على الخاص بوح الانين(المشكله الاولى)

غاليتى الزواج والرغبه فيه ميل فطرى لدى البشر ورغبتك ليس عيب او حرام لكن المشكله ان تكون هذى الرغبه شى يزعجك فى حياتك ويضيق عليك
حياتك من صنع افكارك وانت الى تسعدين نفسك
اول شى حطى امام عيونك ان الامر قد فرغ منه وان الله اذا كاتب لك الزواج راح تتزوجين ومافيه شى راح يقدمه عن موعدة او ياخرة والرضى سر السعادة
اقنعى بان لن تموتين حتى تستوفين رزقك
لاتربطين سعادتك باى امر من امور الدنيا لانه لو ماتحقق هذا الشى راح تعشين فى تعاسه ابديه غير قلق انتظارة
انظرى للنعيم حولك ومن هم اقل منك واهل البلاء
كل يوم لما تصحين من النوم احمدى الله على يومك الى انت فيه بصحه ودين وامن وامان وكل ماجاء الشيطان ليحزنك لتاخر زواجك فكرى كذا
عيشى حياتك ومتعى نفسك فى حدود الشرع بدون افراط ولا تفريط
اشغلى وقت فراغك فالفراغ العدو الحقيقى للانسان
اطبخى*اهتمى بالبيت*وبنفسك*وخصص وقت لقراءة القران يوميا ويكون على الاقل جزء
بما ان الصبر بالتصبر والحلم بالتحلم هم السعادة مثلها اذا حاولتى تسعدين نفسك راح تستجيب لك

كل هذا راح يخلى الامر فى قائمه التجاهل الى ان ياتى وقته
رزقك الله عاجلا غيراجل ولاتنسى الدعاء وخاصه فى اوقات الاستجابه

وبخصوص الكتب هناك كتاب روعه للقرنى ((لاتحزن))راح تتغير افكارك 180 درجه

اهلا اختي

الزواج حق من حقوقك .. وحب فطري من الله .. ولا احد يقدر يقول لك لا تفكرين ..

لكن كل شي بأعتدال ..

اسألي نفسك اختي .. ماهي مصادر السعادة بالنسبه لك ؟؟

اذا انت رابطه سعادتك بالزواج فقط .. فطبيعي بيكون تفكيرك محصور في الزواج ..

والبعض تشعر بخجل وصعوبه في مواجهة المجتمع بسبب تأخرها ..

فالسببين هذي هي اللي تجعلك تفكرين بأستمرار ..




اللي عليك اختي الحبيبة ..

اولا الرضا بماكتب الله لك ..



ثانيا تأكدي ان تأخرك بالزواج هو الخيره لك ..



ثالثا اكيد عندك مصادر تجعلك تشعرين بالسعاده .. انت غيري تفكيرك ونظرتك .. وباذن الله حياتك بتتغير للافضل ..



رابعا اشغلي وقت فراغك بالمفيد .. بالقراءه .. او سجلي دورات .. او بالتحفيظ .. والنت سهل كل شي .. اللي ماتقدر تطلع

ممكن تسجل بدورات عن طريق النت .. وممكن تشاركي مع مجموعه يحفظون ويراجعون القران .. وكلها موجوده بمنتدانا ..

مارسي هواياتك .. رتبي يومك .. وابعدي عن الوحدة ..



خامسا الجئي لله بالدعاء .. ادعي بكل وقت .. وللدعاء فايده عظيمه حتى لو تأخرت الاجابه .. الا انه يعطيك شراحيه في الصدر ..

جربي تدعين وكل الالم اللي بقلبك تقولينه لله .. جربي بعده كيف الراحه .. واستغلي اوقات الاجابه ..



سادسا كل وحده فينا محتاجه تجلس مع نفسها بمكان هاديء .. تتأمل بنعم الله عليها .. تشكر الله

على نعمة البصر والسمع والحركه والصحه والعافيه .. وندعوا لمن فقدها بالصبر ..

هذي نعم للاسف تعودنا عليها .. ولا يشعر فيها الا اللي فقدها .. اجلسي لو عشر دقايق باليوم وشوفي كيف النتيجه ..



ولا تنسي ياغاليه ان كثير من المتزوجات تتمنى الراحة من العذاب اللي هي فيه .. زوج قاسي لا يخاف الله خاين ..

يعني غلط نتوقع ان سعادتنا بالزواج .. سعادتك بقلبك وبطريقة تفكيرك ..

اسأل الله ان يرزقك الزوج الصالح ويكتب لك سعادة الدنيا والاخره ...





وهذي احاديث واقوال اذا تأملنا فيها تجعلنا نرضى بماكتب الله لنا :


قال صلى الله عليه وسلم :

(إن الله إذاأحب قوما ابتلاهم ، فمن رضي فله الرضا ، و من سخط فله السخط )



قال صلى الله عليه وسلم :

(عجبت لأمرالمؤمن ، إن أمره كله خير ، إن أصابه ما يحب حمد الله و كان له خير ، و إن أصابه ما يكره فصبر كان له خير ،

و ليس كل أحد أمره كله خير إلا المؤمن)



يقول الشيخ صالح المغامسي حفظه الله (ركزي بكل سطر):

(خيرة الله لعبده خيرا من خيرة العبد لنفسه , وكم من أمور حجبها الله جلّ وعلا عنا وبقيت في قلوبنا

بعض علامات الحزن والأسف عليها، ولو فتح لنا الغيب لسجدنا شكرا على آن الله حجبها عنّا)

اخواتي شجرة الدر وفرناز ماشاءالله ماقصرو

اختي الحبيبة
بقولك واخذيها من فتاة مثلك
ثقي ان الهم والحزن لاينظر الى مشاعرك ولايعبرك بشي
تمضي بنا السنين على تفكير فقط وتطوي الصحف اعمالنا على الفاضي
بماذا استغلناه ايامنا
اسالي نفسك كم سنة وانتي تفكرين هل اجاب بنتيجة
الشيطان يعرف نقطت الضعف بالانسان
ومافي احد مرتاح كل مادخل قسم الحياة الزوجية اطلع بسرعة
من كثر المشاكل والدمار النفسي من الزوج :angry2:
اول خطوة تخطيها
التقرب الى الله وقولي دائما ان الله معنا
بصراح بعد مادخلت قروب برمضان وكانت المسؤلة عن ارضي السعودية الله يجزاة خير
وتجمعنا مع البنات على طاعت الله سبحانة
تغير فيني كثير سبحان الله وكنت اقراة القران كاني اول مرة اقراة
كيف تمر ايات عن الصبر وقصص الانبياء هم اكثر ابتلاء
ثم الدعاء والاستغفار والاذكار والحفظ من القران
وبذل الاسباب وخليك على الله هو مدبر الاسباب
وتذكري ان مابتلاك الله الا انة يحبك :26:

أختي بارك الله فيك ...
الزواج رزق ولا يملك الرزق إلا الله –سبحانه وتعالى
فهو المتحكم فيه وهو الذي يحدد قدره وموعده
ومن الذي يستحقه، وكل ذلك مربوط بحكمة لا يعلمها إلا هو -عز وجل
علام الغيوب، وكيف لا، وهو القائل:
"وفي السماء رزقكم وما توعدون".

وانتى يا اختى ما عليك الا الدعاء والاستغفار والاذكار
وقراءة القران والصبر وربي يعوضك كل خير


موضوعك مهم يعطيكم العافيه ي بنات

السلام عليكم ورحمه الله وبركاته
اخيتي بما انني متاخره في الزواج ومشاعري مختلطه بمشاعرك الفطريه
كلنا لدينا رغبه بزواج حتى الفتاه الصغيره تجدينها الان تفكر بزواج وسبحان من سن سنه الزواج في خلقه سنه هو اعلم بها اتعلمين يا اخيتي سابقا كنت اعاني مثلك اتضايق عند سماع زواج احد الفتيات الصغيرات او من هم بسني وتسود الدنيا بعيني مو حسد بس غصب عني وقتهاااا كان جل اهتمامي موضوع الزواج فقط وكيف احصل على زوج لان جعلت عقلي ينشغل اكثر في هالموضوع وكذلك دائما اتوجد في مواضيع تخص الزواج فقط وحرمان نفسي من التروايح في البحث عن مايفيدها ويصفي تعكير جوها هنا اصبحت فريسه للاحزان والافكار السلبيه لكن بحمد الله ... حاولت اتخلص من هذا المشكله بفضل من الله
1- لازم ياقلبي يكون عندك يقين تام بداخلك بان ما اصابك هو ابتلاء من الله فعلينا الصبر والتوكل على الله والاكثار من الدعاء فهو مفتاح الفرج بعد التوكل على الله والقران هو البلسم الشافي للقلب
2- عالم حواء ماشاء تبارك الرحمن عالم كبير لا تتركزي فقط في مجمعات تخص الزواج وكل وقتك فيها لا ادخلي التجمعات الاخر شاركيهم في مواضيعهم واستفيدي منهم عندك المسابقات جردي تفكيرك من موضوع الزوج وشغلي تفكيرك بالمعلومات معروف ان المسابقات تعطي حافز ونشاط للعقل استغلي الفرصه والاهم من هذا اشغلي نفسك وتفكير بطاعه جعل الله ايامك وسنينك عامره بطاعات يارب عندك المواضيع تنتظر ابداعك فيها ابحثي عنها اشغلي نفسك في فعاليات المنتدى ماشاء الله كل فعاليه لها طابع خاص ابحثي عن اللي يناسبك وابحري في الابداع فيها
3- في البيت او المناسبات والاجتماعات الاسريه عيشي حياتك وطبيعتك اضحكي وسولفي وفرفشي خوذي واعطي مع الغير اللي يفيدك نصيحتي لك ياقلبي ومن قلب يتمنى لك السعاده والراحه لاتجلسين لوحدك كثير لان معروف الانسان اذا جلس في مكان لوحده كثير تفتح عليه ابواب الواسوس والاكتئاب
في الاخير اسال الله الرحمن الرحيم الوهاب ان يهبك الزوج الصالح الطيب مخموم القلب اللي يسعدك ويخاف الله فيك ويعوض صبرك خير يارب ويجعل جميع ايامك وسنينك الجايه عامره بطاعات والافراح وان يبعد عنك كل هم وحزن وكل كدر ونكد واسال الله الكريم ان يكرمك براحه اهل الجنه ويذيقك حلاوه اجر الصابرين ويارب نفرح قريب بخبر موضوعك زوجك من الزوج اللذي تمنين ويكتب لك التوفيق والسعاده الدائمه معه
اللهم امين