السلام عليكم ورحمة الله وبركاته
الله اكبرالله اكبرالله اكبر
لااله الا الله
الله اكبر الله اكبرالله اكبر
ولله الحمد
كتب وانا عجلة مادريت عن المسابقة انها في ساعتها الأخيرة :06:
كثير من الأحيان تصادفنا مواقف و هذي المواقف نستفيد منها وتكون عالقة بأذهاننا لمدة من الزمن
,,,
1
عطتني طراق على وجهي
الموقف الأول كنت صغيرة بالصف الثالث ابتدائي وكنا بالطابور جت المراقبة نادت على أسامي ومنهم إسمي ومير يخفق قلبي (دق دق دق)
خايفة من المدرسة مع إني هادية ومااسوي شي ويوم قربت لمها ومير تعطين هالطراق على كفي اللي طيرت عقلي وأنا ماادري وش السالفة
وجت عريفة الفصل قالت أبلى هذي ماتركب الباص!!
وبعدها عرفت السالفة كانوا يحطون طالبات يراقبن بالباص من اللي تشاغب ويكتبون اساميهن همن يعطونهن المعلمة عشان تعاقبهن
وهالسالفة الى هالحين كل فترة وفترة اتذكرهها وقاهرتن هالمعلمة ليه تضربن وهي ماتأكدت من السالفة
تعلمت إنه لمن يجي حدا عيالي يشتكي من أخوه لازم أسأل الطرف الثاني عشان ماأروح أعاقبه وأنا يمكن أكون ظالمته
أو أي أحد لازم نتأكد من جميع الأطراف عشان ماتظلم أحد
2
لاأثق بالشغالات
الموقف الثاني قبل ماأتزوج كنت أذكر وحدة توفت بنتها وهي أصغر من سنتين والسبب أنها طاحت من الشغالة من عند الدرج وماتت وهالموقف ماأنساه
واللي خلاني ماأقدم على وظيفة بعد تخرجي
فمن هالموقف تعلمت إني ماآثق بالشغالة
فإما إنها قد تكون حاقدة وتسوي شي بعيالي
أو تكون جاهلة فتهمل عيالي بسبب جهلها
صح واجب علي إني أعاملها بمايرضي الله لكن لايمكن إني آثق فيها وأعطيها عيالي
3
ماأحرج عيالي عند أحد
مرة رحت أزور احد قرايبنا وكان ولدي صغير وقام يسحب الشنطة ومير أهوشه قلت له لاتسحبها بالارض ارفعة
ياعمري قرب لمي وقال لاتفشلينن قدام هذولا يقصد عيال صغارين حوله
وبعدها خلاص صرت ماأقوله شي هو وإخوانه قدام أحد ودايما أعطيهم الملاحظات اما قبل مااطلع من البيت أو بعد مانجي
وإذا استدعى الموقف بسرعة أكلمه على جنب بحيث مايسمعنا أحد
وهذي النقطة ألاحظها ببعض الناس
يحرجون عيالهم قدام الناس
إلى درجة انه البعض يرتبك إذا تكلم أحد والدينة ببعض المواضيع لأنه يخاف أنه يحرجه
,,,,
4
أكون واثقة من نفسي
مرة دخلت دورة إلقاء وكل وحدة ألقت قدام باقي البنات
هذاك اليوم بعد ماألقيت قالت لي وحدة ليه تلقين باللهجة العامية ليه ماألقيت بالفصحى!!
قلت لها أحب علي باللهجة العامية ومااحب إني ألقي بالفصحى
وشي ثاني أنا ماني متوظفة بمكان رسمي عشان يستدعي إني ألقي بالفصحى
قالت لا أحسن بالفصحى!!
مع أنه يوم ألقي كانوا البنات يتكلمون بشوي شوي ويوم سمعوا كلامي ومير تطير عيونهن بي يسمعن وش أنا أقول حتى إني ارتبكت من عيونهن
وجت هي قالت لي عن إلقاها
بصراحة مافهمت من إلقائها شي
يمكن لأنها ماوصلت المعلومة أو لأني ماحبيت طريقة القائها لأنها بالفصحى المتكلفة
فقلت لها مافهمت
البنت تغير وجهه
وشلون مافهمتِ
قلت ايه مافهمت لاني يمكن ماانتبهت لك
المهم مايستفاد
إني إذا أحد انتقدن بشي إني ماأفتقد ثقتي بنفسي
فربما هالشخص جاهل مايعرف
أو أنه يرى أن تكون بطريقة ثانية أفضل بحسب رأيه هو
لكن أنا أهم شي أعرف وش اللي يناسبن
فأنا أعرف بنفسي من غيري ووش الطريقة اللي تصلح لي
5
ماأتكلم عن خصوصياتي الزوجية
أحيانا نتجمع مع القرايب
بعض الحريم تكون عندها ظروف ومشاكل مع زوجها وتجي تتكلم عن مشاكلها وظروفها والحريم فاتحات اذانيهن يسمعن وش تقول وبس
وش يقولن لها الله يعينك أو يسبن بزوجها
وأحيانا إذا كانت ساكته يسألنه وش صار عليك أنت وزوجك !!
وغير كذا عيالها بينحرجون من الناس عشان أسرارهم ومشاكلهم طالعة برا
وهالحريم عندهن من المشاكل لكن مايعلمن أحد
مايستفاد من ذلك إن الوحدة ماتقول مشاكلها إلا إذا شافت أحد حكيم ممكن انه يحل مشكلتها أما أنه أصير سالفة وسعة صدر للحريم لاوالله خلهن يوسعن صدورهن على شي ثاني موعلى حياتي
6
ماكل شي أقوله عن حياتي
أذكر مرة مجتمعين وعرفت من وحدة انهم قايمة الساعة ثمان قلت ماشاء الله تقومين ثمان؟؟
قالوا الحريم كم تقومين أجل
قلت بالاجازة الساعة عشر طبعا ماعندي أطفال ولامسؤولية كبيرة اللهم اني كنت طالبة وكنت يوميا أقوم لصلاة الفجر أصلي وأجهز فطور زوجي واتلبس وأروح بالباص لأن الكلية بعيدة عن بيتي
وإذا جاء الاربعاء خلصت أشغالي وأطلع بالليل والخميس بعد نفس الشي أطلع والجمعة أكوي وأطالع دروسي
المهم فرصتي الخميس والجمعة أنا م الضحى لأنه ماعندي شغل كثير
ومير بعض الحريم يضحكن لااااااااااه لازم الوحدة تقوم بدري!!!
وبعد كم شهر وحدة من هالحريم ولدها ترقد بالمستشفى صدره تعبان هو بثالث ابتدائي والسبب
ان طلع للمدرسة ومالبس شي ثقيل يغطيه عن البرد
طيب أمه وينها؟؟
أمه ماتقوم لعيالها الصبح تحط عندهم الساعة وهم يقومون ويروحون للمدرسة من غير ماتشرف عليهم!!!
تعلمت إن بعض الحريم يتميلحن ويحبن يسوّن أنفسهن إنهن سنعات ويحبن ينتقدن بكل شي
لكن هذولي تحاولين ماتقولين لها وش عندك ,,ولاتقولين لها خصوصياتك واذا تصرفت تصرف خطأ تناقشينها وماتسكتين عشان ماتغتر بنفسها وتحسب انها أحسن الناس وانهم مايدرون عنها
7
أحتسب مساعدتي للناس من أجل الله
مر علي موقف غريب أخوات حصل بينهم خلاف وخصام
جت وحدة وقالت لها انا وقفت معك بمحنتك وساعدتك وقدمت لك و و و
جات الثانية رجعت لها كل المساعدات اللي ساعدتها
وقالت لها ماأبي منك شي !!
تعلمت من ها لموقف إني إذا ساعدت أحد قريب أو بعيد أن يكون خالص لوجه الله وليس من أجل ان تذكره لي في يوم من الأيام
وأن يكون تفريج لكربة مسلم
وان احصل على العائد من الله وليس من البشر
وأيضاً
أحhول بقدر الإمكان إني ماأطلب من أحد شي إلا في حالة الضرورة
,,,
8
الجلسات الغير مفيدة ماتلزمن
تعرفت على بعض الجيران ببيتي اللي قبل لكن شفت بعضهم جلستي معهن نقص علي
أكثر جلستها حش وغيبة وفلانة قالت وعلانة فعلت وبعد الجلسة أفكر وش استفدتمن هالجلسة!!!
مااستفدت شي
فصارت علاقتي بالجيران تكون رسمية مااجتمع مع وحدة بلحالها عشان ماتصير فرصة للحش
فإذا كانوا مجموعة يقل الحش وما تقدر الوحدة تاخذ راحتها ويكون اكثر حكينا عن عيالنا وأمور حياتنا
وسلام بالتليفون وارسلهم ويرسلون لي وبس
9
الاهتمام بالصغار
اذكر وحدة شفت يد ولدها منفخة والسبب أنه الولد الصغير أمه تغسل له مسك الحنفيه وهي حارة لانه كان بالشتاء ومشغلين السخانه
والولد يصيح وامه ماتدري ليه يصيح وعرفت بعدها وش سبب صياحة بعد ماانحرقت ايده
بعدها صرت أحاول انتبه لعيالي بكل وقت وماأخلي الصغير يدخل دورة المياه عشان مايفتح الحار
وبكل شي بالبيت الصغار محتاجين عناية ومتابعة ومانتكل لاعلى الشغالة ولا على عيالنا الكبارين لانهم مهما كان مايتكل عليهم
10
خلك طيب مع الناس ولاتصير صحيّح
بعض الناس أحيانا تتعاطف وتساعدهم وقت محنتهم لكن بعضهم يستغلونك ويبون هالمساعدة بشكل مستمر لو على شي تافه
وعرفت ان الناس ماهي سوا
ناس تقدر هالشي وناس تستغل هالنقطة
يعني بعض الجيران يكونون على قد حالهم وتعطيهم اللي تقدر عليه اذا طلبوا شي
لكن هم زودوها حتى بلسم الشعر طلبوه!!
وعلمت عيالي إن مو كل الناس تساعدونهم ساعد على قدر حاجة الشخص
مثلا اذا كان احد يبي من ولدي انه يرجعه لأهله لأن أبوه مسافر أو مشغول مافيه مشكله
لكن مايساعده بشكل دايم ويكون سواق له بأي وقت يقول له تعال ودني وتعال جبني
فبعض الناس ماهم عارفين يفرقون بين صحّيَح وبين طيب
الصحيَح هو اللي يمشونه الناس على كيفهم حتى لو هم ماهم محتاجين
والطيب هو اللي يساعد الناس على قدر حاجتهم
11
من برالوالدين عدم التكلم عليهم بسوء
أحيانا وحدة يكون عندها خلاف مع اهلها وتجي تتكلم على أمها وأبوها بكل مجلس وأحيانا عند الحمولة!!!
طيب هالناس بينفعونها وهي تتكلم على أهلها
الأم والأبو لهم قدرهم وإحترامهم ومن أعظم برهم إننا منتكلم عليهم بسوء
لكن لو عندك مشكلة مع امك مثلا تروحين لأحد عزيز عليها وممكن توجهك أو هي تكلم أمك في حالة إذا كان خلاف بينكم
لكن تتكلمين عليها قدام الناس مصيبة
وأشد شي شفته قدامي حرمة متزوجة وكان فيه خلاف بينها وبين أمها والله إن البنت ماأستقبلت أمها زين وأحرجتها قدام الحريم هذا غير الكلام اللي تتكلمه عنها!!!
الحمدلله والشكر
مايستفاد وشلون تبين ربي يوفقك بحياتك وانت هذي تصرفاتك مع أمك
هذا غيرالناس اذا شافوا منك هالتصرفات بينتقدونك أنت ولا راح يعذرونك وخاصة حمولتك
واذا صار بينك وبين حمولتك شي قالوا هذي أصلا مافيها خير لأمها
12
التقرب للأبناء
بعض الأسر تضغط على عيالها وتهمشهم إلى درجة أن بعض الأبناء يطلعون أسرار أهلهم
وكثير منهم يحاولون بعيالهم وينبهونهم انه مايطلعون خصوصياتهم لكن مافيه فايدة
وهذا خلاني أتقرب لعيالي وأعلمهم انه خصوصياتنا ماتطلع لأحد
وأقول لهم هالحين هاللي تكلم عن أهله تاثق أنه مايتكلن عن أهلك
وأنا بالمثل خصوصيات عيالي ماأتكلم فيها عند أحد
13
الصدقة عن الوالدين
وحدة أعرفها أمها مريضة
والمرض هذا الله اعلم ماله شفاء يعني مرض نفسي
البنت صارت تتصدق عن نفسها وعن امها
لكنن سبحان الله الأم بعدها صارت مرتاحة نفسيا وراضية بما كتبه الله لها وتحس بالراحة والطمأنينة
وأيقنت انه بسبب التقرب إلى الله والصدقة ارتاحت الأم
لذلك مهم التصدق والدعاء للوالدين عسى الله يرزقنا برهم
14
ماأخلي نفسي وعيالي مهرجين للناس
بعض الحريم يعلقن على عيالهن ويقللن من قيمتهم او على أنفسهن وهالشي يخلي الناس يقللون من قيمتها
واذكر موقف مر علي ولدي الصغير كان أكثر اللي حوله بنات وجت وحدة لبسته فستان ودخل ولدي يضحك فرحان بهالفستان وكان المقصد للتهريج والضحك وعلى طول جيت وفسخت الفستان وجدعته والبنت طبعا إنحرجت من الموقف وماصار بيننا أي كلام أو عتاب يكفي تصرفي خلاهم يعرفون إني ماأسمح لأحد أنه يخلي عيالي مهرجين لهم
15
الجليس الصالح
اذكر كنت بثالث متوسط جالسة مع شلتي بالفصل والمعلمة كانت غايبة وجتنا وحده بنفس الفصل وجلست معنا طبعا تبي تسولف معنا والا شوي وقامت تتكلم كلام فيه قلة ادب المهم حنا ماعطيناها وجه قمنا تلفت عنها وماعطيناها وجه وهي انحرجت منا وقامت من عندنا وماعادت تجلس معنا
مايستفاد أنه من الأول البنت اللي عليها حركات بايخة على طول لاتعطينها وجه عشان ماتخرب طبعك والرسول عليه الصلاة والسلام حذرنا من الجليس السوء
16
صادفت ناس فيهم صفة غريبة
اذا كان بينك وبينهم مشكلة حرضوا كل اللي حواليك عليك ويحاول يذكرهم بمساؤك ويحاول بقدر الإمكان ان الناس ماتمشي معك ولاتكلمك
وهذي الفئة بعد ماعرفتها صارت علاقتي بها رسمية ومهما حاولت انها تشوه صورة أحد قدامي ماأتجاوب معها فأنا عندي فكر وعقل أعرف من أجالس ومن أخالط لاوالعجيب اذا شاف مصلحه مع هاللي محاربهم رجعوله بدون تردد :09:
واخيرا
إني ماأحقر نفسي وأقول يمكن ماأفوز بالمسابقة :D
أعطي نفسي فرصة
وإن مافزت فإفادة أخواتي لما عندي من تجارب واحتساب الأجر هذا أهم مكسب
دعواتكن لي ولذريتي ولزوجي ولوالديني
والله يسر امركن ويفرج كرباتكن ويسهل طريقن
وصلى الله وسلم على سيدنا محمد وعلى آله وصحبه أجمعين
لكن وش سالفة م/س ؟؟؟ في اغلب المواضيع ههه