ربك يستر واتفاقيات السلام الوقعوها ما تنهار بعد ما مات - السودان الفيهو كافيهو. يا ربي اصلح حال السودان

ربنا يستر بس..من قبيل فى مظاهرات و ضرب فى الخرطوم..

من ما جيت من الشغل فاتحة على الجزيرة - قالوا الاوضاع ابتدت تهدأ بعد ما الحركة الشعبية طلبت من الناس انهم يهدوا .. الله يعين

هلا هلا ببنات بلدي اخباركم شنو؟؟؟

فعلا ربنا يستر......على فكرة مواضيع حواء السودان

عجبتني و أترقب المزيد المزيد

الليلة كان يوم مرهق عاطفيا و جسديا و نفسيا.....
صحينا من الساعة 5 صباحا...بنتابع الاخبار و نشوف الحاصل...ولغاية الساعة 7 ماكان فى حاجة اكيدة....فعادى بابا و اخوى طلعوا...بابا مشى الشغل و اخوى عندو امتحانات و اصر انو يمشى.....وانا و ماما قاعدين متابعين التلفزيون بين قناة السودان و الجزيرة و العربية ...واخواتى كانوا لسه نايمين.........بس...لغاية ما اتاكد الخبر...فى ساعة ما اتاكد الخبر اتصلوا بينا اهلنا و قرايبنا و قالوا طوالى نسيب الخرطوم و نمشى الحصاحيصا..خايفينن علينا لانو المنطقة الساكنين فيها جديدة وواصحاب البيوت معظهم مغتربين مسافرين و مقعدين فى البيوت غفراء جنوبيين حارسينها ليهم.... لكن نحنا مافكرنا انو ممكن يحصل اى حاجة....بالعكس بقينا نطمن فيهم و ماتقلقوا ومافى شى لانو و الحق يقال جيراننا الجنوبين ديل فى حالهم...وما شفنا منهم اى شى كعب فى يوم..ونحنا بنعاملهم كويس جدا....بس...على الساعة 11 صباحا...بدينا نسمع صوت ناس ببتشاكل و بتصرخ بره و ضرب و كده...اعصابنا خربت وماما قعدت تبكى قلقانة على اخوى و حاولنا نتصل على مدرسته ماف زول رد...الحمدلله اخوى جا بعدها بى نص ساعة....قال انو ناس المدرسة فكوهم و هم جايين لقوا العربات المحروقة و الناس المجرحة و الشوراع الرئيسية كلها ضرب و هو جاء بى شارع بعيد و معاهو اصحابوا....فى اثناء ماهو بيحكى لينا سمعنا صوت الرصاص و كأنوا جوه البيت...واخواتى صحوا بيبكوا و كان جد موقف عصيب...قعدنا كلنا فى اوضة واحدة...راقدين على الارض علشان لوجات رصلصة طايشة ما تضرب زول فينا .....بنحاول نتصل الشبكة بى بابا او الشرطة او الدفاع المدنى الشبكة مابتجمع ....بس راقدين و نقرأفى القرأن وصلنا مرحلة انو ماما قالت لينا اتشهدوا الموت حق...بس بعد فترة الشبكة اتصلحت...اتصلت على بابا و كان هو كمان قلقان بيحاول يتصل و الخط مابيجمع و حاول يجى لكن كانوا مانعين الحركة فى نص الخرطوم...اتصلت على الشرطة و الدفاع المدنى ...وقعدنا نص ساعة كده و قام بابا جا....واتخيلوا طلع شنو..الرصاص ده من قوات حفظ الامن علشان يخوفوا الناس و يفركشوا المظاهرات..:(