هلا وغلا بكل من دخل الموضوع..
اسعدني ترشيح اختي الحبيبه مدام شرين _ ام ادهم لاكون العضوه التاليه بالمطبخ..
واتمنى اني اكون عند حسن ظنها وظن بنات حواء..
تعالو نبدا..
الطبق الاول..
حلا القهوه..
وما اعتقد ان فيه حلا قهوه احلى وادفى من التمر والزبد .. وهذا كان حلاي.. ذوبي نص اصبع زبده وحطي عليها ملعقتين كبار طحين.. واحمسيها بالزبده واضيفي له كمية تمر منزوع النوى... وقلبيهم الى ان يتجانسون وبعد كذا اضيفي له ربع بيالة حليب الشاي.. ( بوني ) وارفعيه عن النار وقدميه مع القهوه وترى هالطبق معروف عند اهل نجد..
اترككم مع الصور..
ما شاء الله تبارك الله لا حول ولا قوة الا بالله
الطبق الجانبي الاول..
شوربة الكوسى والبطاطس..
قطعي شوي بصل ودقي شوي ثوم واحمسيهم واضيفي لهم ملح وفلفل اسود وقلبيهم الى ان يذبلون شوي بعد كذا اضيفي لهم بطاطستين مقشرين ومبشورين وثلاث حبات كوسى مبشورات وقلبي شوي وبعد كذا اضيفي لهم المويه الى ان تغطي الخضار وترتفع عنه شوي بعد.. ووطي النار وخليه يستوي على نار هاديه وبعد ماتستوي اضيفي لها ملعقة كبيرة مليانه جبن سايل وملعقتين حليب بودره... وقلبي وبعد كذا شيليها من النار وخليها تبرد شوي واخلطيها بالخلاط ورجعيها للقدر مره ثانيه وسخنيها وصبيها في صحن التقديم وزينيها بشوي بقدونس.. وبالعافيه..
اترككم مع الصور
فضلا لا أمرا عدم الرد قبل اكتمال الموضوع
سلطة المقالي.. وهي من فناتكي..
طريقتها قطعي خضار منوع ( كوسى جزر بطاطس زهره ) قطع صغار واقليه.. واسلقي مكرونه.. وقطعي بقدونس كميه..
اخلطي المكرونه مع البقدونس وبعدين اضيفي لها الخضار المقلي واخلطي معها شوي ذره..
الصوص.. (ملعقة مايونيز + ملعقة جبن سايل+ ملعقة صوص الرانش+ ملعقة طحينه + بيالة مويه+ فلفل اسود) واخلطيهم و بعد كذا صبيه على السلطه وزينيه بالبقدونس وقدميها بالعافيه اخليكم مع الصور..
الطبق الرئيسي..
اكثر طبق احبه من طفولتي واطلبه دايما من امي الى ان كبرت وانا ما اقاااااااااااااومه..
الكوسى بالباشميل..
اليكم طريقتي.. فرغي الكوسى واحتفظي باللب.. وبعد ماتفرغينها اقسميها الى نصفين.. واقليها.. اما اللب قطعيه صغار واحمسيه مع شوي بصل وثوم وبقدونس وبعد مايستوي صبيه في صينيه.. وقطعي دجاج قطع صغار واحمسيه مع بصل وثوم وبقدونس ولاتنسين طبعا الملح والفلفل واذا تحبين اي نوع بهار.. وصفي الكوسى المقليه على اللب وبعدين وزعي الدجاج فوق الكوسى حبه حبه وبعدين صبي عليها الباشاميل ( كاس مويه + 3 ملاعق حليب بودره + 2 طحين + ملح وفلفل + 3 حبات جبنه ) اخلطيه بالخلاط وبعد كذا صبيه في قدر وحركيه على النار الى ان يثخن وبعد كذا صبيه على الصينيه وزينيها بالبقدونس و دخليها للفرن على حرارة 350 فهرنهايت ( كهرب ) الى اتتماسك وبعد كذا حمريها من فوق.. وقدميها بالعافيه..
وهذي صورها..
الرجاء عدم الرد حتى اكتمال الموضوع