكون كل شئ فوق روسنا واحنا صايمين كمان
بالنسبة للناحية الثانية وهي العبادة والطاعه وذكر الله.
1- طبعا بما ان الشغل خف علينا شوي بعد كل صلاة الفجر الظهر العصر المغرب والعشاء نقرا بعد كل فرض 4 اوجه من القران وبكذا نكون خلصنا في اليوم جزء وكل يوم نقراجزء من القران والقران 30 جزء وكل يوم ناخذ جزء وبكذا نختم باذن الله القران خلال شهر رمضان.
2- الاستغفار يابنات فوائدة كثيرة راحة نفسية طاعه لله مغفرة للذنوب و .... فوائدة كثيرة وعظيمه يابنات عندي طريقة حلوة خذي مسبحة يكون فيها 100 خرزة بعد كل صلاة لما تقراي 4 اوجه سبحي المسبحه لفه كاملة وبكذا تكوني قراتي قران واستغفرتي 100 مرة بعد الصلاة.
ويكون محصلة يومك ختم جزء و500 مرة استغفار.
3- صلاة التراويح كثير يحبون يصلونها بالمسجد وانا مجربتها روحانية وخشوع خاصة اذا كان الامام صوته حلو بس في ناس يحبون يصلونها في البيت فبكل ركعه لوتقراين وجه من القران يكون لك فرصة في ختم القران اكثر من مره خلال شهر رمضان المبارك.
4- الصلاة على الرسول ياخواتي فضلها عظيم منها سبب لقضاء الحوائج,اجابة الدعاء, النجاة من الفقر , مغفرة ورحمه من الله,.... فكرتي هنا لما تقومين بشغلة معينه تتطلب منك الانتظار مثلا انتي واقفه تقلين السمبوسه وتنتظرينها لين تتحمر :7_2_103v:, او وانتي تجلين المواعين للي ماعندها غسالة صحون مثلي :3_13_12: في هذا الوقت صلي على النبي وكرريها وانتي واقفه مع حظور القلب طبعا وعدم السرحان والله مجربتها يابنات حتى لسانك ياخذ عليها وذكر الله يكون دايم على لسانك.
5- العشرة الاواخر يابنات نصيحة من اخت محبة لكم لاتروح كلها باسواق ومقاضي العيد العشرة الاواخر فيها ليلة مباركة ندعي الله فيها مين فينا ماعندها مشاكل وهموم وكرب تتمنى الفرج القريب من رب رحيم مين فينا ماعندها احلام او طموح ترجوا من الله ان يحققها لها جتنا الفرصة ولازم نستغلها يابنات وطبعا عندي فكرة لاغراض العيد وكيف نخلص منها قبل العشرة الاواخر عشان نتفضى لهذي الايام المباركه
1- عندك صحون التقديم وترامس القهوة وصحون الحلى وكاسات الحلى في بعض التاجرات يوصلونها لين باب بيتك عن طريق برنامج اسم انستغرام وبكذا يكون وفرتي على نفسك حق المشوار بس للامانه بعضهم يبالغون بالاسعار او انك تاخذينها مع اغراض رمضان مره واحد ويكون خلصتي منها.
2- حلويات العيد ووالمكسرات خذيها من رمضان عندك المكسرات تجيك بعلب بلاستيك ومشكلة والحلويات كمان الشوكولاتات والمصاص تجيك بعلب وخزينها بالدولاب لاتقولين اخاف تخرب او يروح طعمها طيب هيه عندهم مخزنه من سنين واذا قرب العيد طلعوها هذا من غير الاسعار الي ترتفع وقت العيد ويجيك الكيلو بسعر مبالغ فيه.
3- ملابس العيد عندك في رمضان وقت الصباح مافي احسن منه روقان ومافي زحمة ودجه زي اخر الليل صح انك صايمه وتعب لكن صدقيني تخلصي اغراضك وتفتكي من رجة السوق وزحمة اخر الليل, وماشاء الله اعرف ناس تاخذ ملابس العيد من شهر 8 مع الصيف والتخفيضات عشان تتفضى لشهر الخير والبركة.
وبس ياحبيباتي ان شاء الله ماطولت عليكم بالكلام و هذا الموضوع كتبته لوجه الله ولاني احب لكم ما احبة لنفسي و عسى ربي يبلغنا رمضان لافاقدين ولامفقودين ويعننا على ذكرة وشكره وحسن عبادته
واخر شئ خواتي اتمنى منكم دعوة في ظهر الغيب بشفاء والدتي وان يبلغها رمضان وهي في اتم الصحة والعافية
والصلاة والسلام على نبيي محمد
عفيراء @aafyraaa
عضوة نشيطة
يلزم عليك تسجيل الدخول أولًا لكتابة تعليق.
نبض طيبة
•
اضـــواء
•
جزاك الله الف خير
اللهم بلغنا رمضان اعوام عديده و سنين مديده
و نحن في طاعه و عبادة و اعنا على الصيام و القيام
اللهم بلغنا رمضان اعوام عديده و سنين مديده
و نحن في طاعه و عبادة و اعنا على الصيام و القيام
الصفحة الأخيرة