عطوني رايكم انتم مثلي ملاحظين هالشي!!!

السلام عليكم
فيه حاجة ملاحظتها يابنات مدري انتم مثلي او لا
مرتين رحت لسيتي ماكس ولاحظت
اذا كانت اغراضك كثيره يزودون قطع ملابس في الفاتوره علشان ماتنتبهين وتدفعين قيمة كم قطعة وانتي ماشريتيها وللاسف ياخذها العامل الي مايخاف الله
المره الاولى كنت في سيتي ماكس في احد المجمعات الكبيره في الرياض
ولقيت حاسب لي قطعه ب٤٥ ريال زياده وانا ماخذتها
وطنشت مارجعت لهم
وامس رحت لسيتي ماكس في شرق الرياض
وشريت اغراض كثيره
واستغربت الفاتوره ورجعت للبيت طلعت الملابس وجلست احسبها طلع حاسب لي قطعتين زياده ماهي موجوده معي وقيمة القطعتين فوق ٧٠ ريال
هذا الي قهرني بأي حق يلهف ٧٠ ريال
ورجع زوجي اليوم الصباح لهم واخذ الاغراض والفاتوره وكلم المدير طلع بريطاني وجلس يحسب الملابس ويشوف الفاتوره مستغرب ومصدوم كيف صار كذا قال اول مره يجي احد يشتكي قال زوجي هذي ماهي اول مره وبفرعين مختلفين وعلى طول رجع لنا الفلوس الي اخذها العامل بدون اي وجهه حق
الي حابه اوصله لكم انتبهوا يابنات من محاسبين سيتي ماكس انا رحت لمحلات كثيره ولا مره صارت معي بس بهالمحل
ياليت تراجعون الفاتوره ماهو يستغلونا هالأجانب بالله اذا كانوا معتمدين هالطريق كل وحده مشترياتها كثيره يسرقون منها بطريقه غير مباشره علشان ماتنبه امانه في اخر اليوم كم يطلع اتوقع فوق ثلاث الاف ريال يوميا ويمكن اكثر حسبي الله عليهم