مع احترامي لك .. المفروض حرصتي على السؤال عنه قبل الزواج .. هذا قرار مصيري يترتب عليه حياه باكملها

بس الحين لازم تتعايشين مع هالقرار

حسب ما فهمت انك عايشة لوحدك مع اطفالك في مدينه عملك ... يعني نفس وضعك بالضبط لو كنت مطلقة
نفس الحياه و نفس المسؤوليات ما راح تتغير .. خليك على ذمته عشان لا يتشتتون اطفالك

الحين التفتي لنفسك و رتبي مصاريفك و عيشي حياتك بدون مقارنات مع الغير .. كلن له حياته و ظروفه
نفسك باثاث؟ اثثي لنفسك و دلعي نفسك .. نفسك بسفر؟ خذي عيالك و انبسطي.. طلعات؟ اطلعي و غيري جو

ربي رزقك بوظيفه و دخل .. غيرك نفس وضعك بالضبط لكن ماهي قادره حتى تجيب لها بلوزه من السوق .. و غيرك حتى الاكل مو قادره توفره و سبع البرومبه ما يصرف
اسعدي نفسك ولا تلتفتين لحياه غيرك

في البدايه ما قرئت كل الردود بس عندي نقطه حابه اوضحها لك
يمكن انتي ترتاحين صح ما اختلف معاك
لاكن اولادك هم الضحية

اشوف انه يبقى وجوده اسم في حياتك فقط يعني تعيشي عيشه مطلقه
لكن هو موجود
اذا تطلقتي راح تاخذي عيالك تصرفي عليهم خلاص نفس الشي اذا تطلقتي ماراح تعطيه قرش واحد من الان ولا قرش
اذا تطلقتي راح تشتغلي على مشروع يجيب لك دخل تشرين بيت
من الان تصير هاذي أهدافك بيت ومشروع لك خاص لا تقولين صعب خلاص قولي انا مطلقه في نفسك راح أبدا اشتغل على نفسي واحقق الي ماحققه لي
لاتقارنين نفسك ب احد عشان وبتتعبين قولي اللهم بارك لهم وارزقني واغنيني واكفني بحلالك عن حرامك
يبقى امام عياله اب وانام الناس زوج
لعل الله يحدث بعد ذلك امرا

نقطه اخيرة اذا انتي من النساء الي تنتظر رجل يحقق لها كل شي في حياتها وانتي عندك دخل ووضيفه ابشرك ماراح يتحقق لك غير الديون والقروض عشانه
لذلك كوني من النساء الي تحقق كل شي لذاتها بذاتها
اما وضيفته ووضعه غير مرموق في مجتمعك
الرسول صلى الله عليه وسلم كان راعي والسيده خديجه كانت من رؤس قريش وتاجرة معروف بين اليمن والشام
لذلك اتركي مقارنه المستوى الاجتماعي والتعليمي
واضح ان عند زوجك طموح وكمل وحاول لكن اما ماحالفه الحظ أو أن المشاريع الي يدخل فيها غير مدروسة إدريس معه المشاريع
لعل الله يفتح عليكم جميعا ويبقى لك الزوج الوفي الي شايل لك جميل مساعدتك له وتخمل ضروفه
انتي لاتحملين نفسك فوق طاقتها لا تعزين لا تتطلفين لاتوجبين حتى لو كأس طيبين يوجب من الموجود هو اذا بياخذ منك سلف يسجله

صعبة نشور عليك بطلاق !! إنتي ادرى بظروفك و ترى الأم مفروض تفكر بعيالها طالما مافيه ضرر ملموس عليها لا نفسي ولا بدني


المقصود بالنفسي يعني ما يوجه لك إهانة لفظية أو تحقير أو تفضيل امرأة عليك


بس كون أنك الآن جمعتي كل الأخطاء حتى الي صارت أول شهر ، من عشر سنين ، هذا معناه ان فيك اكتئاب بسيط ان شاءاالله و هذا يجي كل الناس تحسين أن مالك طاقة تكملين و مالك نفس ، لكن غلط ندخل أوادم آخرين بعواقب الطلاق وهو السبب نفسيتك


إذا السبب نفسيتك خلاص اجلسي مع نفسك و فكري بكل واقعية، ان وضعك الخارجي بالعكس الناس يحسدونك عليه، موظفة براتب عالي و عندها عيال وماقد سمعنا عنها مشاكل ولا انفصلوا ولا تأخرت بالحمل ولا عالجت ولاولاولا ..... و حياتها ماشيه و زوجها معطيها راحتها ماهو حكر عليها .... وغيرها من النعم ماشاءالله لا قوة الا بالله


هذا لو المقارنة مضايقتك ،،،، علمتك كيف الناس تشوفك..!!! بالله ما يستحق الحمد و الشكر هذا الوضع ؟


ثانيا ....الحريم تراك ما تدرين وش يمرون فيه.... ولا وش وضعهم مع ازواجهم... ولا وش ساكتين عليه من المصايب.


ثالثا .... يمكن انتي بمساعداتك زاد ضيقك .... خلاص قرري تقولين يا فلان تراني دخلت بجمعيه او بجمع او بقسط ... عشان بيت بخليه باسمي او عمارة بأجرها ... خليه ييأس انك تساعدينه ... و انتي بترتاحين و هو بيضطر يحسن وضعه


رابعا ...... مادام ماتبين تتزوجين بعده خلاص خليه .... خلي عيالك مستقرين يا شيخه وش لك بالشحططة.... وليه تدخلين الحزن لقلوب اعز الناس لك ؟؟؟..... ترى الاطفال حساسين جدا.... ليش تخليهم غير عن اصحابهم و اقاربهم.؟؟ وينحرمون من ابوهم كل يوم.


خامسا ... حنا اذا دخلنا فكرة براسنا خلاص معد نطلعها .... لا ما يصير ... توقفي عن النظر له بدونيه ...ترى الف من تتمنى زوجك وبتكون له احسن انثى و بتحسسه برجولته بعد ..... فاغسلي مخك من الافكار السابقة قوولي حمدلله زوجي طيب حمدلله زوجي مرن و واففق يكمل دراسته ووو ... عددي مزاياه .... و انظري له نظره زينه و اعكسيها على كلامك عنه قدامه و عند عياله قولي شوفو بابا ماشاءالله اخذ شهادة عاليه ونتو ما تبون تدرسون ؟؟... هو بيتحمس يصير افضل عشان يملا عينك اكثر


لكن اذا بتكشرين بوجهه و بتعاملينه على مضض اكيد بتنسد نفسه هو ما يدري وش كثر انتي مكتئبة .


سادسا و في الختام ترى كل الرجال لهم كبوات و تراه اشياء بالنت يعني ماراح بارتيات ولا سكر بدبي ولا شفتي بقايا حشيش و العياذ بالله يعني ما دخل بالعميق ابد فالحمدلله

أختي الكريمة صدقيني ما فيه واحد مرتاح في ها الحياة لا الغني ولا الفقير
كنت افكر مثلك احيانا عندما أمر بضائقة مالية
بس بعدين وجدت أن الطلاق ليس الحل
خليه ديكور ها الزوج معليش يا اختي
احتسبي الاجر
ليتك تشوفي حياتي بعيش مع حماتي تكرهني ويتدخل في كل صغيرة وكبيرة في البيت
وحياتي زوجي لا يشتري لي شيء بس لقيت أن الطلاق ليس الحل
سيتشتت الأولاد ستحملين لقب مطلقة في مجتمع متخلف يرى في المطلقة
المرأة الفاشلة سيشمت الأعداء فيكي
غيري حياتك باللجوء إلى الرب العلي القدير ادعي في الجزء الاخير من الليل في
صلاتك في أوقات الإجابة أن يوسع الله رزقك أنت وزوجك
الله يرزقك من واسع فضله
اقري يوميا الواقعة والطلاق والذاريات ويس ستلاحظين الفرق