عمتي أم زوجي وولدي

بنات أنا عضوة جديدة و حبيت استفسر منكم بخصوص ام زوجي
انا و الحمدلله علاقتي معاها كويسة يعني لا تتدخل في خصوصياتي و لا اتدخل انا بخصوصياتها. هي مرة طيبة معي الحمدلله بس في موضوع دوم يدور في بالي
انا متزوجة من 6 سنوات و عندي ولد الحمدلله
مشكلتي مع عمتي يمكن تكون بسيطة او سخيفة بالنسبة لكم بس انا عجزت الاقي لها حل
انا ربتني امي الله يحفظها ان حماتي تكون بمقام امي و انا من تزوجت احاول اعاملها مثل امي بس هي ما تعاملني مثل بنتها. احس لو زوجي اخذ بنت اختها او وحدة من جماعتهم كانت بتعاملني بحب اكثر من الحين
السالفة ومافيها كالتالي:
لما جت خطبتني لولدها جت عادي رغم انها اول مرة تدخل بيت اهلي ما فكرت تجيب هدية او علبة كاكو او ورد
حفلة الخطوبة ما فكرت تهديني شي
تزوجت وما اهدتني شي رغم اني ما كنت ازورها الا و يدي مليانة سواء حلويات او حتى فواكه
حملت و جبت ولدي و زارتني بالمستشفى و كالعادة لا هدية لي ولا لولدي تراه اول حفيد لها
قعدت نفاس عند اهلي شهرين و مافكرت تزورني او تجي تشوف حفيدها حتى اهلي استغربوا عبالهم انا قلت لها لا تيجي بس شرحتلهم اني قلت لها تيجي تشوف حفيدها متى مابغت بس هي ماجت علما هي لا تشتغل ولا شي و اصغر عيالها رجال بالجامعة
ابدا ما تتصل فيني تسال عني او عن ولدي الا لو عرفت اني او الولد مريضين او في المستشفى رغم اني كنت اتصل بها كل جمعة بس عدم اهتمامها برد الاتصال خلاني اتهاون من هالناحية
تسافر و تروح و تجي ولا فكرت تهدي ولدي شي.. ولااااااااا شي ولا ريال
في عيد ميلاد ولدي سويت حفلة و عزمت ناس كلهم جابوا له شي ولو بسيط وهي مافكرت تجيب له شي
ابدا ما توكله من يدها ولا عمرها غيرت له حفاضة
انا عن نفسي مابي شي منها اهم شي معاملتها ان شفتها طيبة معي وما تقصر لما نجي نزورها, بس صارت تزعل تقولي ولدك يكرهني وفعلا الولد ما يحب يسلم عليها ولا يقرب منها او لمسها بالغلط يجررري بعيد منها. هو عمره سنتين و نص
لا تحكمون على تفكيري مش مادي, انا الحمدلله عندي كل شي و مو محتاجة شي.. قلت في بالي سبحان الله في ناس ما يهتمون للهدية, الهدية بالنسبة لهم كماليات او مجرد ايتيكيت بس الشي يلي يقهر انها جتني مرة و تقولي "ولدك ما عنده ثياب جديدة ما لبسها من يوم كان صغير؟" يعني ملابس جديدة ما لبسها لما كان نونو. قلت لها " الا معه جدد بس بخليهم للبيبي يلي بعده باذن الله". قالت لي "طيب طلعي لي كم بدلة منهم ابا ازور وحدة جابت بيبي و اهديهم لها"
معقولة ما اهدت حفييدها ولااااا شي والحين بتهدي ولد الناس!! لا بتهدي عيال الناس من اغراض حفيدها يلي انا جبتهم له و كنت ناوية اخليهم للي بعده! المصيبة هذا حفيدها الوحيد. انا عن نفسي سكتت و لميت لها شوي من ملابسه الجدد و عطيتها بس وربي قلبي عورني على ولدي
بنات تتوقعون تصرفاتها تدل على شي؟؟ انا ادري هي تحبني و تحب ولدي بس ابد ما تبين بحبها لنا, تبين حبها للغريب و بس