والله كان خاطريه اقولج بس للاسف ما عندي فكره
وان شاء الله البنات ما بقصرن معاج
والسموحه منج يا الغاليه

والله يا الغاليه
ما اعرف كيف السبلنغ ماله بالضبط
بس انا شفت هالاسم في المنتدى وحده كاتبته بالعربي
وبالانجليزي اكيد بكون نفس الاسم فاذا رحتي الصيدليه قولي لهم هالاسم واذا عندهم فاكيد بيعرفوه

بسم الله الرحمن الرحيم


مليتي تكشخين حق ريلج كل كل كل يوم ؟ متزوجه صارلج فتره وتبين تكشخين بس مالج خلق؟ تعالي

تعودي

تعودي تتسبحين كل يوم وتتعطرين من هالروايح الحلوه اللي على فاكهه واللي على زهور والاشيا اللي تعجبج وتعجب زوجج

تعودي تغيرين من شكل شعرج مره خليه كيرلي ومره استشوريه بالبيت ومره لميه كله ومره رفعي نصه وتعودي تلبسين اكسسوارات حلوه وبسيطه حق البيت

تعودي اهم شي هالنقطه تعودي يكون جسمج نظيف وشيلي شيره دايما ولا تخلين الشعر ينمو في الاماكن الغير مرغوبه ولو يحصلج روحي سوي ليزر

تعودي وهذي ثاني اهم نقطه انج كل يوم تحطين كريم للجسم قبل النوم ترى نعومة الجسم اهي اللي يدورونها الرياييل دوااااره ولو كنتي كاشخه من راسج حتى اخمص قدميك بس جسمج ناشف وخشن صدقيني الريال بينفر منج

تعودي بين فتره والثانيه تحطين مكياج حلو وناعم حق البيت واهتمي ببشرتج وشربي ماي وايد تعودي على شرب الماي حتى تروي بشرتج وتعودي تحطين كريمات مرطبه

تعودي تستميلين ريلج بالروايح المحببه مثل دهن العود والطيب والبخور وبخري الغرفه والصاله وحطي باقة ورد بين فتره والثانيه في غرفة النوم تعطي انطباع وتغيير كبير ومؤثر جدا جدا

لا تعودي

لا تعودين نفسج تقعدين جدام ريلج بدراعه حتى لو الدراعه عجبت امج ولا خالتج .... لان بكل بساطه هذا ريلج مو خالتج ولا امج

لا تعودين نفسج تقعدين جدام ريلج وريحتج طباخ او شمس (ماكو الريحه اللي تلزق فيج لمن تطلعين بالشمس بعز القايله؟) لان حتى لو ريلج ما يقولج صدقيني اهو متضايق من هالريحه

لا تعودين نفسج على تسريحه وحده بالبيت على اساس انها مريحتج وتخلين ريلج يشوفج كل يوم بنفس الكبه وبنفس الشباصه وبنفس صفة الماشات على القذله

لا تعودين نفسج (حتى لو بعد فترة زواج طويله) ان تخلين ريلج يتعود على منظرج وانتي لافه راسج بالحنه ولا بحمام زيت ولا بملابس مو حلوه (خلاقين) على اساس قاعده تنظفين ولا رايحه الصالون ولا ...

لا تعودين نفسج على ترك الشعر ينمو في الاماكن الغير مرغوبه وخاصة الوجه يجب ان تعودين ريلج يشوف ويهج دايم حلو ونظيف ياشين المره لي صارت اهي وريلها سيم سيم ماكو فرق


والله بنات صدقوني الكلام سهل بس الفعل اهو اللي نستصعبه .. ابدي من هالفتره من اليوم من باجر من الحين

ابدي بشي سهل وبسيط مثل التدهن كل يوم بالليل او تبخير الدار لمن تتعودين عليه وتصير عاده حلوه ما تقدرين تستغنين عنها ابدي بشي ثاني وهكذا

الغرض

انج تخلين زوجج يشتاقلج ويشتاق حق بيته وماتعطينه اي فرصه انه يقولج غيرج احلى ولا اسنع منج وراح تعودينه اهو بعد ما يطالع مني ولا مناك ولا يفكر يقارنج بغيرج


نقطه مهمه
عودي نفسج على النظافه والسناعه والترتيب ترى الكشخه مو بالمكياج ولا التشخلع ولا اللمعات ولا قمصان النوم الفنتق ... واذا انتي عودتي نفسج على هالاشيا راح تصير عندج شي عادي روتين يومي عادات محببه لريلج والاهم محببه لنفسج ماتقدرين تستغنين عنها وشوي شوي راح تحبين نفسج على نمط الحياة البسيط اليديد هذا .. وحتى لو ريلج مسافر ولا مو موجود صدقيني بتحبين انتي ..... تكشخين .... حق نفسج

والله يوفقكم يارب

انا متزوجه وا قولكم على شي لازم يجي وقت زوجك يمل ويبعد شوي شي عادي

هلا اختي ويا مرحا فيج والله

بس كيف يعني ما فهمتج شو تقصدين
ممكن توضحين اكثر
الله يوفقج يارب دنيا واخره