علاج الخطوط البيضاء بالليزر (الأحدث: رولوم، كوولبيم)

السلام عليكم وصبحكم الله بالخير بنات

كيف الحال عساكم بخير ؟ وبادش في الموضوع على طول ..
الله يسلمكن أنا صارلي مدة أتابع منتدى أو بالضبط جروب في الياهو مخصص للسترتش ماركز أو علامات التشقق، وطبعا فيه ناس وايد يدخلون ويتكلمون عن محاولاتهم في التخلص من هالخطوط، بس في الفترة الأخيرة دخلن ثنتين من البنات، وحدة منهم قالت إنها بتبدأ في جلسات ليزر جديد اسمه الكوولبيم Coolbeam، وهذا من خلال قراءتي ما صارله سنة سنتين وهو مخصص بالذات للتخلص من الخطوط البيضاء القديمة ويشتغل على دعم البشرة لانتاج الكولاجين، يعني موب الحمراء ونتائجه جداً مشجعة بس إنه بعده تحت التجربة، والبنت الثانية قالت انها بتدخل في تجربة طبية وتقدمت لها وفعلا قبلوها وهي عبارة عن علاج الخطوط البيضاء بليزر يشبه الرولوم Relume ويشتغل على دعم البشرة لانتاج مادة الميلانين وهي المسؤولة عن تلوين الخطوط وإرجاع لونها السابق، يعني باختصار الكوولبيم يقوي البشرة والرولوم يرجع اللون.

عاد الله يسلمكم البنت اللي خضعت للعلاج بالليزر اللي يعيد التصبغ للبشرة خلصت من فترة وحطت لنا صورها قبل وبعد وبصراحة انصدمنا ! هي تقول ان التطور اللي حصل لها تقريبا 85 بالمية ولما سألوها عن هالليزر وين موجود قالت موب مهم اسم الجهاز نفسه المهم إنه يشتغل على صبغة البشرة أو بالضبط على أشعة الـ UV and UVA، وهذا قالت موجود في معظم مراكز وعيادات البشرة المتقدمة والعلاج به ما يستغرق أكثر من شهر شهرين.

وهذي صورها قبل وبعد وإن شاء الله إذا ودكم راح أحط ردودها وشرحها الكامل لطريقة العلاج مترجم للعربي، بالمناسبة الصورة الأولى من بعد أول جلسة وتقول أنه شيء طبيعي لون الخطوط يغمق فيها بشدة من بعد ماكانت بيضاء بس عقب يبدأ يتمازج مع لون البشرة مثل ما صار في الصورة الثانية من بعد ما انتهت من الجلسات كلها.