عماتي اتعبوني

السلام عليكم ورحمة الله

راح ادخل بالموضوع على طول
خواتي انا عانيت كثير من اقاربي و خاصه عماتي وبناتهم
مايصدقون على الله يشوفون شي بعايلتنا على طول يتشمتون ويتكلمون ورانا
بس بجمعاتنا مسوين انفسهم ملائكه منزلين ويسوون انفسهم يحبونا وبس يدعون لنا مع ان كثير مرات يبين الحسد بعيونهم وبنغزات الكلام
وامي انسانه طيبه وعلى النيه تحبهم ولو اذوها تسامح

بس انا مااقدر مااحب النفاق والكذب والحسد اللي اشوفه بعيونهم واسمعه من كلامهم
هو اللي يفضحهم انهم يتكلمون سوا عني اذا اجتمعو ويحللون تصرفاتي وكلامي بشكل سيئ وينسون كل شي سويته عشانهم وساعدتهم فيه
وينفضحون لان كل بنت تجي تعلمني عن خالته وبناته واكتشف ان الكل متكلم وكلام سيئ

انا متزوجه من ٤ سنوات ولاعندي خوات بس اخو واحد اكبر مني
وكل سبوع او سبوعين ازورهم ببيوتهم ولازم اكون جايبه معي حلا او قهوه وشاهي او عشاء ومستحيل ادخل ويدي فاضيه
واتفاجئ بعد فتره انهم شانين حرب علي وانا ماسويت او قلت شي تركتهم فتره طويله لاني تعبت من الكلام وبعدين جو عندي وقالو حنا زعلانين لانك ماتعزمينا وكل سبوع جايتنا وحنا ماتقولين تفضلو على بيتي ويقولون انتي ماتبينا اصلا
وانا والله عازمتهم كذا مره بس يبون كل سبوع اعزمهم ومنقريين اني اجيهم ويحسبون ماابيهم كيف ماابيهم وانا كل سبوع عندهم ؟!!
فهمتهم كلمتهم مارضو

رجعت طنشتهم والحين طالعين لي بسالفه حملي ليه ماحملت طول هالسنين ويطلعون اشاعات علي وكلام اني احمل واسقط ولااعلمهم وان انا الحين حامل وبالشهور الاخيره ولاعلمتهم وزعلانين فوق زعلهم :024:
وانا ماحملت عشان زوجي عقيم وتعبانه نفسيتي وفوق هذا اتعبوني بكلامهم كل فتره طالعين بشي وربي يابنات اني ابكي على اللي يسوونه فيني كل يوم ولاعندي احد غيرهم ماعندي خوال
وهم لازم ازورهم ماابي اقطع الرحم
ابي نصايحكم غير اني اكلمهم واواوجهم لاني اذا كلمتهم انكرو كل شي او حطو بلوتهم على غيرهم وانا صعبه الحق الناس بكل كلمه

والله تعبانه من حاله زوجي وتعبانه من التفكير بالحمل وان يمكن ربي مايرزقني طول عمري
وخايفه يعرفون بعقم زوجي ويعايروني ويتشمتون فيني

انا تعب منهم وتعبت من عماتي اللي المفروض يكونون سند لي بعد ابوي الله يرحمه