عــــزاء لــــيــــلة زفــــــــــــاف

لقد تم بحمدالله اصدار ديواني الثاني أسمه (آهــــــــات مــنــثــوره)أغلبه قصص حب حزينه أخترت منه هالقصيده عساها تنال أعجابكم
عناونها((عزاء ليلة زفاف))
عزاء ليلة زفاف
بطلته سحرٍ عجيب يلف راس كل من يشوفه
الطبع شهم والأصل طيب سبحان من كمل وصوفه
حبه تربع بالحشى من عمري توه كان صغير
وفي دربه قلبي كم مشى ولا زال يواصل المسير
كل يوم أقوم مع الطيور لأجل أصطبح بوجهه الصبوح
بنظرته أحلى فطور وأحلى شذى بصبحه يفوح
مرت علينا السنين أكبر وحبي له يزيد
شوقي كبر وزاد الحنين ومااشوفه إلا من بعيد
مو بس أنا كل البنات عنه هم دوم يسولفون
من كثر ماهم معجبات لا مر كلهم يسكتون
بس هو كان طبعه ثقيل مايعطي وجه لهم أبد
وقلبه لي وحدي يميل وعطاني بصمته وعد
كنت أنتظر وقت الوعد متى يجي لدارنا
وأفرح بقربه وأنسعد ويصير هلي مو جارنا
فجأه تغير صاحبي! ماصار يمر نفس الطريق
ومن غيبته وشصار بي أشعل بقلبي نار حريق
بدمعتي أرسلت حروف تبكي وتشكي حالتي
وأسأله وشنهي هالظروف وأرجوه يردعلى رسالتي
ماجاني منه أي جواب ولا كنه لمرسولي قرا
رحت أسأل ناس منه قراب قالو سافر ولك ماطرا
بكيت دم من حسرتي وحلم السنين إللي أنهدم
وشكيت منه لدنيتي ومن قلبه إللي إنعدم
لملمت جرحي العميق ودفنته بتراب القهر
وقلت من حبه بفيق ومن تسليه بطول العمر
هجرنا البيت القديم لأجل أهجر الذكرى معاه
وأداوي الجرح الأليم أللي بإيدينه هو رعاه
مرت سنه كنها سنين كنها عمر كنها دهر
وبداخلي شكوى وأنين والآم من طول السهر
قررت أهجر حظي التعيس وأدور للقلب العلاج
ووافقت على أحسن عريس وعجلت بأمور الزواج
وقرّب موعد حفلتي والكل فرحان وسعيد
وأنا لوحدي بغرفتي أبكي على حبي البعيد
وأناظر حولي الشموع وأصوات فرح وزغرده
ومن داخلي تنزف دموع واسمع بقلبي له صدا
وبراسي أفكار تدور كيف إللي حبني لي هجر
تمر أيام وشهورلا سؤال منه ولا خبر
قررت أختم قصتي وأكلمه مره أخيره
وأبين أنّ دنيتي تزف لي فرحه كبيره
قلت لازم إني أقهره وأحسسه بذنبه معاي
وقلبه هالليله أسهره وأعذبه بذمي ودعاي
وإني من بعده بعيش وهو مو آخر مناي
وبلاقي أحسن منه عريس وبقربه يتحقق هناي
دقيت وقلبي بسرعه دق وحقد وشوق فيني أختلط
شوي أقسى شوي أرق وأحس سواتي شي غلط
تكلمت وإيدي ترتجف وجاني الرد صوتٍ غريب
عن صوت حبيبي مختلف سألته وبقلبي نحيب
أبي فلان لو سمحت بسرعه ودي أكلمه
وبصوتي المخطوف قلت :خبر حلو بعلمه
رد بعجب:أنتي مين !وليش عنه جيتي تسألين!
لو هو مزح لاتمزحين ردي بسرعه وشتبين؟
قلت بصراخ هووين؟لسه مسافر أو رجع؟
قله فلانه بكلمتين تبيك وخطي بينقطع
صابه صوتي بذهول وبصدمه رد وهو حزين
أنتي فلانه!!وشأقول توك عنه تسألين!!
دمي نشف وقلت له :أرجوك قول لي أنته مين ؟
وصرت منه أرتجف بسرعه قول وقتي ثمين
كمل حكيه:أنا أخوه وأقرب صديق ومنه عنك يا كم سمعت
وكم قال لي انه يبيك ومن شوقه عيونه دمعت
تمناك له ودربه معاك يكمله
بس الله له حاله ماكان يجمله
فجأه علينا هوتعب ولعلته مابه شفى
وياحاله مره صار صعب وسافر عن الكل وأختفى
ووسط المرض وبين الآلآم قرر يخليك بلا وداع
وبتنساني قال مع الأيام وتظنني شخصا خداع
ورغم الوجع كان يذكرك ويدعي لك بالحظ الجميل
وخوفه لاموته يفجعك أو دمعتك لأجله تسيل
واليوم جيتي وهو.. راح وآخر وصيه يرتجيك
من قلبك يطلبك السماح لوقصر عمره إنه يجيك...
وفجأه! وسكت ومعاد سمعت غير شهقته
عيني جمدت وأذني بكت وراحت لقلبي وشقته
وروحي بقت وسط الألم وسط الجرح وكلي اهات وذهول
ورجلي مشت وسط الفرح وسط أصوات الطبول
كلهم وراي يمشون ولي يزفون
وأمشي بعزاي وأنتظرهم يدفنون
ياطرحتي صارت كفن,,يافرحتي اليوم تندفن
قلبي أللي مات وفرحي أللي فات وهوبسكات خلاني وراح بعده((رفات))