علموني أكلات لذيذة و طعمها حلو تنعمل بقدر الضغط ؟؟؟؟

مره جربت برست في قدر الضغط طلع عجيب ..

تحطي زيت كنك بتقلي ..
وتتبلي الدجاج بقسماط وكذا? 
وتحطي الدجاج في الزيت وتسكري ع القدر ..بس نسيت المده لانها قبل اربع سنوات سويتها  
بيطلع مضبوط مره ويجنن مانسيت الطعم 

طيب في طريقه ثانيه الي هي مندي الدجاج ..

تسلقي رز وعليه زيت وملح وهيل وقرفه في قدر عادي ..

تقطعي بصل كثير شرايح وتحطيها في قاع قدر الضغط ..وتحطي الدجاج بعد ماتقسميه من جهه وحده فوق البصل بالضبط. .
بدون اي اضافه..
 الدجاجه تتبليها براحتك ملح وزعفران وكذا ..
وتسكري القدر وتخليه فتره اظن نص ساعه او اقل .. مشكلتي انسى الوقت ..
واذا خلصتي ووفتحتي الغطا حطي فحمه في فنجان قهوه مع زيت وارجعي سكري القدر شويه عشان يسحب ريحة الفحم ..يطلع لذيذ بشكل ..
ادمنتها مندي الدجاج في القدر 

أنا كمان أحوس بقدر الضغط ياريت بالتفصيل تعطونا كم طبخه جزاكم الله خير

تقريبا كل الاكلات تقدري تعمليها بقدر الضغط بس انتبهي ان فترة الطبخ حتكون اقل من الطبخ في القدر العادي غير كذا الطعم يطلع احلى

ممكن تعملي مرق الدجاج او اللحم الاساسي الي تقدري تجمديه بعدها و تستخدميه كأساس للشوربات و لاطباق اخرى

ممكن تعملي دجاج بروستد و اصلا البروستد الي زي طريقة المطاعم لاااازم ينعمل بقدر الضغط و ميزته ان الدجاج ما ينسلق لاااا ينضغط و ينقلى بالزيت الغزير

طريقته اخذتها من شيف في قناة سما دبي و طلعت رووعة

الافضل تستخدمي دجاج مبرد الذ من المجمد

خذي دجاجة و قسميها ثمان قطع

اغسليها بالخل و الملح و اشطفيها كيس و خليها بمنخل تنزل كل الموية الي فيها ضروري

اعملي خلطة مكونة من ( كوب حليب - بيضة-شوية خل -البهارات: بودرة ثوم و بصل-فلفل اسود-ملح-هيل ناعم) لو تحبي البهارات زيادة او حراقة زيدي الي تحبيه

انقعي الدجاج بالخلطة افضل لو تركتيها طول الليل انا مرات اخليها ساعة او ساعتين و تطلع حلوة

ارفعيه من الخلطة و غطيه بالبقسماط مخلوط معه شوية ملح و بهاراتك الي تحبيها و انا مرات ما اضيف الا الملح و الفلف الاسود فقط

سخني زيت غزير بقدر الضغط حطي الدجاج بس بشرط الزيت يغمر الدجاج و بس قفلي القدر و اتركيه لمدة ربع ساعة الى عشرين دقيقة

الطعم يطلع روعة



طريقة المرق الاساسي


كمية من عظام و أجنحة الدجاج او عظام الخروف

خلينا نقول عندك عظام دجاجتين انا استغل العظام بعد ما اعمل الدجاج المسحب بس لنتيجة افضل استخدمي دجاج طازج مو مجمد

حطي عظام و اجنحة دجاجتين مع جزرة كبيرة مقطعة بصلة كبيرة مقطعه قطع كبيرة عودين كراث بهارات حب ( فلفل اسود-هيل) فصين ثوم اتركيه يغلي و شيلي الزفرة اول ما يصفى غطيى القدر و ارفعيه على نار هادية لمدة ساعة بعدها صفيه و تخلصي من المواد الصلبة و تقدري تجمدي المرق و تستخدميه مع الشوربات و غيره


البقوليات تاخد قت بالقدر العادي ...انا اطبخ كمية من الحمص الحب و بعدها ابرده و اوزعه في اكياس و على الفريزر استخدمه لعمل الحمص بطحينة

فيه طبخة غريبه بقدر الضغط انا ماجربتها بس سمعت عنها وهي كريمة الفرن كريم كرامل

ابحثي عنها

انا بس كبسه ومكرونه وايدام