عُـــوَّانـــة .. وحـــتـــاتـــهـــا بـــعـــيـــد ..

عُـــوَّانـــة .. وحـــتـــاتـــهـــا بـــعـــيـــد ..

أكيد كلكم تريدون تعرفون معنى عُوّانة ..!! .. أتوقع أن الإسم دارج

في كل دول الخليج بس بعد ما أقدر أجزم إذا دارج أو لا ..!!

المهم يا طويلات العمر .. في دار زايد طيَّبَ الله ثراه معنى العُوَّانة

هو النخلة الطويييلة وااايد وعشان جذا إذا حتت رطبها أو تمرها طرحته

بعيد عنها يعني مش في محيطها ويمكن توصله إذا كان فيه ريح إلى المزرعة

المجاورة .. إن شاء الله وصل المعنى .. إذا بعده المعنى مش مفهوم زين تراني

حاظرة أشرح مرة ومرتين وألف ..:a_smil08: أكيد تتساءلون شو مناسبة هذا المثل ..

ترا العنوان من الأمثال الشعبية عندنا في الإمارات .. مواصلين معاي ولا توهتكم ..!!

متى ينقال هذا المثل ..؟؟ .. فيه أشخاص إذا أحد من عايلته؛ أهله أو أي أحد يقرب

له إذا طلب منه خدمة تلقينه يطلع مليون عذر أنه ما يقدر يساعد أو عنده ظروف

تمنعه أو أو أو؛ طبعاً ما يغلبه يطلع نفسه في الأخير أنه ما يقدر .. :huh:

لكن .. إذا انطلب منه نفس الطلب من أشخاص ما يقربون له أو يمكن يقربون

له بس وضعهم عنده غير تلقينه ينفذ المهمة في لمح البصر بس عشان ينمدح

وينقال عنه فلان سوى وما قصَّر ويا حافظ عليه .. :biggthump

يعني خلاصة الكلام شو تتوقعون ..؟؟ ..

هل صاحبنا المذكورة صفاته أعلاه يخدم لوجه الله ولنيل الأجر والثواب

من الله ..!! .. أم يخدم عشان تمدح فيه الناس ويكون له صيت بينهم .. !!

شو الأهم السمعة بين الناس ومدحهم ولا عمل تبتغي بها وجه الـلـه

عزوجلَّ شأنه .. في أيامنا يا كثر هذه الأصناف؛ نسأل الله لهم الهداية

والصلاح .. على قولتهم في البيت يتسدح وعند الناس يتمدح ..!!

الصراااحة أنا شفت من هالعينة وااايد ربي يصلح حالنا وحالهم ..

بيني وبينكم ما أحب حتى أتعامل مع هالعينة ..:angry2:

أنتظر مداخلاتكم حوائيات عالمي الجميل ..