على طاري ( كم مهرك ؟ ) هذه قصه واقعيه !!!

قريت موضوع الاخت عن موضوع كم كان مهرك ؟؟
فتبادرت لذهني قصه حصلت لأحد الأقارب قبل تقريبا 20 سنه
يسولفونها لنا دايما اللي عاصروهم ..


يقولون انه هذا الرجال موظف بسيط في احد القطاعات العسكريه وراتبه
على قد حاله ووضعه بسيط وظيفته في المنطقه الشرقيه وأهله في احد القرى
وكان شبه مغترب عنهم

فبالاعافيه اقنعوه اهله بالزواج لما اقتنع ان الزواج كله بركه وتساهيل ويمكن تتسهل اموره
وتنفرج باذن الله المهم راح يخطب من ناس مش من نفس العيله خطب وواففق ابو البنت واهلها

بس طلبوا مهر خيالي لأن عاداتهم ان البنات مهورهم جدا كبيره فطلبوا منه 125 ألف ريال
+ أطقم ذهب للأم + سيارة المهم الولد شرح للأب وضعه وانه مايقدر يوفر هالمطالب هذي
وانه يحاول يحط اللي يقدر عليه وانه شاري هالبنت وشاري نسبهم قاله الاب انه انت بكيفك
وهذا مهرها وان ماخذيتها بياخذها واحد من عيال عمها والا عيال خالها ..

راح الولد ودبر له قرض وقام يشتري ويبيع في السيارات ومن هنا ومن هناك لين جمع المبلغ ..وكانت ذيك الفتره
اللي عنده 100 ألف ويييييييين صعبه

المهم دبر المهر وملك على البنت وتزوجوا واخذ عروسته واستأجر له شقه صغيره بالدمام غرفتين ومطبخ وصاله وحمام تكرمون وعاشوا بسعاده بس اللي صار ان الزوجه كل ماطلبت زوجها انها تروح تشوف اهلها لانها ماشافتهم من بعد الزواج كان يقولها : شوفي اذا تبين تظلين معي انسي اهلك واذا تبين اهلك ابوديك الحين بس ظلي عندهم وانسيني وكانت تبكي كل يوم وتصييييح وتحاول فيه مافيه فايده راسه يابس وكلمت ابوها وامها واخوانها واشتكت لهم اخر شي بعد مرور سنه كامله جاء ابوها ومعه امها عشان يشوفون بنتهم ( المسافه تقريبا 1000 كيلومتر ) المهم الزوج كان بالدوام فاتصلت عليه زوجته تقوله ابوي جاي بالطريق معه امي ماتقدر تطلع من الدوام تستقبلهم ؟؟ قال لها : ابيك انتي ماتستقبلينهم وتراك اذا فتحتي الباب لابوك تراكي طالق زعلت وعصبت وصاحت وبكت مافي فايده كلمت ابوها قالت له السالفه كلها ..الاب كلم الولد قال له ياابن الحلال هذي بنتنا ونبي نسلم عليها ونمشي ومن هالكلام ومحاولات الاقناع لين قال له انتظرني لين اطلع من الدوام ويصير خير ... وانتظر الشايب هو وحرمته برا لين الاخ طلع من العمل وجاء وفتح لهم الباب ودخلوا .. راح لزوجته قال لها ادخلي بالغرفه ولاتطلعين واذا طلعتي من غير مااقولك تراك طالق .. ظلت بالغرف .. المهم جلسوا يتناقشوا قال الولد لأبو البنت : شف هي بضاعه وانا اشتريتها منك وانت بعت بنتك وانا شريتها .. وان كانت بنتك قبل فهي زوجتي الحين .. ولاهي زوجتي قبل ولاهي بنتك الحين ..
وانا دفعت دم عروقي وماوراي وماقدامي مهر لبنتك حتى اهلي اللي كنت اروح لهم كل شهر ماقدرت اروح لهم لان ماعندي اللي يسدني مشوار الطريق ولاعندي سياره تصبر على الخط والمصروف اللي كنت احطه للوالده انقطع عنها .. وانا الحين ماعندي الا هالشقه الصغيره وهالسياره البسيطه وهالحرمه وان شاالله ابي ابني حياتي من جديد فان كنت تبي بنتك خذها ولاترجعها لي والا اتركني بحالي وانسى ان لك بنت ...

الابو يوم سمع كل الكلام قطع الامل ورجع للديره بس الام حنت عليه وزنت فوق راسه بكاء وصياح تبي تشوف بنتها وماهنالها بال ابد لين بغت تموت من حرقتها على شوفة البنت اخر شي راح الابو للولد مره ثانيه ورجع له نص المهر اللي خذاهه منه واعطاه السياره وترجاه انه يخليه يشوف بنته بالموت بالموت وافق الولد ورجعت الامور لمجاريها

ويسولفون ان الابو هذاكان عنده بنتين صغار لييييين كبروا وعنسوا محد خطبهم مع انهم حسب ونسب وجمال واخلاق



هذي القصه حقيقيه ومنقوله من ناس ثقات عاصروها قبل 20 سنه