بسم الله ماشاءالله
السلام عليكم ورحمة الله وبركاتة
اخباركم صبايا
جيتكم اليوم بموضوع عن علب لحفظ الورقيات وأي شي يتعلق بـ الأكل عموماً
بس أنا اشوفها لحفظ الاشياء عموما أياً كانت
وجبتلكم معها بعض المعلومات من عندي
هذي هي العلب شفتها بكارفور واعجبتني شريت كم حبة اجربها ورجعت بعدين شريت زيادة
طبعا فيه اشكال ثانية واحجام ثانية وفيه احجام أكبر بس انا خذت اللي حسيت إني بستفيد منها واللي اشوفها سهلة التخزين
وعلى قد مشترواتنا.. وإلا فيه علب كبيرة تنفع للورقيات ولحفظها فـ الثلاجة وتنفع للعائلات
اللي عليها صورة بصل اخضر شريتها للبقدونس والكزبرة والله يابنات انها تحفظها لمدة اطوووول
بالعادة الكزبرة والبقدونس تجلس اسبوع او أسبوع وشوي ثم تصفر وتخرب مع إني حافظتها في علبة ولافتها بمناديل
لكن مع ع العلبة جلست حول الشهرين خصوصاً إني استخدم شي بسيط منه فـ الطبخ
ورجعت اشتري نفس هالعلبة للبصل الأخضر عشان الورق الأخضر حقه يطول مايخرب لأني احب استخدمه.
واللي عليها صورة اسباقيتي فـ الصورة اللي قبل خليتها فعلاً للاسباقيني بس مافرغته فيها ..
لا الكيس اللي استخدمه ويبقى منه وبيكون مفتوح احفظه فيها لوقت الاستخدام منها ماينكب ومنها مايدخله شي..
وافكر مستقبلا اني فعلا افرغ اكياس الاسباقيتي فيها بس انتظر لين يخلص اللي عندي
واشتري كم كيس من نوع واحد لأن اللي عندي الحين اسبقتيات منوعه ومااحب اخلطهم
لأن لكل نوع مدة تختلف في الطبخ عن الثانية.
نجي لبعض استخدامات العلب:
* عني استخدمتها لبعض الورقيات وحفظتها فـ الثلاجة
* استخدمتها للكوكيز.. اسويه واحفظه في وحدة من العلب ويجلس تقريباً شهر
طريقة الكوكيز .. المقادير: كوبين وربع دقيق، ملعقة صغيرة صودا (مو مهم)، نص ملعقة صغير ملح، كوب زبدة طريه (يعادل اصبعين زبدة اتوقع وسط)، ثلاث ارباع كوب سكر ابيض، ثلاث ارباع كوب سكر بني، ملعقة صغيرة فانيلا، بيضتين، قطع الشوكلاتة هيرشيز ع قد ماتحبون وممكن تضيفون بعد أي نوع من المكسرات اللي تحبونها كاجوا، عين جمل، لوز..... الخ
الطريقة: نسخن الفرن ع درجة 200 تقريبا ونخلط الزبدة مع السكر الأبيض والبني والفانيلا لييين تتجانس نضيف البيضتين ونكمل خلط بعدين في صحن ثاني ننخل الدقيق والصودا والملح عشان يتداخلون مع بعض ثم نضيفهم بالتدريج للخليط يعني نضيف نخلط ثم نرجع نضيف ونخلط لين تخلص كمية الدقيق ونخلطة زيييين لين يتجانس مررره بعدها نضيف الهيرشيز والمكسرات اذا تبون ونخلطها شي بسيط بس لين تتداخل مع العجين بس مانطول عشان ماتذوب لانها قطع شكولاته بعدها هاتي صينية وحطي عليها ورق زبدة شيلي بالملعقة مقدار معين وحطيه ع ورق الزبدة واتركي مسافة وحطي نفس المقدار لكل حبه عشان يكونون قريبات من حجم بعض وعشان يستوون بنفس اللحظة ودخليه الفرن من 8 إلى 10 دقايق او لين يصير لونهم ذهبي او بني فاتح وتحسين انها استوت ممكن تغرسين عود اسنان او سيخ خشب للتأكد..
بعد ماتطلعينها من الفرن خليها برا لين تبرررد تمااامااا اول ماتطلعينها بتكون لينه زي الكيك مع الوقت ولما تبرد بتتغير ليونتها وبتصير كوكيز صح.
وصحتين وعافية وترى االكمية كبيرة
وهذا صورة غلاف الهيرشيز وطريقة الكوكيز مكتوبة خلف غلافه
وهذي قطع أو حبوب الهيرشز
موجود في السوبرماركات.. موجود في كارفور بـ 16 ريال تقريباً ويكفي استخدامه لكذا مره
* استخدمتها بعد لكرات التمر.. طريقته: تمر معبوط (مطحون – مفروم) يجي جاهز عند محلات التمور وموجود في البقالات نجهز زبدة وانا استخدم زبدة طريه نسيحها شوي ع النار ونجيب كل انواع المكسرات الموجودة في البيت أو اللي تحبونها انا جبت صحن كبير وفرقت فيه من كل شي شوي جوز هند، بسكوت شاهي مكسر أو مطحون، سمسم، لوز مبشور. وفي صحن ثاني نطلع كمية من التمر بعدها ناخذ شوي تمر في يدنا نكوره ثم نغمسه في الزبدة ثم في واحد من المكسرات ونعيد الكره كل مره مع نوع من المكسرات وهكذا.. شكلها حلو وتقدم مع القهوة وممكن تنوكل وقت الجوع وتنفع للعزايم بس لازم معك كذا وحدة تساعدك عشان ماتملين.
االكمية اللي عندي توها مخلصه باقي كم حبة سمسم بس ولا كان صورتها لكم
بس إن شاءالله بنزل طريقتها بالصور فـ المنتدى متى ماربي كتب إن شاءالله.
* استخدمها بعد لحفظ البواقي من البهارات العدله.. طبعا لما اشتري بهارات عدله هيل ، مسمار، ورق غار، دارسين... الخ
واعبي العلب بيبقى منها فأنا أخذ هـ الأكياس الباقيه واحطها داخل وحدة من العلب واسكر عليها واحفظها فـ الدولاب لوقت حاجتها.
* استخدمها بعد لكراتين الشاهي وغيره
لما نشتري كرتون شاي ليبتون يكون داخل الكرتون ثلاث كراتين صغار اخذ كرتون واحد منها والباقي ادخله في الدولاب وهالكرتون بعد الفتح احطه فـ علبة عشان يحفظه من الغبار والحشرات وأي شي وهذي صورة للتوضيح:
ممكن تستخدمينه لأدوات الخياطة مثلاا، او للأفياش اللي ماتحتاجينها دايم، او للشواحن، ممكن نستخدمها للكراكيب الصغيرة واللي مانحتاجها دايم ووقت مانحتاجها نعرف وين نلقاها، ممكن نستخدمها للقطن مثلا، وممكن نستخدمه للشبسات والمكسرات وغيره ممكن نفرغهم فيها مثلا او نحفظها بأكياسها المفتوحه جواه، ممكن نستخدم العلب الطوال لأشياء اطفالنا مثل الألوان الخشبية وغيرها وممكن نشتغل ع العلبه من برا ونغير شكلها ولونها ونستفيد من مميزتها في الحفظ لأنها تتقفل وتنفتح يعني اللي جواها مافيه أمل ينكب منها ومافيه أمل شي من برا يدخل جواها وهذا سبب حفظها للورقيات الهوا مايدخل واللي جواها مايندي.
الأفكار كثيرة وهذا اللي يحضرني الآن وأكيد كل وحدة منكم عندها أفكارها.. وعندها شي تحفظه جواها
اتمنى أكون افدتكم..
وارجوا الدعاء لي بظهر الغيب
ودمتـــوا بخيـــر
:26: