على سبيل الشوق رمضان قرب ... برنامجي اليومي الرمضاني ..*

السلام عليكم
ربّي أدخل شهر رمضان علينا وأنت راضٍ عنا واجعله شهراً تتبدّل فيه ذنوبنا حسنات وهمومنا أفراح وأحلامنا إلى واقع
انا حابه احط برنامجي اليومي الرمضاني وبكتبه لكم لعل أحد منكم يستفيد :
أول مايعلنون أن بكره رمضان اروح اتروش و البس ثوب جديد و البس و اروح للمسجد و اخذ معي علبه شوكلاته ، طبعا احنا بالبيت ا كل واحد يصلي بمسجد انا مسجدي بعيد
و اروح للمسجد مشي على رجولي و اذا وصلت اسلم على اهل المسجد و فيه صديقتي تصلي معاي بالمسجد و نوزع شوكلاته على الاطفال اللي عند الباب و نبارك بالشهر ، عقب الصلاه ارجع البيت و اسلم على اهلي و ابارك لهم بالشهر و نجتمع دايم جمعه بسيطه حلا و كيك و سوالف عقبها اكلم الاهل و صديقاتي و ارسل مسجات ابارك لهم بالشهر
و نتسحر و عقب السحور اقرا قران و اقول اذكاري و اجلس لين الاشراق و عقبه انام و اقوم لصلاة الظهر اصلي و اقرا شوي قران و ارجع انام شوي و اقوم العصر اصلي و انزل للمطبخ و نبدا تجهيز الفطور ( طبعا قبل انزل للمطبخ مرات احط ماسك على شعري و ادهن جسمي بخلطه ) اذا خلصت تجهيز فطور قبل المغرب اتوضى للصلاه و اجلس على سفرة الفطور
*طبعا مايمنع انك تسوين مثلي تنشبين لـ امك و ابوك و اخوانك الصغار يدعون لك ، اذا اذن المغرب اشرب مويه وكم حبه تمر و اقوم لسجادتي اصلي المغرب و ادعي بين الاذان و الاقامه و اصلي السنه


عقبه انا ماا أكل شي ، ممكن اشرب شاي اخضر او قشر قهوه عقبها نرتب و نشيل السفره ونساعد الخادمه بغسيل المواعين و المطبخ اذا خلصنا رحت امشي على السير الكهربائي ابو نص ساعه و بعدين اتروش و البس عشان اروح للصلاه .
مرات اكون جايعه فـ أكل سلطه ومرات عادي و على المسجد للصلاه و اذا رجعت من المسجد اتعشى طبعا أكلي يكون سلطه و اي نوع من البروتين مثل دجاج او سمك
وبعدين اصعد اكشخ و البس يـ أما نطلع للاهل او يجونا .. طبعا من بعد 15 الشهر خلاص ماعاد اطلع او احضر جمعات اصير اذا رجعت من المسجد اتعشى و اجلس على صلاة مكه بالتلفزيون و اذا خلصت اجلس اذكر الله او اقرا قران و اصلي ركعتين و اقرا شوي من القران قبل السحور و انزل اجهز السحور
طبعا اتسحر خفايف زبادي و تمر او نواشف عقبه اتجهز لصلاة الفجر اتوضا و اجلس استغفر و اذا اذن اصلي و اجلس اقري قران و اذكر الله لين الاشراق
و عقبه انسدح على سريري وانام و اذا ماكان فيني نوم اطقطق بجوالي شويات او اجلس ع اللابتوب و خلص يومي كذا

و بالاخير حابه اذكر ببعض الامور :
ان حاولي تتصدقين بأابسط الاشياء ، ي اما تكون بتفطير صائم او بالمال سواء تعطينه محتاج تعرفينه او اسهل شي تحولين للجمعيات الخيريه عن طريق مباشر الراجحي و للامانه هالجمعيات تقدرين تحولين لها حتى لو ريال بس
ثاني شي : حاولي تبعدين عن التلفزيون و برامج التواصل الاجتماعي خصوصا بالعشر الاواخر
ثالث شي : حاولي تخلصين تجهيز العيد قبل رمضان عشان ماتطلعين تفرفرين بالاسواق برمضان تتفرغين للعباده
رابع شي : ادعي و ألحي بالدعاء و اكثري الذكر و قراءه القران هو شهر واحد بالسنه اجتهدي فيه لا تكوني من المحرومين و استغلي افضل الاوقات اخر الليل و الفجر وقت الافطار
وتقريبا هاذي الاشياء اللي ببالي حاليا و بسس
وفي الختام
وانتم صائمون كونوا فرحين ، مبتسمين فأنتم تِصومون لأجل الله ، لأجل باب الريان فَـ لاتمنون على ربكم بِـ سوء أخلاقكم ، اللهم أعني و والدي على صيامه وقيامه واكتبنا فيه من العتقاء من النار ، و بلغنا ليله القدر و اجعل لنا ووالدينا دعوة مستجابه